...
#البارت الثامن
#زهراء_محمد_السراي
#شارع حيفا
*********
رنده
قلقنا
ساعات الليل بدأت تمر بسرعه
خوالي كلهم راحوا
واحد ورى الثاني للبانزيخانه
جسام وين راح؟
ليش تأخر؟
ام جسام كلبها نغزها
ولزمت الباب
هذا البيت ولا مكتوبتله راحة البال
حتى الجيران كلنالهم
بلكي بشارع حيفا نلكاله أثر
حمودي فرفح من الصراخ
ماادري شبيه
عبالك مضروب ويتوجع
امي من تتوتر تصير عصبية
ضربتني على ظهري
تهاني-: سكتيه مااريد أسمع صوته
أخذت الأطفال كلهم نيمتهم
ماهدأ النا بال
للصبح كلنا كاعدين
اجه خالي حميد طالعه روحه وماحجى شي
واكف بالباب شافته زوجته
وراحت تفتهم منه
خالي حميد هم تزوج بنت خاله
زواج تقليدي
ماجان يحب ولا شي
من كبر واستقر
كال لأمي أريد مرة
وأمي كالتله ماكو غير بنت خالنا لقاء
هي تناسبنا وخوش بنية
جانت صديقه امي وخالاتي
تزوجها
وماواجه اي مشكلة بزواجه
عادي يعني زواج تقليدي ناجح
وحب عشرة
زوجته تحاجيه مايحجي
امي وام جسام شافنه
وسالنه
وهم مايجاوب
ام جسام صارت عصبية وكامت تلمخ بروحها
هو عاط بيها من كد ما الكل لح عليه بالأسئلة
حميد-: ماكوووو
ام جسام-: شنو ماكو جيبولي إبني هسة اريييده
صار مصايح
امي كالتلها أهدي خلي نفتهم شني السالفه
توترت اعصابنا كلنا تشنجنا
اجوي خوالي الصبح كلهم
وإحنا كاعدين كلنا على أعصابنا
أمه مفرفحه من البجي واللطم
محد غمضله جفن
أول مادخل خالي صابر
رحناله نركض
صابر-: ماكو
ناس تكول انخطف
تهاني-: شنو انخطف!
خوية كلوبنا رايحه منو الخطفه
منو كاللكم
صابر -: جماعته الي وياه كالوا أخذ النفط وراد يروح
وبعد ماشفناه
سألنا الناس إلي يم البانزيحانه
كالو انخطف طبكت عليه سيارة طلعوا منها زلم ملثمين
اخذته
وبعدنا ما متأكدين
سعيد بقى هناك
يحققون بالقضية بلكي مناه للعصر يلكونه
الكل جان حاس خالي صابر يحجي حجي مومنطقي ومجرد يريد يهدينا
مافهمنا منه شي
خالي مؤيد نفس الكلام
الظهر هم راحوا
كلنا على لحم بطونا بس سويت للجهال أكل ورودينا وأطياف ماراحن للمدرسة
خوالي راحوا للبانزيخانه
وسألوا الناس من جديد كالولهم انقتل
وكل شخص يحجي بكيفه
نفينا كل شي سمعنا من قتل وموت
وبقينا بأمل بأنه مخطوف
وإن شاء الله نلكا الناس إلي خطفته
وتعاقبهم
مر يوم كامل جسام مختفي
وكلنا نبجي
لا هو ميت ولاهو عايش
خوالي يتسألون بالناس
ويدورون عليه بكل مكان
عسى ولعل يلكونه
مر يوم والثاني هم
النساوين تتلاطم
امه انتهت فرد مرة
ماتقبل لاتاكل ولا تشرب وكل شوي تتخربط ونشيلها
أخواته يكسرن باب الكلب لأن أخوهن الوحيد
اني حالي من حالهم مقهورة وابجي صفنت أكثر شي واتأثرت على أخواته
وحطيت مكاني بمكانهن
اسم الله لو لؤي يموت لاسامح الله
هم هيج يصير بينا إحنا اخواته!
الله يساعد كلوبهن
نفيت الفكرة السوداوية الي اعترت دماغي بسبب المواقف الي شفته
تذكرت خالاتي من مات أخوهن هم هيجي صار حالهن
ياساتر ياربي كل شي ولا نمر بهيج موقف مثلهم
استغفر الله العظيم
خوالي حالهم حال ينبجي عليهم
خالي سعيد من يوم الي راح جسام هو طلع من البيت
وبقى يم البانزيحانه يتسأل بالناس
واي شخص يكوله جسام انقتل يتضارب وياه
ويسويله مشكلة
ومايقبل يرجع للبيت
بقى بالشارع يبات يم البانزيحانه
ثلاث ايام وإحنا ماشايفينه
ثالث يوم راحوله خوالي حجو وياه
يرجع للبيت وان شاء الله نلكاه
وإذا يعرفون اي خبر شي أكيد يكولولنا
بس هو بقى معند
خالي صابر راحله
ورجع عصبي لكاه لازم بطل العرك
وسكران يفتربشارع حيفا
ام جسام حالها يكطع الكلب
مر أسبوع وماالها أثر
فقدنا الأمل برجعته
والكل كالولنا لاتتأملون عالفاضي
لأن كثرانه عمليات الخطف بهالوقت
واغلب الضحايا تختفي
وابنكم حاله حال البقية
هه
خوالي كالو لازم نسوي فاتحه
وننطي خبر لسعيد
خالي سعيد متعارك وياهم وكاللهم عايش لحد يسويله فاتحه
خوالي راحوا للنجف سووله كبر
تابوت فارغ
امه وبيبي وخالاتي يبجن عليه
من أحد المواقف الحزينه والصعبة الي شفتها
للنجف كلها راحت
والروحه جانت صعبة كلش
مو بس احنا دفنا تابوت فارغ
هواي عالم مثلنا فقدت ولدها وماكو غير هاي الطريقه
حتى يبقاله أثر وذكرى عالاقل يزورونه ويترحموله
سواء إذا كان عايش أو ميت
تقبلنا الأمر الواقع والمرير بكل صعوبة وبكل حزن واسى وانكسار
خوالي فقدوا الأمل بس كالوا بلكي اي خبر نسمع بيه
حتى لو بس جثته هم راضين بكل شي الله كاتبه النا
سوينا فاتحه
اجوي الجيران والأقارب
وتمرمرنا بتعب وضيم وقهر
شغل الفاتحه كله علية
كل شوي أيدي لو تحترك لو تنجرح بسجينه
امي عصبية ماتتحاجى بس تشوفني عايفه الشغل تموتني كتل
وحمودي من يسمع الصراخ والعياط مال النسوان يتخبل
بالمطبخ وبين اشيله واسكته وبين اشتغل
واثرم بصل للطبخ
دخلوا خوالي كلهم لافين على وجوههم جفية
وعيونهم حمر دم من السهر والبجي
بيبي من كد مالطمت وبجت
نيموها بالفراش
خالاتي صار دور اللطم الهن
وحده تشك ثوبها ووحده تخرط بخدودها وتطلع الدم
جسام جان من ريحه خالنا صلاح الله يرحمه
كلنا نحبه ولد رزين وهادي
ولايوم سوى مشكلة من صغره عاقل
الله يرحمه ويغفرله إذا ميت
وإذا عايش بلكي يرجعلنا ويبرد كلوبنا
ام جسام وبناتها انتهت من البجي
هو ابنها الوحيد ومات
والحارك كلوبنا مامتأكدين إذا هو ميت صدك او بعده عايش
وبقيت شكد أفكر وأسأل نفسي
إذا اكو ناس خطفوه ليش!؟
وإذا انقتل هم ليش
طول عمري واني افكر
شنو السبب الحقيقي لهذا القتل والموت
ومن جنت اسأل نفسي هذا السؤال
مو اقصد بيه بس موت خوالي
كنت اقصد الموت إلي يصير بالعراق
ماعرفت الجواب
ولا راح أعرفه
صعب أحد يفهمني
وتبقى هواي الغاز بحياتك ماتعرف شنو الحل مالتها
حياتنا كانت مجرد ألغاز وشكد انتظرنا الحل بس ماكو
ثلاث ايام الفاتحه
بأخير اليوم كانت الختمه
الكل تعبان لا اكل ولاشرب ولانوم ولاراحه
الكبار والصغار
خالي سعيد مااجه للفاتحه ومحد راح شافه
بأخير يوم الفاتحه اجه سكران
ويصيح جسام ماميت ليش سويتوا فاتحه
جسااام عايش
محد انتبه لنبرة صوته
ماميزوه سكران
طلعت النسوان حافية تركض بالشارع
عبالهم كلامه صحيح
وبنص الشارع صار الصريخ
يقرأ الف ونه والم
الجيران والعدها شهيد كلهن انجمعن وعلى فرد صرخه ونوح
خوالي رادوا يدخلون خالي سعيد للبيت ويسبحوه بلكي يصحى على زمانه
شفت خالي سعيد
شعره مكفش واملح كله تراب
وجهه مصخم
ملابسه مشككه ووصخه
ريحته مال المشروب تخنك
لازمه بطل العرك ويشرب
ويبجي دموعه عشرة عشرة
ويصيح جساااام عايش
ماميت
من شافوا حاله خوالي كاموا يبجون
دخلوه للحمام
كام يغلط عليهم ويكفر ويفشر
مايدري بنفسه
خلصت الفاتحه
كلها مرضى
هدأ الجو وصار كئيب
ام جسام ماكدرت تهدأ وضلت ليالي تنوح هي وبيبي
خالاتي كلمن راحت لعيالها واحنه رجعنا لبيتنا
خالي سعيد
خوالي كلما يدخلونه للبيت يطلع ويضل يصرخ
باليل سمعنا صراخه وطلعنا شفناه بالشارع وبيده بطل العرك
ويغلط ويدكدك ببيبان الجيران
خوالي وراه يريدون يدخلونه للبيت
مايقبل ضرب خالي مؤيد وراح
خوالي ملوا منه عافوه براحته
بنص اليل ردت أنام بعد مانيمت حمودي وغسلت المواعين
كعدتني امي
تهاني-: اغسلي الملابس باجر ابوج شيلبس ولا عنده قطعه نظيفه الملابس كلها وسخه
رنده-: يمه و الله نعسانه خليها باجر
تهاني-: كووومي
كمت طلعت طشت شكبره وترسته مي وتايت وعيوني يحركني من النعاس والبجي
ايديا كلها اكزيما ويوجعني
صايرات قطعه سودا وخشنات حتى فطور بيهن ويطلع منهن دم
أغسل بالملابس والتايت يسمطني سمط
والمي بارد تنكعت ملابسي
وضليت ارجف من البرد
ماكدرت اسخن مي نفط ماعدنا
بعد ماخلصت غسل ملابس طلعت بالحوش اشرهن
ومن الحديقه شفت ناس مجتمعه بباب بيت جدي
...يتبع
