من جنت بالمدرسة دائما طريقي على السوك وحتى من صرت معلمة ..
من جنت طالبة والدراسة لاعبة بخلقتي أمر على العطار اشتري منه وهذا العطار كلش يرتاحلي نص الاغراض ينطيهم الي بلاش من دون صديقاتي وانحرج كلش يكولي لأن تعبانة على نفسج كلش ودائما يذكر حديث لو قول للإمام الصادق عليه السلام عن المحصنات واكرامهن
من كد كرمه صرت استحي اشتري منه واغراضه جانت اصلية كلش
ولأن مااكدر ارده عرفت اهلي واقاربي كلهم عليه حتى يشترون منه ويروح مني الاحراج وصدك عماتي واهل صديقاتي كلهم صارو يشترون منه وينطيهم وين الشغلة الإصلية يعني اغراضه صدك عجيبة وقوت علاقتي بيه وسولفلي قصته وشلون ولده شالعين كلبه وعاقين واحد منهم ضابط وسافل والباقي على كولته عرك ومرك ودياحة كلش كارههم ومن يحجي ويتذكرهم عيونه تنط ولا أنسى ردات فعله واني أسأله وهو يجاوبني ويكول أتمنى عندي بنات ولا ولد الناس تدعي علية وتسبني بسببهم
الرجال جنت ارتاحله وكلما أروح للسوك اشتري منه أشياء تجذب والدعاء او القران الي اسمعه بمحله يخليني استرخي ومن غير ريحة البخور الطيبة
إلى ان بيوم من الأيام رحت للسوك اني وعمتي لكيت محله معزل وضليت اسأل عنه واخيرا كالولي انتقل لغير محل ومن لكيته إلا أرتاح كلبي وجنت خايفة لا فجأة يختفي لأن جان حزين واهل السوك متعاركين وياه بسبب ولده ويريدون يطردوه وبالفعل صار هذا الشي السيء واختفى العطار وبعد ما شفته كل ما اروح للسوك اسأل عنه ونسوان وياي الكاهن مقابيل محله همات يسالن ويكولن كل علاجنا يمه وكل وحدة تذكر شلون تعالجت باعشاب هو انطاها إلها
ايست من السؤال وما عرفت وين يشتغل ووين محله ! . وضليت اذكره بكل دعاء واتمنى ولده ما يأذوه . #إنتهت
#العطار
#زهراء_محمد_السراي
#قصص_اهلنه
