# البارت ١٢
#زهراء_محمد_السراي
# شارع حيفا
*********
🔶 #المرض_كفارة_للذنوب:
▫️عن عبدالله بن مسعود - رضي الله عنه، قال:
📝 #قال_النبي ﷺ :
" ما من مُسلمٍ يُصيبُهُ أذىً، مرَضٌ فما سِواهُ، إلا حَطَّ اللَّهُ سَيِّئاتِهِ، كما تَحُطُّ الشَّجَرَةُ وَرَقَها "
📕 صحيح البخاري (5667)
لــمــاذا الــحــزن يــا قــلــبـي؟
ألــيــس الــمــوعــد الـــجــنـة...؟!
طيبة
من صارت حادثة خالي مؤيد
الكل راح للمستشفى
بيبي راحت بقيت ابجي عليها
متعودة وين ماتروح أروح وياها
اليل كله مانمت
هم من الخوف وهم لأني متعودة ماانام إلا بحضنها
بذاك اليوم
هواي بجيت
ومن تعب البجي غفيت
كعدت الصبح
اخذونا لبيت أهلي
محد أهتم بية
إذا اكلت أو لا
كل شخص مهتم بنفسه وبعائلته
بقيت للظهر بلا ريوك
وضايجه والدمعه بطرف عيني
اريد بيبي اشتاقيتلها
رنده جانت مشغولة كلش ومالاحظت وجودي
بس بعدين سألتني ليش ابجي
وإذا ماكلة او لا
مشطتلي شعري
وسوتلي أكل
رنده الوحيدة من بعد بيبي أحس بحنانها
كلبها طيب أحبها اموت عليها
احسها مثل امي
ماشفت اي حنية بطفولتي من امي نهائياً
رنده هي امي وأختي بنفس الوقت
هي أمنا كلنا
هي صاحبة دور الأمومه
امي دورها بس جابتنا للدنيا
ومااعرف تحب إخوتي وإخواني
لو مثلي تكرههم
اني أشوفها مدللة رودينا وتحب إخوتي
بس اني معاملتي تختلف جذرياً
ولا كأني بنتها
كلش كاسرني هذا الإحساس
مرات اتأمل وأفكر
أحس نفسي مثل اليتيمه
ويمكن أسوء حال من اليتم
امي وابوي عايشين بس ما حاسة بوجودهم
ولاهم مهتمين لوجودي
الظهر رجعت بيبي
حضنتها حيل حتى ماخليتها تصلي
ولاعفتها دقيقه كلش احبها واشتاقلها من تغيب عني لو بس لحظه
تغدينا والعصر بيبي كالتلي حروح لخالج
كعدت بالساحه منتظرة امي تجي
حتى كلهن يروحن سوى
شوي ونسمع صراخ خالي مؤيد
بيبي صاحت يمه إبني
عبالها تتخايل
بس انصدمنا خالي بدمه كدامنا يبجي ويصرخ
وحده شلون طلع من المستشفى انصدمنا
اجانا مفزوع وخايف يصرخ حضن بيبي
الجدة-:يمه شبيك يمه مؤيد شبيك
يحجي بالكوة
البجي ماله يكطع الكلب
مؤيد-: جنت نايم فزيت من النوم انتبهت على ناس يمي هواي كاعدين بصفي يلطمون ويصرخون يكولولي اكعد كوم ماتت امك تعزيت تصخمت مؤيد كوم اكعد
يمه كلهم يبجون يكولون ماتت
اني كمت شلعت المغذي وكل شي وخرت الصوندات من خشمي واجيت أركض يمه شبيج
كالولي ميته
يمه لاتموتين
يبجييي بحركه موطبيعية
الجدة-: يمه شلون تطلع خلينا ناخذك للمستشفى شوف الدم
خالي تخربط بس بيه حيل شوي يحجي وي بيبي
نيمته على رجليها وتبجي
وهو يبجي يكوللها يمه لاتموتين اني أموت بدالج
كام ينزف بطنه كلها دم بيبي ايديها تلطخت
غمض عيونه وصرخنا كلنا
بيبي وامي وريما اخذنه بسيارة الإسعاف
مدينه الطب قريبة علينا
من وصلنا للمستشفى الدكاترة انصدموا شلون خالي مؤيد طلع بدون مايدرون ومحد منتبهله
دخلوه للانعاش بس وحوههم ماتبشر بخير
خالتي يسر امي تعاركت وياها
تهاني -: صدك جذب هاي عود مخلينج يمه تنتبهين عليه شلون يطلع من المستشفى وإنتي ماعندج علم لعد المن مخلينج يمه في تنتبهين عليه
يسر-: والقرآن من رحتوا مؤيد نام عفته بالغرفه ورحت اسأل الدكتور على حالته ردت اعرف شوكت نطلعه من المستشفى
هواي رزلوها لحد ماكامت تبجي وتلوم بنفسها اباوع عليها كامت تلطم على وجهها
بيبي تتوسل بالدكتور
كالولها مابيه شي الدكتور انقهر عليها كلش وقنعها تروح للبيت ترتاح لأن هبط ضغطها وبأي لحظه توكع
امي سألت الدكتور عن حالة خالي
تهاني-: دكتور الله يخليك كوللنا مؤيد شنو وضعه ومنو ذولي الناس إلي يصرخون يمه معقولة كل هاي الأمور ماكدرتوا تنتبهون عليها مستشفى شكدها شكبرها
الدكتور-: أختي اخوج بحالة تسمى صحوة موت
المريض يصير كل حيل والطاقه بيه وماكو اي ناس هاي مجرد خيال واوهام أعتذر اكول هالشي واقهركم مساعه ماكلتلج كدام والدتج لأن المرة مريضه
اخوج نزف دم هواي ونبضه بطيء جداً والأعمار بيد الله
ادعوله وضعه كلش تعبان للأسف
بيبي رجعت للبيت فرحانه عبالها خالي حالته الصحية زينه
صلت صلاة الشكر
وحمدت الله وشكرته على كل حال باليل بيبي بس تبجي محد تعشى
ثاني يوم الصبح الوضع هادىء اي واحد من خوالي يجي من المستشفى يكول لبيبي زين مابيه شي حتى يطمنوها
بس وجوههم غير شي تكول
مايبشرون بخير
*********
أبُوح بِشوقٍ سَرىٰ في دَمِي
إلىٰ أفضَل الخلقِ كلهمِ
إذَا افتخَروا برِموزٍ لَهمْ
لَنا الفَخرُ في الرَّجلِ الأعظمِ
فَكَم مَسَّهُ الهَمُّ مِن أجلِنَا
وَكَم قَد تَحَمَّلَ مٍن ألمِ
إذَا ضَاقَ كَونُكَ يومًا علَيك
فَصَلِّ علىٰ المُصطَفىٰ الهَاشِمِي #ﷺ
ريما
رحت لمدينه الطب اني وأمي الكل كالي رجعي للبيت ساعدي رنده لأن هواي خطار عدنا وكرايبنا كلهم اجوي بس بكيفي ماقبلت
بيبي ومرت خالي مؤيد رجعن للبيت بعدما الدكتور
طمنهن بالجذب
بقيت بس اني وامي
الدكتور كال وضعه موزين
بهالوقت عمري جان بين ال١٧ وال١٨ بس كل شي أعرف وافتهم
ضليت بالمستشفى
وثاني يوم الظهر خالي مؤيد انطانا عمره
الدكتور اجه لخوالي كاللهم البقاء لله
بدأ الصريخ والعياط
اني فقدت طلعت من المستشفى ابجي وأصرخ
الناس كلها تباوع علية
مريت من العماير من كد القهر رجلية ماشالني
وكعت على ركبي بالعمارة وكمت الطم على رجلية وأصرخ بعلو صوتي
*********
حاولت وَصفًا لِفَقدِ الخِل فَاعتَنَقَتْ
عَينِي الدُّموع وَراحَ القَلبُ يَختَنِقُ.. ! 💔
#شهدائنا 💔
رنده
الظهرية سويت غدا محد حط لكمه بحلكه
بيبي كاعده على نار
فجأة سمعنا صوت صريخ من العمارات السورية الي ورانا
هاي العمارات فارغه ومهجورة إذا واحد صرخ بيها يصير صدى متكرر الصوت يصير مرعب مثل المكبر مال الجوامع الجبيرة
العمارات صايرة مثل النفق مسافه صغيرة بس اي شخص يصرخ صوت مالته يتردد وراه لأن فارغه ومهجورة الصوت إلي نسمعه بس
مات ماااات
من ركزنا بالصوت عرفناه صوت ريما تبجي وتصرخ بصوت عالي
خالي مؤيد مات ولكم مات وراح بعد مانشوفه حتى خالي مؤيد هم مات
على صوتها كل الناس طلعت من بيوتها
بيبي وخالاتي ونسوان خوالي طلعن بالشارع بطرك الثياب حافيات بيبي طلعت وعثرت بالباب الكرايب كامن يلطمن بيبي تشمر على رأسها تراب
صار المشهد مأساوي ماينوصف حتى وصفه صعب
ريما بصوتها كطعت كلوبنا محد استوعب خالي مؤيد الي البارحه يضحك ويانا ويسولف
يموت!
سوينا فاتحه ببيتنا ثلاث أيام ناس تجي وتروح خوالي انهد حيلهم وانكسرت ظهورهم هوسة الزلم نصبوا جادر
بيبي بس تبجي وتنعى
تكول صار خامس واحد ادفن من ولدي شتحمل ياربي إذا هذا إختبار منك ياربي كون آخر إختبار تختبرني بيه
دايماً تردد هذا الكلام
بحركه وقهر تحجي وي رب العالمين
مرت ثلاث أيام
الحزن والأسى مخيم علينا الناس والكرايب شوي شوي بدوا يروحون صارت السبعه سويناله سبعه بس بيناتنا ثواب لأن ماعدنا فلوس وتكاليف
مرت خالي مؤيد كامت تخاف من بيتها وماتنام ليلها أبد
خالي يتخايللها بكل مكان
كامت تنام يم بيت جدي بس لأن ميصير عدة لازم تلتزم ومايشوفونها حموينها
كم يوم وراحت لأهلها باعت شقتها
محد جان متوقع نفقد خالي مؤيد بهاي الطريقه
رجعنا لقضية جسام بيبي سمعت أكو مختطفين رجعوا لاهاليهم وكالت بلكي جسام هم يرجع وضلت هي وأمي تدور عليه
وام جسام هم مناك وهي يم أهلها بالفلوجه تدور عليه بس ماكو
خلصت سنه ٢٠٠٥ ختمناها بمآسينا وعذاب وقهر
عبالنا من ندخل سنه ٢٠٠٦ يتغير كل شي
بس بدينا بشي أسوء
...يتبع
لاتنسون التصويت إذا عجبتكم القصة أو البارت ❤❤❤
