.../// #البارت الثالث///
#زهراء محمد السراي
#شارع حيفا
**********
... أرضى بما قسمه الله لك قد تكون أغنى الناس وأنت لاتدري ...
أطياف
البيت كئيب بيبي مريضه ونايمه خالي كلمن يم مرته ويلعبون وي جهالهم طلعت بالباب بعدها الأوضاع ماصايرة خطيرة ضايجه كنت يم بيبي اسولف وياها هسة وحدي بالباب شفت بابا توه اجه من الشغل وبيده علاليك وملاعيب عبالي من يشوفني ينطيني لعابة لأن ولا مرة بحياته جايبلي شي وابد ميحجي وياي ومتجاهلني هو وامي وكل إخواني مااعرف ليش وشنو ذنبي من شفت بابا ابتسمتله رغم علاقتي بيه ضعيفه بس أحبه واحس بحنيه تجاهه ابتسمتله هو مااهتم لاكوه إخوتي قسملهم ألعاب كل وحده منهم مشتريله شغلة معينه حسيت بإحباط بقيت كاعدة واسولف وي روحي والعب بالتراب وارسم حفر بالكاع ضايجه ويامن العب اتجرأت أروح لبيت أهلي رغم ماخوالي وبيبي مانعيني من الطلعه لأي مكان وبيبي إذا تدري بيا بالشارع تزعل مني بس اني طلعت لأن محد مهتم بوجودي أصلا بيت أهلي جان احلى من بيت جدو وكفت يم الباب مفتوح لكيت لعابة رودينا بالكاع شامرتها قديمه وشفت لازمه بيدها لعابة جديدة توه بابا اشتراها الها وشايلها ويبوس بيها وبحضنه كل إخوتي يبوسون بيه لأن بابا طبعه حنين وطيب كلش احن من امي وأحسن منها دخلت للبيت هو شافني ومااهتم
علاقتي برودينا من كنا كلش صغار كلش قوية كل لعبي وياهة بس من شافت امي وبابا ميهتمون بيا صارت خبيثة وتغيرت فد نوب إحنا بعدنا أطفال منفتهم شي بس صوج أهلنا هم سوو هاي التفرقة بيناتنا من كد ماكنا ٢٤ ساعه سوى كلش متشابهين بس الفرق هي بيضة واني سمرة وأغلب الي يشوفونا عبالهم توأم لأن نفس الطول بس هي أحلى مني بهواي الكل يحبها وحتى من كبرنا توارثنا من امي الشامات بالوجوه اني اكو بشفتي شامه من الصغر حلوة وبارزة
مؤيد- هاي شعدها هنا
تهاني = اندري شجابها شلون تطلع من البيت
أخذت اللعابة القديمه مال رودينا
أطياف " عادي أخذها
مؤيد" اخذيها واطلعي برا لا خوالج يقلقون عليج ماعايزين هما
رودينا ": أي طيوفه اخذيها حتى العصر نلعب إحنا وعلياء
أطياف ": أي خوش
اخذتها كنت فرحانه بس امي ماقبلت
تهاني ": تعاي وين ماخذتها جيبيها مالتها
أطياف ": هي انطتني ياها نلعب العصر سوى
تهاني :؛ لا يلا روحي
أخذت اللعابة مني وطردتني من البيت
اني انقهرت ضليت افرفر بالشوارع شفت بزونه شلتها أحب الحيوانات وتالي رجعت لبيت جدي للساحه شافني خالي
- وين جنتي ولج شلون تطلعين
= ضايجه
- بعد لاتطلعين خالو أوضاع خطرة امشي طبي جوة لتصيرين وكحه
= اريد اكعد بالحديقه
- شوي وفوتي للبيت
= اي خالو
كعدت بالساحه صايرة هوسة مو نظيفه مثل قبل هاملينها الحديقه هواي زرعات ميتات الدجاج مكانه وسخ نظفت المكان والحديقه سقيتها دخلت للبيت كعدت يم نسوان خوالي
- وين جنتي طيوفه
= بالساحه ومساعه رحت لبابا وطردوني
- ياا ليش رحتيلهم مايقبلون حبيبتي
= ليش ؟ اني مو بتهم
- ميخالف إنتي بتنا وبيتنا
= بس غير هم أهلي واخوتي كلهم هناك ليش اني مخليني يمكم
- اوف طيوفه عمري لا تروحين حتى ماتصير مشاكل هنا كعدي العبي وحدج حتى رودينا ماتتعارك وياج المن رايحه هناك
=اضوج وحدي وبيبي نايمه وأنتم كلكم ضايجين
- لا هسة اليوم باليل كلنا نلتم وتتونسين حبيبتي هسة اني وخالتج جاي نسوي عشا بثواب خالج سامر لاتطلعين بعد ترا الأوضاع موزينه انوب تنخطفين ووين نلكاج بعد
كامن نسوان خوالي يحجن بيناتهن
- هاي البنية شلون بيها إذا أهلها ولا الهم غرض بيها وتهاني ابد ولامرة سائله عليها مايوم كالت بنتي شأكلت اشربت حتى من تجي ولا جنها امها تدنك عليها تبوسها كل شي ماكو شبيها.
= خية هاي الدنيا توقعي كل شي بيها الناس ماتريد جهالها يمر علينا وكت ناس تاكل ناس حتى ضناها تشمره بالزبل وتتذكرين كلامي هذا الله يستر
- اوف هسة هاي البنية باجر عكبه تكبر شلون تبقى يم أهل أمها حتى اليتزوجها هم يكول ليش
= اي والله هي المشكلة مو بس هنا يعني محد ضامن عمره وشوفه عينج الدنيا تخوف والأوضاع موزينه وكلمن يكول ياروحي والحجية عمتي مرة جبيرة وبيا ساعه الله ياخذ أمانته هاي الطفلة وين تبقى وخوالها كلمن عنده مرة وجهال ويادوب مدبر حالته والعيشة صعبه مو مال واحد يجيب فوك عائلته نفر زايد
- اندري ياخية
سمعت حجيهن صدك طفلة بس انقهرت هو اني ليش منبوذة وبس بيبي تحبني أحس أهلي يكرهوني لسبب
صار المغرب
فطيمه" طيفه روحي كعدي عمتي دنيا مساية غروب ما يصلح
أطياف ": أي خالة
فطيمه ": عفية بنيتي.
رحت لبيبي اكعدها
أطياف ": يمه كعدي صارت صلاة
كعدت بيبي صلت ودعت باليل اجتمعنا بس جمعتنا حزينه كلها ساكته وضايجه بيبي كامت تبجي ونعت وكلها كامت تبجي بهاليوم ماسهرنا نمنا من وقت ثاني يوم كعدت لكيت خوالي كاعدين يسولفون
صابر ": الأوضاع تعبانه من السقوط والأخبار ماتبشر بخير
محمد": كلها تكول حضروا ارواحكم للضيم العراق راح يشهد أحداث خطيرة لو نسلم منها لولا
صابر": ربك الساتر بس كون تعدي سلامات
محمد:؛ مااعتقد صايرة مشادات بغير مناطق صار السني يقتل الشيعي والشيعي يقتل السني العراق من شوكت تفرقه هاي الأمور
صابر:: هو السني منين والشيعي منين مو كلهم مسلمين
محمد": يريدون يشوهون ديننا الاسلامي
صابر": الدين مايتأثر دين الله هذا ماكو غير العراق إلي راح يتأذى وتبقى باقي الدول للأبد تحجي علينا راح نصير عبرة لكل العالم الحرب الي راح تصير مو حرب وي دولة ونكول عادي بيها مجال محمد الحرب بيناتنا إحنا بين طوائف البلد شتتوقع راح تهون أكيد لا
محمد:؛ الله كريم نشوف تاليها
أطياف ": خالو راح تصير حرب يعني نموت ليش الحرب تصير
خالو شالني وخلاني بحضنه
محمد": لاخالو ماكو شي
أطياف ": خالو أخاف من الحرب أخاف واحد منكم يموت مثل خالو سامر
محمد": اش لاتحجي هيج محد راح يموت
