بارت مفاجئ لعيونكم 😍😘❤
#البارت الخامس
#زهراء_محمد_السراي
#توأمي الملعون
*********
صبا
فتحت الباب
منير !!
جنت أتنفس بسرعه وضربات كلبي متسارعه
منير-: هلو شلونج
صبا-: ها هلو
منير-: شبيج!؟
صبا-: مابية شي بس جنت أنظف وتعبت كلش وكنت رايدة أروح لأهلي
منير-: هو اني اجيت اخذج خالتي دزتني عليج
صبا-: اي اي يلا
رحت وياه هو مستغرب
بس انشغل بموبايله وجان يراسل
ماانتبه علية ولا أهتم
همزين اجة منير
يمكن الام تحس ببنتها بقدرة الله
ولهذا السبب امي دزت منير علية
بنص الطريق شفنا سيارة ابو هاجر
هذا يكون عم إيهاب والاخ الجبير لأبو إيهاب
عنده ثلاث بنات
هاجر الجبيرة تشتغل موظفه بدائرة حكومية أكبر من إيهاب بكم شهر
والبنت الوسطى طيبة هاي مخطوبة ماصارلها هواي
والصغيرة مريم هاي بعمري
منير شافهم سلم عليهم
اني هم سلمت بس جنت مستحية كلش
اصلاًمن يجون اتهرب من شوفتهم
لأن مريم وهاجر يبقن بس يباوعن علية بسخرية
بسبب لبسي الولادي
خالتي من شافتني ماقبلت أروح وعزمتني عدها
وغرضها من هالتصرف إنه اتعرف عالبنات واصادقهن
بلكي اصير مثلهن واتعلم منهن الانوثه والحركات
بما إنه اني عايشه بعالم ذكوري وكل شي ماافتهم من الانوثه
على أعصابي وافقت شكد لحت علية خاطري أبقى
اني من دون أي شي لاعبة روحي من رجل عمتي
وخانكتني العبرة
بذيج اللحظه تمنيت احضن اي شخص وابجي
انهانيت واني مكتفه ماسويت شي
بالكوة نقذت نفسي منه
خالتي انشغلت بالخطار الي اجاها
وكالتلي اكعدي يم البنات
منير راح يكول لأمي حتى ماتقلق
هاجر-: وين وصلتي بالدراسة
صبا-: ثالث متوسط
هاجر-: بالتوفيق حبي نفس مريم هم بالصف الثالث
صبا-: اي
حجت بصوت ناصي وي اختها مريم بس سمعتهن
هاجر-: لو جايبتلها صداريج الي ماترديهن
وملابسج هم خطية
مريم-: ما احب انطي شغلاتي حتى لو مااريدهن
شافني انتبهت لكلامهن سكتن.
هاجر-: إيهاب موجود بالبيت؟
صبا-: مااعتقد يمكن عنده محاضرة
هاجر-: اها حروح انتظره بغرفته
راحت لغرفة إيهاب
من الصغر جانوا الأهل يتشاقون ويكولون هاجر لايهاب
وطيبة لأمير
ومريم لمنير
طيبة ماتحب الدراسة وتحب الزواج ومن شافت أمير عنده قلب وهي أصلا من الصغر ولحد هسة تعتبره اخ لا أقل ولا أكثر
انخطبت قبل اختها الجبيرة هاجر
ومن كنت صغيرة الاحظ هاجر مهتمه بايهاب كلش بس هو مامنطيها مجال
الظاهر ماخذه الموضوع بجدية وتريد تتزوج إيهاب
اما مريم فهاي متكبرة على الكل ومن زمان تتنمر على ملابسي وكنا نتعارك سوى لأن منير يلعب وياي
مايلعب وياها
تغار وتكرهني
طيبة دخلت علينا مستبشرة جانت تخابر بخطيبها
كلش فرفوشه ومتواضعه على عكس أخواتها
طيبة-: هلو يابنات وين وصلتوا بالسوالف والغيبة ههه
مريم-: ملل
طيبة-: اني عن نفسي مستانسة لأن اجينا لبيت عمو وبعد شوي راح يجي راضي خطيبي حبيبي اوف مشتاقتله
مريم-: شكو جاي ورانا
طيبة-: عادي أصلاً عمو عزمه شكو بيها راح يجي هو وأخوه وعمتي
صبا حبي ابقي هنا وشوفيهم وانطيني رأيج براضي
مريم تكول عليه ابو كرش وهاجر تكول راسه شكبره مثل راسج تقبليها
صبا-: ههه لا برأيي قبل لااشوفه أهم شي الولد حباب وياج وإذا إنتي تحبيه ومرتاحتله بعد شعليج بآراء الآخرين
طيبة-: فديتج سبع فدوات أروح فدوة لكلامج الحلو
ابتسمت بخجل
مريم عوجت حلكها كاعدة عالقنفه وحاطه رجل على رجل
طيبة حبابة بس هي تسولف وياي وتتشاقه كلش مرحه
طيبة-: قبل فترة اشتريت ملابس جديدة هواي ومن غير الهدايا الي اجتني من صديقاتي والاقارب بالخطوبة
وبصراحه كلهن ضيقات مثل ماتشوفين وزني زاد بعد الخطوبة ههه بلكي قبل العرس اسوي ريجيم واروح للجم
ملابس عندي كلهن على كد مقاسج اكس لارج اني البس تلاثة اكس لارج حالياً لاتنحرج عادي إحنا أخوات وملابسي والله مالابستهن أبد
صبا-: لا مااريد شكراً عندي
طيبة-: لا صبا لاتزعليني جاي تفشليني يعني اني صديقتج واعتبريني اختج
صبا-: الي الشرف طبعاً بس مامحتاجه
والله
طيبة-: اني ماكلتلج محتاجه بس اني لأن عندي هدايا كومه ملابس من راضي واهله وخطية جايبيلي مقاس اكس لارج فهمتيني
هم عبالهم البس هالقياس بس اني سمنت وحرامات يروح موديلهن
صبا-: انطيهن لاخواتج مريم ضعيفه تقريباً تلبس بكدي
طيبة-: ماتقبل تكول يشوفوني لابسة من ملابسهم عيب مو برستيجها وهاجر طويلة كلش هههه البنطرون من تلبسه يوصل لركبتها والقميص يصير عليها فالينه
صبا-: أوك براحتج
طيبة-: ان شاء الله المرة الجاية ادزهم بيد مرت عمو ولا تفكرين اني أشفق عليج وهالسوالف لا والله بس معتبرتج أختي وعادي نلبس سوى
واي شي تحتاجيه كوليلي الله عليج لاتستحين إنتي ماعندج بنات وياج بس اختين كبار متزوجات مو بعمرج
صبا-؛ اي
طيبة-: اعتبريني اني اختج ماشي حبي
صبا-: اتشرف بيج طبعاً
طيبة-: مريم وهاجر وين طلعن
صبا-: مريم جانت كاعدة عالقنفه من شافتنا نسولف ملت وطلعت وهاجر راحت لغرفه إيهاب تنتظره
طيبة-: اهمم لعد خلي نروح نساعد مرت عمو
رحنا للمطبخ
وطيبة راحت كبل للثلاجه فتحت علبة نوتيلا ولكت كيكه
على أساس عمتي مسويتها
كعدت طيبة زينت الكيكه بالنوتيلا وكامت تاكل
اني ساعدت عمتي شوي غسلت مواعين
صاحلي منير
سمعت صوته من الحديقه
هو جان مو بالبيت طالع وي جماعته يلعب طوبة
بس سلم وراح
طلعت من المطبخ شفته واكف بالباب وجهه مخطوف
صبا-: ها
منير-: تعالي اوديج لاهلج
صبا-: ليش منو دز علية
منير-: امج يلا بسرعه
صبا-: شكو شصاير
منير-: امشي
رحت وياه
سمعت صوت عالي من بيت أهلي
الله يستر شصاير
من دخلت امي بسرعه كالتلي فوتي جوة
شفت أختي الجبيرة جايتنا وابوي يضرب بيها ببوري حديد
ودم من راسها
وابوي عصبي كلش وبيبي فوك راسه تكوله حيل وياها المنيو؛؛
من شفت هذا المنظر كل خلية بيا خافت
أختي شنو سوت حتى هيج ضربها
من الخوف رحت لغرفتي أركض
وبيبي تخازرني مخازر
امي خايفه دزت علية منير حتى أبوي مايفقدني ويصير عصبي
ردت بس اسأل امي شنو سوت أختي
العصرية هدأ الجو شوي
طلعت لكيت امي تمسح بالارضية وبيبي فوكاها تأشر عالاماكن الوسخه وتدقق على كل شي
الجدة-: تعاي إنتي وجه الزمال جيبيلي مي يبس ريجي
صبا-: هسة عليمن وجه الزمال كولي اريد مي وفضت راحت
الجدة-: بنت حليمه لسانها متبري منها بنت الجايفه ام الكلك
جبتلها مي مع طن غلط وفشاير ما ادري ليش
قساوة وحقد ماانتهى ولاراح ينتهي
أختي اسمعها تون من الوجع وأمها تبجي
الله أكبر محد ماخذها للمستشفى
امي خلصت تنظيف راحت للمطبخ وبيبي تكوللها ربي بنتج زين لاباجر تطلع كح،،
وتفضحنا وتنزل روس عمامها
امي ساكته كله اي وصار.
صبا-: بيبي شبيج ليش تحجين علية شمسويتلج اني ترا عيب هذا الكلام والله العظيم
الجدة-: هه عيب تعلمني العيب بنت حليمه خاب دولن أمهات الكم، الجايفات
صبا-: أستغفر الله
الجدة-: عود صيري مثل اختج الغبيرة هو أنتن عار
صبا-: وشبيها أختي مااسمحلج ولااسمح لأحد يحجي عليها
ضربتني على رجلي بعوجيتها
ام صبا-: حجية عوفيها ختولي بعدها صغيرة ماتفتهم الحجي الي تكوله
الجدة-: شمالها صغيرة الي بعمرها عدهن اربعه وخمسة كلهن أصغر منها الي تزوجن بس هي بعدها محمضه على كلوبنا العانس البايرة
اتفلوا بهاي كصتي إذا اتزوجت قبل ماتجيب عارها النا
صبا-: بيبي ليش هيج تحجين
كلش انقهرت بس صبرت وكتمت دموعي
لو تنطبك السماء عالكاع مااخلي أحد يشوف دموعي
وبالذات جدتي
اني مااصير ضعيفه شخصية مثل امي
...يتبع
لاتنسون التصويت إذا عجبتكم القصة أو البارت ❤❤❤
