#البارت ٤١
#زهراء_محمد_السراي
#توأمي- الملعون
*********
منير
... خلال الثلاث سنوات ...
بعد إلي صار وي ابو رياض
نقلوه لأمريكا
ونسوا موضوع الطفل
ورجعت تعقدت المشكلة من جديد
كلما نحاول نحل المشكلة
نرجع للصفر
راحوا لأمريكا
وماانطوا حق صبا وابنها من الميراث
وهذي اتفاقية بين رياض وامه
ورى إلي صار بيومين
ماتت خالتي ام صبا
وصبا صارت عدها ولادة مبكرة بالشهر السابع
ابوي عرف بحملها وطردها من البيت
وكال اي شخص يوكف وياها يحسب حسابه هو هم مطرود
اتفقت وي أمي وعقدت على صبا
واضطريت اكتب اسم محمد بإسمي
لأن ماكو اي حل ثاني
ابو صبا انهزم
وورى كم شهر لزمته الشرطه لأن عليه هواي شكاوي
إسراء من عرفت بزواجي من صبا زعلت
وعبالها الطفل مني
راحت لأهلها وبقت اسبوع عدهم
اهل إسراء حجيت وياهم وتفهموا موقفي الناس
جابت اسراءاول بنت
بسنه ٢٠١٦
سميتها عهد مثل ماكنت متفق وي إسراء
كنت فرحان بس هي لا
لأن ماتحب خلفة البنات
أبوها حاول يقنعها بس بقت معندة ودزت بنتي وطلبت الطلاق
حكيت إلي صار لصبا
منير -: رحتلهم طلعلي أبوها وكالي ماتقبل تطلعلك ولا تريد تحجي وياك
انطاني بنتي عهد
تدرين شنو كال !
كالي إسراء ماتقبل ترضعها
الطفلة عمرها شهر شنو ذنبها تنحرم من الرضاعه
صبا بنتي مريضه وماتتقبل اي حليب
ابو إسراء كال ماضل حليب ماجربوه
صبا -: أني اسفه كل إلي صارلك بسببي
انطيتها عهد لأن كانت تصرخ من الجوع
صبا -:اكدر ارضعها اذا تسمح انت واسراء
منير -: يعني عادي!؟
صبا -: شنو العادي ؟
منير-: يعني قصدي وابنج!؟ تكدرين ترضعيهم اثنينهم!
صبا -" اي عادي اعتبر نفسي مخلفة توأم واكسب أجر
ومنها اردلك معروفك
منير -: اشكرج صبا
رضعته وورى دقايق عهد سكتت ونامت
مر شهر
شفت صبا مهتمه بعهد مثل بنتها واكثر
خلال الشهر إسراء ولا اتصلت ولا تطمنت على بنتها.
كلش نزلت من عيني
أني وصبا كلمن بغرفة
وحتى كانت كدامي تلبس حجاب
يعني ولا كأنما متزوجين
ابوي قطع كل علاقته بية ومنع أمي تتواصل وياي
اهل صبا بالضيم
مراد وام إسراء عايشين يم رجل سعاد لأن ابو الايجار طردهم
عمام صبا محد مهتم
كانت عايشة يمهم امهم ( الجدة) بس لأن كبرت وخرفت
وتقريبا صارت مثل المخبلة
لأن حسب ماسمعت صار يتخايل الها كل الأطفال البنات إلي موتتهم عن طريق الإجهاض
يعني قبل كانت المرأة إلي تاخذ سونار وتطلع بيها بنت
تجي للجدة وهي تجهض الها الطفل بس لأنه بنية
وهواي امور وجرايم مسويته الجدة
اودت بحالها تصير مجنونه
طردوها اولادها وبناتها بالشارع
ورحم بحالها رجل سعاد
وخلاها تعيش وياهم بالبيت
صبا هم قطعت علاقتها وي أهلها خوفا من المشاكل حتى أبوها وعمامها مايعرفون بمكانها
هيج كان حالنا
حال صعب
أني بسبب الظروف حالتي المادية صارت ضعيفه
صرت اشتغل كل شي
أعمال حرة
يوم ابيع ملابس اطفال بالسوق
ويوم حمّال
ويوم منظف
وأكثر شغلي عامل بناء
بيوم صبا كالتلي
صبا -: أني اعرف انت ضايج على إسراء وكله بسببي مانكدر نلوم إسراء وحقها
منير -: بس مو حقها تتخلى عن بنتها بهاي الطريقه وتفتر بالمولات وتسافر بدون علمي
صبا -: ميخالف هاي مشاكل حلوها بعدين
منير أني اريد اريح ضميري مااريد عهد تفتح عينها عالدنيا وماتلكى امها
الام محد يعوضها
والله العظيم اني اكدر اربيها طول عمري واهتم بيها بس تبقى إسراء امها مو أني
البنت تعلقت بية
وبدأت تنطق اسم ماما وتكولها إلي قبل لاتكولها لاسراء
حتى قبل لاتكولك بابا
منير -" والحل شسوي
كل يوم اروح واتوسل بيها اخذ عهد اكول بلكي يحن كلبها بس ماكو فايدة
صبا -: منير أني عندي حل راح يرضي الجميع
*********
صبا
اتفقت وي منير
وكنت ناوية على أمر مهم
منير -: كولي شنو حلج
صبا -: انت ساعدتني وسترت علية ونقذتني من القتل
بس هذا مو معناه تستمر بالصرف علية وعلى ابني
انت مو مسؤؤل
مااكدر احملك ضيم فوك ضيمك
أني من دون أي شيء ضميري يأنبني لأن انت وعهد صرتوا الضحايا بسببي
منير -: شنو افهم من كلامج
صبا ': أني لازم اشتغل اي شغلة واصرف بيها على ابني
منير-: قبل لا تكملين أني ماموافق
ماطول صرتي بذمتي انتهى الموضوع
صبا-: منير رجاءا حاول تفهمني
منير -: شفهم متكوليلي
صبا -: اشتغل خبازة
واغسل فراشات وزوالي
وابيع كبة وكيك راح اسوي حساب عالانستغرام والفيسبوك
لازم ابلش من هذا اليوم
منير -: ومخططه!؟
صبا-: اي اريد اجمع فلوس واضمن مستقبل ابني عسى مااجدي
أني المسؤؤلة عنه مو انت
واول وتالي أني راح استقل ببيت وحدي واترككم
منير -: كلامج مامقبول
فيما بعد
كدرت اقنع منير
وبالفعل صرت اشتغل خبازة والجيران يشترون مني
يدزولي طحين اعجنه واخبزه الهم
ومرات يدزولي زوالي وفراشات وحتى ملابس اغسلهن واكويهن
وناس طلبوا مني اجي اشتغل عدهم خدامه بس منير ماقبل وتعارك وياي
اكتفيت بهذا الشغل
وكدرت باليوم اطلع عشرين ألف ومرات اقل ومرات أكثر
احمد الله وأشكره على كل حال
صرت اجمع واسوي كيك وكبه وانشرها بالفيس
وصاروا عندي زباين مع الوقت
بس ماعندي توصيل
ومرات الناس إلي يطلبون مني هم إلي يجون ياخذون الطلبية
