#البارت ٣٦
*********
رفعت
اتفقت وي امي تدورلي مرة اتزوجها وكلما نروح نشوف وحده امي تطلع ألف عيب بيها الكل ماموافق لحد مامليت لو اجيبلهم ملكه جمال هم مايقبلون لأن يحبون درر كلش
لكيت الحل الأنسب أتزوج زينب منها اربي أيتام ومنها أضمن أنه هي تكدر تخلف ومضمونه
أهلي كلتلهم حسيتهم وافقوا ودرر مخلصتها بجي وحتى اني بس اكابر شي بداخلي يشبه الإنتقام
إذا هي خانتني أقل شي اسويه أتزوج عليها حتى ارضي كبريائي وغروري البائس
اتفقت وي الكل وأخذوا رأي زينب ووافقت بصعوبة وهم بقت تبجي أولا لأن صعب تتزوج وهي تحب زوجها المرحوم وثانياً هي ودرر كلش صديقات وبيناتهن محبه قوية شلون راح تتزوج رجلها بس بعدين اقتنعت علمود أطفالها
حجيت وي درر
رفعت-: باجر أخذ زينب ونعقد بالإمام الكاظم( عليه السلام )
درر-: الف مبروك بالرفاه والبنين
رفعت-: عيونج حمر شنو باجية
دموعها نزلن على خدودها وتكول
درر-: لا ماباجية ولا راح ابجي عليمن شكو شصاير ميت أحد لاسامح الله ماعاد يهمني شي
رفعت-: أوك أوك اعصابج اهدأي
درر-: ماابجي على شخص بعد مااريده أنت أخذت قرار مصيري بحياتك قرار مهم وراح تأسس مستقبلك وبصراحه اني هم اتخذت قرار وحبيت اكولك عنه
رفعت-: شنو؟
درر- من تتزوج زينب راح ننفصل ولأن ماعندي بيت أعيش مانكدرنتطلق بس عادي أبقى على ذمتك بدون ماتدنالي وتنساني ولا كأنه اني زوجتك
رفعت-: أي بلة وبعد
درر-: أخذ شهادة السادس واتعين عندي ذهب ابيعه وااجرلي بيت وحدي بعدما نتطلق أكيد واحتمال أشتري بيت مو أأجر
رفعت-: ما شاء الله طمووحج جبير واحلامج خيالية منيلج فلوس إنتي شتحجين
درر-: أهم شي تفهم قراري تتزوج زينب تنساني تخلص كل مصالحك وياي بما أنه مااكدر اجيبلك أطفال فما راح افيدك بشي وشي ثاني حسب ماتكول اني خاينتك هذا هم سبب قوي يخليك ويسهل عليك أنك تهجرني وننفصل
رفعت-: ليش من أتزوج زينب اهجرج
درر-: زينب راح تلبيلك كل طلباتك راح تخدمك وتجيبلك أطفال والبنت مؤدبة وماتخون شوف الفرق بنفسك جاي اسهلك كل شي
رفعت-: أوك بس تبقين على ذمتي مااكدر اعوفج تتهجولين بالبيوت حايرة وين تعيشين
درر-: منو كالك احير راح اخابر زيدان واتفاهم وياه على حلال أبوي الله يرحمه لأن تركلي هواي وراه بس الظروف خلتني أنسى
رفعت-: ومنو كال زيدان يوافق ينطيج حقج
درر-: هذا الشي خليه عليا إذا ماقبل ابيع الذهب واوكل محامي يطلع حقي ماراح اسكت عن حقي مناه وهيج تأذيت بما فيه الكفاية صار الوقت المناسب إني اكوم على حيلي واعين نفسي مو لأن ماعندي أهل وسند معناها أبقى مذلولة للرايح والجاي وكلمن كام حدد مصيري مناه وهيج اني إلي ادير حياتي
بقيت مصدوم منين اجتها الجرأة والقوة شنو طلاق شنو انفصال
رفعت-: ماكو طلاق الغي الفكرة من راسج
درر-: لكل حادثٍ حديث
عقدت لزينب امي جانت خايفه على درر تنقهر وكالتلها تروح كم يوم يم بيت منتظر بس ماقبلت
رجعنا من الإمام لاكتنا امي بس باركتلنا ماجانت فرحانه درر هم باركت
كنت حزنان أكثر منها هو اني حتى أطفال مااريد اريدها بس هي
غرفتي اني ودرر بقت لدرر وبقت ملابسي واغراضي بيها
كنت مستحي وخجلان من زينب طول عمري معتبرها اخت ولامرة نظرتلها على أن تكون زوجتي
دخلنا للغرفة أبنها بعده يرضع صغير وبتها متعلقه بيها كلش اجتني امي كالتلي زينب لاتاخذها هسة عدها عذر شرعي ورى السبعه
أحس هم وانزاح مني كنت شايل هم مااكدر اباوع بعيونها انوب انام وياها حاير شلون اتزوجتها واني معتبرها اخت مااكدر الزم ايدها أبنها بقى اليل كله يبجي هي بقت لابسه ربطتها ولابسة جواريب تستحي مني حتى من ترضع أبنها تختل ألف ختلة
حسيت باحراجها مني وحتى من تحجي وياي كل شوي تغلط تكولي خويه
نامت هي وأطفالها طلعت من الغرفه مختنك ضايج بشنو ورطت نفسي طلعت بالحديقه أشتم هوى نظيف
ورثت جكارة وكمت أدخن
ساعه نص ساعة نعست دخلت انام متعود على غرفتي القديمه وشفت الضوى مشتغل معقولة لهالوقت سهرانه
فتحت الباب لكيتها نايمه عالجرباية وحاضنه قميصي
تمددت بصفها
يمكن هسة عرفت شنو معنى الحب الحقيقي أنه محبوبك شكد مايغلط تبقى تحبه وهذا الشي صار وياها ووياي من خانتني صدك ضربتها ونهرتها بس ماكرهتها هي من اتزوجت عليها ماكرهتني والدليل حاضنه قميصي وفتحت فونها كله صور إلي
بقيت اتلمس بوجهها أمسح دموعها من خدها
مدري إحنا جاي نعذب بأنفسنا لو رب العالمين جاي يختبرنا
حضنتها من ظهرها وغطيتها
درر'؛؛ ااهممم
رفعت-: أش هذا اني
درر-: حتى بالحلم ماعايفني
رفعت-: هههه تحجي وهي نايمه
بقت تحجي بنومها مافهمت منها غير كم كلمه
تالي بقت تشهك وهي نايمه وتذب حسرات كسر كلبي هذا الشي شلون شخص يبجي بحسرة وهو نايم حتى بنومتها مامرتاحه ماهان عليا أشوفها هيج كعدتها من نومتها
درر-: رفعت؟؟؟
رفعت ': أي إني كعدتج
درر-: شعندك هنا روح لمرتك إحنا شنو جان اتفاقنا نسيت شبسرعه
رفعت-: يا إتفاق
درر-: من تتزوج تعوفني
رفعت-: شنو اعوفج غير مرتي
درر-: حتلو ماتتقربلي يعني ولاتجي صوبي
رفعت-: شنو حجي الأفلام هذا
درر-: اوف إحنا مو اتفقنا شكو جايني امشي روح
رفعت-؛ تطرديني
درر-: أي
رفعت-: هو إنتي شنو شايفه نفسج أصلا اني مااريدج مو إنتي
درر-: خلص أوك أطلع من الغرفه
رفعت-: لاتحلمين اجيج بعد مو كم يوم وتجين تتبجبجين لأمي عمه فدوة حاجيه
درر-: عود من أسوي هيج تعال عاتبني
رفعت-: لاعبالج كاتل نفسي عليج بس كلت خطية اجي أشوفها
درر-: هياتني شفتني كل شي مابيا عايشة مااموت
البجي والقهر ماناوي يقضي عليا هسة
رفعت-: لا تبجين
دنكت رأسها
اني طلعت من الغرفه
ثاني يوم الصبح سبحت وطلعت انشف براسي
رفعت-: صباح الخير
ام رفعت-: صباح النور تعال يمه تريك وين زينب
باوعت لدرر بمكر
رفعت-: نايمه
درر تتظاهر إنها مامهتمه وعادي تاكل وتضحك وتتشاقه وي امي
رفعت-: شو حتى محد باركلي
كلهم سكتوا وامي بقت تسولف وي درر بس هالة
هالة-: ألف مبروك يبعد اختك بالرفاه والبنين منك المال ومنها العيال أحسن مااختاريت جنتنا زنوبه
رفعت-: أي طبعا قابل أي وحده أختار
طول الوقت نظراتي عليها وهي ولا مهتمه متجاهلتني ولاحطت عينها بعيني
رفعت-: هالة جيبيلي قميصي
هالة-: ياقميص
رفعت-: الأسود
راحت هالة جابتلي قميص أسود بس مو إلي البسه دائما
درر-؛ موهذا
هالة-: شنو مااعرف ذوق أخوي جاي تعلميني بيه
درر-: مايلبسها هذا يضوج من الياخه مالته
درر جابتلي القميص
واني متعود هي تلبسني صوجها علمتني على دلالها واهتمامها
درر-: هاك هذا كويته البارحه مابيه شي
رفعت-: لبسيني
درر-: شنو البسك شعليا اني خلي زينب تكعد وتلبسك
عافتني وراحت للغرفه رحت وراها
رفعت-: شنو إنتي عود شراح تستفادين من تصرفاتج هاي
درر-: أي تصرفات
رفعت -: شنو شو متجاهلتني مامهتمه تزوجت عليج وعندج عادي البارحه نمت وي غيرج راح أسس عائلة
درر-: أوك بالعافية عليك
رفعت': ههه
درر-: ممكن تطلع من الغرفة أريد انظف
رفعت ': عوفي كل شي من ايدج
درر-: شتريد
رفعت-: شنو شاريد لبسيني سوي الي كل يوم تسوينه لو اعلمج
درر-: ترا هو قميص انت لبسه مو طفل صغير والبسك
رفعت-: لعد ليش كنتي تلبسيني وكل شي بيدج تسويلي
درر-: عادي وشنو يعني ماجاي أفهم عليك خلص روح
رفعت-: باوعي بعيني من تحجين مو دايرتلي ظهرج وتحجين
درر-: رفعت شبيك روح لمرتك روح لزينب المن جايني وتحجي وياي إحنا علاقتنا إنتهت ماتفيد هاي الأمور التافهه بعد بأي شي
رفعت-: إلا إذا كنتي ناوية غير نيه
سكتت وتجاهلت كلامي شغلت نفسها بتنظيف الغرفة ومن شافتني واكف بعدني لبستني القميص بس ماتباوع بعيوني أبد وتتلفت
مشطت شعري وحطت عطر بايديها ومسحت على ركبتي ولحيتي
وحضرتلي ريوك من جديد لأن ماتريكت زين
درر-: اني رايحه محتاج شي بعد
رفعت-: وين؟
درر-: ادرس عندي إمتحانات
رفعت-: ابقي كاعده احتمال اريدج
درر-: أبقى كاعده لحد ماتروح ؟
رفعت-؛ أي
درر-: كل شي يمك خليني أروح ومن تريد شي صيحلي اجيك
رفعت-: لا وجيبي موبايلج خلي أشوف
درر-:مابقى شي وترتاح من شكوكك بس ننفصل بعد ماتهمك هالامور عسى ماكل شي اسوي ماراح يهمك اي شي يخصني
رفعت-: ههه تحجين وكأنما منتظرينج ناس يستقبلونج بالأحضان ماكو أحد حيوكف وياج مثل ما الكل أتخلى عنج بوقت صعب فمو هسة من تزوجتي وتطلقين يوكفون وياج
درر-: منو كالك اني بحاجه ناس إذا تتذكر كلتلك أعيش وحدي مو وي أي شخص ولا اني بحاجه ناس يستقبلوني بالأحضان
رفعت-: راح اخليج هالفترة تحلمين بكيفج وأشوف وين تاليها
درر-: وشي ثاني لا كل شوي تحاول تثير غيرتي ترا أعرف كل شي
رفعت-: شنو تعرفين ؟
طلعت من الغرفه ووضعها ماعاجبني وكلش مستفزة
*********
غيداء ( خلال السنتين)
بعد المصيبة إلي صارت وي درر كل الناس تجبرت عليها واليسوى والمايسوى كام يحجي واني وأمي مشينا على حجي العالم وصدكنا الإشاعات ونسينا هي درر طول عمرها ماخشنت كلوبنا بكلمه ومن الصغر ويانا عشرة عمر بس صار الصار طردناها من بيتنا
وراحت مانعرف عنها شي بعد الكلام الأخير الي كالته بقى ضميري يأنبني وضجت من نفسي اني صديقتها واعرفها أكثر من امي عاشرتها سنين وقضيت طفولتي وياها ماكان لازم أتغير عليها يجوز امي مرة جبيرة وتتأثر بالكلام وخصوصاً بعد حادثه زهير ومرته القذرة هذا الشي خلانا نقسى ومانثق بأي بشر وبالذات امي كلش تغيرت وصارت قاسية حتى عليّ من سمعت بعلاقتي القديمه ضربتني
غيداء-: يمه الله يخليج اسمعيني والله من زمان هالكلام
ام غيداء-: ولج غيداء إنتي تسوين هيج واني احجي عالناس واكول بنت فلان هيج وهيج وطلعتي إنتي مثلهن ولج تريدين تموتينييي
غيداء-: فدوة كافي السالفة صارت وخلصت من زمان بعد مااعيدها
بخشبه تضرب بية وحبستني بغرفتي
غيداء-: يمه خلص والله آسفه مااعيدها
ام غيداء-: دوام ماكو وطلعه من البيت تحرم عليج وتبقين بالغرفه محبوسة عقاب الج وأول واحد يتقدملج غصباً ماعليج تتزوجينه
غيداء-: يمه لا تسوين بية هيج
بقيت ٣ أيام بغرفتي بس ابجي ومتكئبة لحد مازوجه أيمن حجت وياي
- غيداء اخوج دزاني عليج
غيداء-: شنو يريد مااكدر احجي وي أحد تعبانه كلش
- قبل فترة أيمن تكلم وياج بموضوع أخو الضابط الي يريد يتقدملج
غيداء-: أي كالي فكري حتى الموضوع ناسيته ومامفكرة بيه
- اي من صارت الحادثة مالت إبن عم درر أيمن حجى وي الولد وكاله أجل الموضوع عيب من الجيران
غيداء -: أي
- والبارحه الولد محاجيه من جديد أيمن كالي روحي شوفي شنو رأيها
غيداء-: ماادري
- عمتي من شوي كالتلي كوليله موافقه حتى قبل لاتشوف الولد وكانت عصبية اني ماحبيت استعجل واكوله كلت اجي اكولج وانطيج خبر تفكرين براحتج وحتلو تشوفين الولد وتتفاهمين وياه
غيداء-: سوو الي يريحكم
- ماكو شي اسمه الي يريحنا إنتي راح تعيشين وياه وتحددين إذا هو حيكون مسؤؤل عن راحتج أو لا حبيبتي الزواج عشرة عمر لازم تفكرين بهدوء وماعليج بعمتي اني احاجيها
غيداء -: شنو تحاجيها إذا هي تكوم وتكعد تغلط عليا وتسمعني كلام يسم البدن عبالك مو بنتها وحده من الشارع
- اتحمليها امج نفسيتها تعبانه
غيداء-: لا رب العالمين راد يعاقبني مثلما ما حجيت على درر واذيتها بكلامي واتسلطت عليها الله سلط عليا امي كما تدين تدان هذا كل الموضوع واستاهل الي يصير وياي مااعرف شلون طاوعني كلبي احجي عن صديقتي بالعاطل واجرحها بكلامي وهي يتيمه والله والرسول موصي باليتيم اني شسويت رحت تجبرت عليها بالزايد فوك ماهي عدها مصايب مااكدر اواجه نفسي شلون سويت هيج
- الله كريم لتكولين هيج عن نفسج
غيداء-: رب العالمين راح يعاقبني وماراح يسامحني أبد
- الله أرحم الراحمين
غيداء -: طردناها من البيت وحتى مانعرف وين راحت بنت وحدها لا أهل ولا سند وين تروح اوف ياربي
- الله مايعوف أحد من عباده
غيداء-: الله يكون بجانبها وين متكون
- حبي حاولي تفكرين بالي كلتلج عنه
غيداء-: ان شاء الله
...يتبع
