.../// #البارت الثاني
#زهراء_محمد_السراي
#شارع_حيفا
...لـشهيدي..
موجوعة أنا لفقدك، تعيسة لحنيني إليك، مشتاقة لك، أرثيك دوما وذكراك العالقة في قلبي وذهني لا تغيب... أتمنى لو أتمكن من الاستيقاظ على صوتك واستفتاح يومي بملامحك... لكن يقيني بأن هذا مستحيل وأن الراحلين لاعودة لهم ..والموت حاجز فولاذي بيننا يثيران الدمع ورغبة في الانطواء والتكور حول نفسي وتهدئة تنهيدات الروح بذكراك... ثم إبان ذلك.. أتذجر الجنة واليوم المنتظر وكلامك الجميل وتعاودني الابتسامة لا إراديا كما لو كان طيفك حاضرا.. كما لو أنك محوت دموعي بيديك وقلت تبسمي فلنا لقاء وأنا أحبك ..باق هنا .
فيلسوفة شرقية.
...إني أراك لم تمت وأرى بعينيك النقاء.. وتنام روحك في السماء بعيدًا عن دنيا الشقاء ..
لكن خيالك لم يزل باق ولله .. " البقاء " ..💔...
...يــا مــن تــرحــلــون بــصــمـت ألا يحــق لنــا لــحــظـة وداع ....! 💔...
... لااعرف لماذا وماذنبي لكني حقاً تعذبت ...
سنه2005
بيوم مثل كل أيامنا الحلوة انجمعنا باليل بسهرة طلعنا التلفزيون بساحه خالي مؤيد هاي الساحه جانت عدنا مثل الجنه تخبل بيه حديقة صغيرة مليان أنواع الورد بيبي من زمان تسقيها لحد ماصارت بهالجمال والزينه وبعدين علمتني كل يوم المغرب ارشها
- طيوفه
= ها يمه
- الزمي الصونده ورشي الساحه واسقي الحديقه
= ليش نسقيها
- حتى ماتذبل وتيبس
= وإذا ذبلت
- تصير موحلوة الساحه وكعدتنا تخرب ماراح نشم هوى نضيف ولا ريحه طيبة
= عادي نرش عطور
- هههه مايصير شلون افهمج طيوفه إذا راح شي منج او خرب ماراح يتعوض ولا يتبدل كل شي بالدنيا ماله بديل اني هذا إلي تعلمته من الدنيا
= شلون ؟
- بعدج صغيرة على هاي السوالف بعدين اعلمج
= لا هسة أريد اتعلم كل شي اني ذكية وكبيرة موصغيرة
- هههه يابعد روحي شوفي يمه طيفه حطي ببالج هاي الدنيا إذا تاخذ شي بعد ماترجعه يعني لاسامح الله إذا مات واحد من اهلج ماراح يجي واحد مثله بالضبط
= ليش
- اذا اجه شخص بداله يا اما أحسن منه أو أسوء بس مايرجع هو نفسه الدنيا تأخذ وتعطي بس الشي التاخذه ماترجعه ابد تعطيج شي غيره
= يعني من اخذت منج خالي جراح وطاهر وجلال بعد ماعطتج شي
- لا يمه عوضتني بولدي صابر ومؤيد وحميد وسرمد وطلال وسامر وخالاتج فضيلة وامج( تهاني ) وخالتج يسر ذولي كل مااملك بدنيا وأحفادي وجنايني خير ونعمه فضيلة احمد الله عليها ليل ونهار
= نحمد الله حتى مايموتون مو
- اسم الله الرحمن الرحيم أي يمه يلا روحي رشي الساحه
رشيت الساحه صارت ريحتها ترد الروح خالاتي خلصن شغلهن سبحن وسبحن جهالهن ولبسنهم وصلت بيبي خوالي قسم يصلون وقسم لا باليل اجتمعنا بالساحه خالي حميد ومرته علا وبنته عسل حالي صابر ومرته الفطيرة هههه فطيمه وبتنهم زهرة وابنهم لؤي خالي مؤيد وعروسته دنيا وخالي سامر مرته تبارك وابنهم ثائر لمتنا حلوة إخواني اجوي ريما أختي ام لسان ورودينا المغرورة من كثرة الدلال والاهتمام وقيصر وحمودي بفراشه ولؤي أخوي الكبير لسانه ثكيل بالكوة ينطق الحرف من يطلب مني شي
- ااا طططياف
هيج كلامه والكل يكوم يضحك هو مايتحسس وعادي يبقى يضحك وياي امي( تهاني ) هم موجوده كاعده يم امي تسولف وتضحك وي نسوان خوالي خالي حميد ديسكف سمك الريحه غنية ومميزة كلش لؤي طلع التلفزيون بالساحه وعدلنا الاريل نريده يصفى ماصفى شاشته تركص هههه واحد ورى الثاني جرب يشغله واني احرك بالاريل لحد ما اشتغل والشاشة صارت زينه جهز العشا وكعدنا عالسفرة طعم السمك يخبل خلصنا العشا بقينا سهرانين خالي سعيد وسرمد وحميد وعوائلهم كلهم ببيت جدتي ينامون ونصهم ينامون بساحه خالي سامر لأن مثل ماذكرت بيت جدتي بس هول وغرفه وحده قبل لا ننام وكل واحد يروح لبيته اندكت الباب اجه صديق خالي وبعد السلام والكلام خالي سامر كال أروح اسهر بالقهوة شوي وأرجع
بيبي كرصها كلبها
= يمه لا تتأخر دنيا ليل والوقت متأخر
حتى زوجته خافت
- عيني أبو ثائر أجل روحتك هسة
_ يابة اني وين رايح للحرب قابل الولد عيب كل مرة يجيني ومااروح أروح نلعب محيبس ونسهر شوي مناه لساعه ساعتين أرجع
حتى خوالي ماحبوا الفكرة لأن الأوضاع موتمام وتخوف راح خالي الكل انخبص تلقائيا ومانعرف السبب حتى الأطفال كامت تبجي من وحدها خبصه غريبة عجيبة صارت هوسة اباوع بالوجوه تصفر وتخضر شسالفة عبالك متوقعين راح يصير شي ولا كأنما تونا كنا نضحك راح خالي وصديقه وياريت ماراح لأن من هذا اليوم نسينا طعم الراحه والفرحه والضحك وكل شي راح من عدنا بعد أبد ماالتمينا ولا انجمعنا هيج جمعه حلوة طشرنا الوقت بدون رحمه تأخر خالي بيبي خافت بقينا منتظرين خالي محد نام حاولنا نسولف بس عبالك مفتقدين خالي ونباوع لمكانه إحساس غريب حزين بس أصدق من كل عواطف الفقد والخسران إلي مرت بينا لأن كانت آخر كعده اله ويانا صارت ساعه ١ هو كال ساعه ساعتين بس مر وقت هواي تأخر ضل بالنا توترنا بيبي صارت نار خطية كلبها يوجعها ماكدرت تكعد اباوعلها واكفه بالباب
- ولكم مامرتاحه روحو لاخوكم جيبوه جيبولي سامر
يعني من نبرة كلامها عبالك تريد تنعي خوالي صاروا أعصاب توتروا كلش
خالي مؤيد_ شبيج خبصتينا اكعدي يمه فدوة اروحلج
- ما ادري شبيا ولك يمه روح
نسوان خوالي انخبصن اشوفهن يحيرن شيسون كامن عزلن البيت
... كأنما الأجواء وكل مايحيط بنا يجهز لمرحلة جديده من العناء...
الأجواء صارت مخيفه ظلام جل فوك علينا فوك ظلام اليل
... كنت الطفلة الصغيرة التائهة في إحزان أهل بيتها...
خالي مؤيد_ أروح أشوفه تأخر
راح خالي للقهوة ورى ربع ساعة رجع كلنا نسوان وزلم واكفين بالباب وخوالي يصيحون علينا طبن جوة ومحد تطب كلب مرة وحس بشي موزين شتتوقع تسوي وبالذات قلب الأم امي وخالتي لازمات بيبي من الخوف والرعب الي بداخلها الي محد يعرف شنو تفسيره بس انتشر الرعب والرهبه بينا كلنا ماكدرت بيبي لاتكعد ولابيها حيل توكف على طولها ما ادري شلون انحنى ظهرها رجع خالي مؤيد بيبي تلكته بصوت مثل الصرخه الخوف احتلنا احتلال
خالي مؤيد_ سألتهم يكولون راح من ساعه ١١ فص ملح وذاب
بيبي كامت تون وتصيح يمه سامر وين رحت خوالي وجوهم صوفرت محد نام بهالليلة انتظرناه بلكي يرجع ياهسة يرجع ياهسة يرجع سامر يارب دخيلك بيبي تدعي ومرته بس صافنه خفنا منها وعليها لأن صارت مثل الصنم أبنها يبجي ماتسكته مرت خالي ( صابر ) فطيمه أخذته سكتته مرت ساعات الليل صعبه بس موبصعوبة مامرت على بيبي ساعه ٧ الصبح اجانا صلاح إبن خالتي فضيلة متوتر فحطان وجهه اصفر عيونه حمر اباوع على اديه ترجف يريد يحجي بس مايكدر الكلمه ماتطلع انعكد لسانه خالي صابر عاط بيه
- شبييييك ماتحجي
فضيلة _ احجي يمه مو والله كلوبنا تشلعت احجي شصاير شبيك وين جنت
صلاح_ خا خخ خالي خالي سامر مات
فضيلة - شدتحجي شنو مات
عيونها تدمع ووكعت بالكاع رجليها ماشالتها
فضيلة _ ولك يمه شتحجي أنت
خالي مؤيد ضربه راجدي وبدأ الصراخ كلها تبجي بس صراخ وموت زوجه خالي براء صارت مخبلة انصرعت بيبي تدك على صدرها وتبجي أشوفها تباوع للسما وتكول - ليش ياربي ماعصيتك يوم دايماً احمدك وأشكرك على كل حال هذا رابع ولد من وليداتي يروح ينكتل شمسوي ياربي
فتحت شيلتها وطلعن ضفايرها وكامت تلطم على صدرها ووجهها خالاتي تحزمن حزام وكامن يلطمن كل وحده حالتهاحالة الولد وخوالي راحو يتراكضون ينبجي على حالهم لكوا خالي سامر بالحديقه مقتول مقابيل بيتنا ضاربيه طلقه برجله وبصدره ماخذه النزيف محد عرف شنو السبب ولد شاب ببداية عمره انقتل وانشمر بحديقه مانعرف ليش كل إلي نعرفه موت قتل عوائل تدمر وتضيع فرحتها تطشر اللمه وتختفي الضحكه باليل كنا فرحانين شلون الوضع تغير والصبح تحول كل شي إلى حزن رهيب الصراخ والبجي نغمه حزينه هددت هدوء الفجر بيبي مفرفحه تصررخ خوالي مخبوصين خالاتي تحزمن حزام خالتي يسر تدك على روحها امي شكت دشداشتها من الطول للطول وخالتي فضيلة تملخ بروحها كطعت شعرها وخوالي حالهم حال كلهم ملطخين دم اديهم وملابسهم مدنكين روسهم خالي صابر حاط أيده على عيونه ميهون عليه أحد يشوفه يبجي اففف كلنا تحطمنا تحطيم أكثر شخص تأثر بوفاة خالي سامر زوجته تأذت وصارت بيها حالة نفسية ومرض عقلي خطير فرد مرة صارت ولحد الآن عايشه عالمهدئات والرجات الكهربائية سوينا فاتحه والكل التم الكرايب الأصدقاء الجيران ٣ أيام مانعرف اليل من النهار محد ياكل وكلها منايمه خوالي ميدخلون للبيت ميتحملون يشوفون مكان خالي فارغ وخالي صابر ميكدر يشوف أمه تبجي بيبي ليل نهار تنعي فطيرة متعرف شتسوي وتكول شنو ذنبه ٤ راحولي الله يرضاها محمد ليش شمسوية عندك ياالهي
مرت الأيام حزينه وكئيبة مو بس إحنا العائلة العراقية إلي عانت كل العوائل إلي بشارع حيفا ماكو بيت أو عائلة مامرت بضيم هاي السنوات والأوضاع راحت الفرحه من بيتنا راح كل شي حتى الألوان نسيناها صرنا منميز ضلينا بالأسود وقبل حتى الحيطان ندك عليها قطع قماش أسود ماكو بس الأسود حتى الجو اباوعله مغبر ومغيم الساحه ضلمه الوردات ذبلن ونص الدجاج والبط مات من الجوع لأن نسينا نحطلهن أكل تدودهنا وانشده بالنا
... هذه الحادثة كانت مخزنه ومحفوظه في خزائن ذاكرتي الطفولية ولا أعرف لماذا كلما تقدم بي العمر أتذكر كل التفاصيل وبدقه مع كل هذه السنوات التي مرت هي في بالي ولم تغادره أبد لأنها مرتبطه بالعراق ارتباطاً وثيقاً ...
ورى وفاة خالي سامر شي اعتيادي رجعنا نلتم بس لمتنا بيها نقص وموحلوة الفرحه مصطنعه بس علمود نتناسى هذآ الوجع وألم الفراق مومثل قبل كلما نجتمع بالساحه نتذكره مكانه ناقص نتذكر ضحكاته وسوالفه بيبي تضل تبجي وتنعى تأثرت بمماته وماكدرت تنساه غير ضناها مو هينه رابع واحد هذا وبراء مرته أكثر شخص اتأثر بفقدانه لدرجه خسرت نفسها وفقدت عقلها وصحتها تدمرت حياتها مو براء القديمه صحتها عقليتها نفسيتها تحت الصفر تدهورت كلش تجيها نوبات صرع توكع تتخربط وإلا رجات كهربائية مافاد لا علاج ولا شي إبنه يبجي وهم تمرض فترة لأن متعلق بابوه وما ينام إلا بحضنه مرت أشهر كئيبة وهادئة وكولنا بعد الصار ماراح يصير شي أكثر من الصار بس ماكنا متوقعين ورى هذا الهدوء عاصفه راح تجي تدمر كل شي وتطشرنا وتفرق شملنا أحداث الي صارت بسنين ٢٠٠٥ وراه هاي السنه وبعدها تغيرت كل الأوضاع العراق ماعاد عراق الحضارات والأديان والمذاهب تغير كل شي صارت أمور خارجه عن سيطرة القانون وحوش وذئاب بشرية حولت الدين والمذهب غاية للتفرقة والخراب والقتل صارت مآسي دموية الي صار بالعراق مايستوعبه عقل بشري وأغلب العراقيين والعوائل الي كانت موجودة بذاك الوقت وعاشت المجزرة والرعب آنذاك كلها اختلت عقلياً ونفسياً من أكثر المحافظات العراقية إلي تأذت بهذي الأوضاع بغداد العاصمه وشارع حيفا كان اله نصيب أوفر
... ان الطائفية كانت أخطر الأسلحة التي تفتك ببلدنا الحبيب منذ ظهورها والجميع خائف من وصول الدولة إلى مرحلة اللادولة وها نحن منذ ذلك الحين وإلى الان كنا ومازلنا ندفع ثمن هذه التفرقة التي قسمت العراق ولم تكتفي بذلك فقط بل جعلت الموت وسفك دماء الأبرياء شي بمنتهى السهولة السلاح بيد كل من هب ودب ظاهرة السلاح خارج إطار الدولة والمستشري بشكل كبير في البلد لارقابة لا قوانين تحولت البشرية إلى وحوش مفترسة لا تعرف لماذا تقتل بعضها هل السبب حقاً هو فرق الدين والمذهب إن كل ماحدث بعد سنه ٢٠٠٣ وخلال السنوات ٢٠٠٥. ٢٠٠٦ .٢٠٠٧ من انفجارات وكوارث وجرائم بحق البشرية وبحق وطننا الجريح هو تحذير من الحكومات التي تشكلت بعد ٢٠٠٣ والتي للأسف كانت متوقعه إن الدولة ستصل إلى هذه المرحلة من الفوضى العارمه التي لم يدفع ثمنها سوى العوائل البريئة في كل بيت هناك صرخات لاتعد ولاتحصى حتى الجدران في ذلك الوقت كادت تبصم على هذه الأدلة عانى المجتمع العراقي ماعاناه من انخفاض المستوى المعيشي والاجتماعي والثقافي كان كافياً علينا الخوف والحزن والرعب من الضروف حقاً كان كافياً لقتلنا الكل مصدوم ماذا ولماذا لعد ٢٠٠٣ تغير كل شي جذرياً من أهم ماقيل إنه اجتمع الجهل والدين في عقل انسانٍ همجي تغطى بالدين ليمارس وحشيته الفضيعه بالناس واسس واقنع مجاميع حتى تطورت وبدأوا يحرفون بكلام الله ويفتون فتاوى لا علاقة لها بالإسلام إن الاسلام دين المحبه والوئام والله ...
صحيح كنت طفلة واي طفلة بعمري ماراح تركز على هاي المأساة بس اني عندي فطنه بيبي كامت بالكوة تكوم وتكعد اني اساعدها نسوان خالي مايسولفن مثل قبل ولا يضحكن جانت سوالفهن وضحكهن ميخلص
*********
تهاني( أم أطياف ) ( في زمن الثمانينات)
مواصفاتي بيضة وأحلى وحده بالمنطقه مغرورة بجمالي بزمن نهاية السبعينات وبداية الثمانينات كنا إحنا ناس مرتاحه إخواني كلهم موجودين وجراح أخوي الجبير موجود وعنده صديقه مؤيد دايما يسولفلنا عليه وعن طيبة كلبه وشلون هو راعي مواقف ومرة كنا مجتمعين كلنا داير مداير أمي
جراح- يوم لو شما اسولفلج عن مؤيد أكون مقصر بحقه ولد أدب وأخلاق وفوكاها راعي مواقف عساك بس تنخاه
= الله يوفقه ويطيه على كد نيته بجاه النبي محمد ويرزقه ببنت الحلال
- هنيالها التاخذه والله يدللها دلال
اني منتبهه لحجيهم شكد مدحه معقولة هيج جراح يحبه عوزه بس يكبعله مرة وينطيها اله
تهاني- يمه راح أجيب الشاي تريدون كعك وياه
= اي جيبي اخوتج يحبوه
- صار
جبتلهم الشاي والبسكت ناكل ونسولف نضحك ماكو مثل لمتنا بذاك الوقت
تهاني - خوية جراح بلكي باجر توديني للسوك امي كلما اكوللها تكول مااكدر رجليا يوجعني
= صار حضري نفسج واخذج هسة حضريلنا صينية معدلة راح يجي مؤيد يتعشى يمنا
- دقايق وكل شي حيكون جاهز
حضرت صينية شكبرها والأكل يخبل واجاني فضول اشوف مؤيد هذا حتى لبست فستان من ذاك الزمن ضيق وشوي دلع يعني كشخت واني جنت جميلة بشكل وكلها تسولف بجمالي وبرشاقة جسمي لأن لاضعيفه ولا سمينه أخوي اخذ الصينية وخزرني
= طبي جوة لاتطلعين
- لا مطالعه بس انطيتك الصينية
= يلا يلا جوة
ردت أشوفه بس ماكدرت من راح شفت بس خياله من بعيد ماشفت وجهه بس من خياله مبين ضخم سمعت صوته ضحكته بس بسرعه طبيت جوة يشوفني جراح ويسويلي مشكلة غسلت المطبخ ونمت ثاني يوم الصبح
= كعدي تهاني اخوج جراح يريدج
- شيريد
= موتردين تروحين للسوك
- اي اي
لبست وكشخت بالطريق أخوي سلم على ولد ضخم يخبل عيونه خضر من كال مؤيد اني فز كلبي مااعرف ليش هو يحجي وي أخوي ويباوعلي متعجب
جراح- يلا نترخص إحنا
مؤيد= محتاجين شي الله عليك
- لا مشكور تسلم يلا في امان الله
بقينا واحد يبتسم للاخ هو يباوعلي بإعجاب من رجعنا بقيت أفكر بيه شكد حلو طول وهيبة وجمال وفوكاها رزانه قبل إذا ولد يشوف بنية وتعجبه مو يروح يرقمها ويضلون إتصالات ومحادثات للصبح وأقل مشكلة واحد يعوف الثاني لا جان الولد من تعجبه بنيه كبل يجي يخطبها وبعدين يتعرف عليها يشوف شبيها مابيها ورى أسبوع سمعت جراح يحجي وي امي واخواني بصوت ناصي وكفت يم الباب وسمعتهم
جراح- يوم إنتي شتكولين
= الراي رايكم وإحنا هم نسالها ونشوف والله يقدم الي بيه الخير والبركه يبني
- يمه هسة إنتي موافقة إذا إنتي والولد موافقين ومرتاحين لمؤيد خيراً على خير علمود تسألين تهاني تشوفيها موافقة لولا
= ان شاء الله يمه اني اصلي استخارة واكولك
- اي يمه صلي وكوليلي
فرحت اي واخيراً راح أتزوج واحد حلو وغني يعني اتدلل وانغر واتكبر براحتي اي من حقي اتكبر جمال منو بجمالي سويت روحي دخلت عليهم فجأة
= اسويلكم جاي
- اي والله مال جاي
= صار
سويتلهم جاي وشفت امي كعدت تصلي استخارة إخوتي موافقين كلهم لأن يعرفونه كلهم بس اقرب واحد اله أخوي جراح خلصت امي صلاتها
= تهاني يمه روحي صبيلي جاي
- صار يمه
ماتريد تحجي كدامي لأن بعدهم مفاتحين الموضوع وياي وكفت يم الباب اسمعها
= الاستخارة زينه بس يمه هم لازم نفكر هذا زواج مو لعب
- يمه مؤيد عشرة عمر وياي
= ادري يايمه بس شوفه خاف عنده سوالف مناه مناه خاف يعني
- يمه حتلو عنده إحنا شباب وكل واحد عنده طبع موزين هسة إحنا ولدج هم بينا عيوبنا مامعصومين من الخطأ والولد من يتزوج يتغير ويعقل وهو إذا عنده سوالف مكسرة جان ما قرر يتزوج بقى متونس بسوالفه
= ميخالف هم أسأله اسأل عنه شوف شبيه مابيه
- صار يمه اوصيه واني صديقه يعني دايما وياه لو موزين جان رفضته قابل ادمر حياة أختي بس علمود ارضيه لا طبعا انتي ارتاحي واتطمني مؤيد خوش رجال
= ان شاء الله خير بعد شوي اكعد وياها واشوف رايها وإذا وافقت يمه انت كول لصاحبك هلا بيه ومرحبا خليتوكل على الله وإذا ماوافقت بعد ماكو نصيب
- ان شاء الله توافق
امي ورى شوي صاحتلي
= تهاني تعاي وسدي الباب وراج
- صار
سديت الباب وكعدت يمها
= يمه جايتج بشغلة اريد اخذ رايج
- بشنو
= مؤيد صديق جراح خاطبج من اخوج ومن كلام اخوتج مؤيد خوش ولد وحباب
- اي يمه
= إنتي شنو رايج براحتج محد يضغط عليج فكري زين
- يمه موافقة
= هههه إحنا بزمنا البنية تسكت وماتحجي حتى ماتكول نعم شو أنتم غير حيل
- يمه تعرفيني صريحه مااحب اللف والدوران غير اكولج الصدك
= يمه بعد بكيفج
- الولد عنده فلوس متمكن شكله كشخه باجر من امشي وياه افتخر بيه افتخر لأني ماخذة واحد بجمالي يعني واحد يستحقني
= لا تكولين هيج الزواج مو فلوس تفكيرج غلط الزواج مسؤؤلية تحبين رجلج تهتمين بيه راح تكونين عائلة جهال وعيال يمه الزواج مو مثل تفكيرج ياجمال يافلوس
- يمه ادري أنتم تفكيركم قديم هسة الزواج ينجح بس إذا الرجال عنده فلوس تريديني اخذلي واحد فكر اشبع ضيم من وراه لو واحد منتف وخايس خلقته مكلوبة علمود التسوى والماتسوى تعيب عليا
= ماادري شكولج انتي صفي نيتج ترا النية السيئة تخلف نية أسوء واني وصيتج يمه اريدج ترفعين راسي
- ان شاء الله
امي حجت وي إخوتي كالتلهم أختكم موافقه وبسرعه صارت الخطوبة والعرس تزوجت مؤيد دللني دلال كمت البس أحلى لبس وما جان ناقصني شي كل شي موفرلي هو طبعه كريم زيادة عن اللزوم حبلت بابني لؤي بنفس ليلة العرس وهو فرح وطار من الفرحه وكل شي اتمناه سواه اني تكبرت وتجبرت عندي صديقه شكلها موحلو من جنت صغيرة اعيب عليها تضل تبجي ومن كبرت محد تزوجها جنت أحاول ابينلها شكد اني محظوظه صار عندي لؤي واجتي وراه رنده ريما قيصر أحمد وأطياف مااعتبرها بنتي من شهر انطيتها لامي هي ربتها أخوتها محد يعرف هي اختهم بس رنده بنتي الكبيرة
...يتبع
