#زهراء_محمد_السراي
#ذاكرة_الحب_والحرب
#إعلان
*********
ضحاتها رنات تدغدغ احاسيسي
ترن هذي الضحكات على مسامعي واني مغمض جاي استشعرها يمي
تتحرك شفايفي ببسمة تتكرر وتتوسع الى إبتسامة عريضة مليانة سعادة
حركة شفايفي بطيئة بس الابطأ منها حركة اجفاني
احس بثكل جسمي
جاهدت أفتح عيوني بس ما كدرت كلما احاول افتح اجفاني يتسببلي صداع
أنفاسي مو منتظمة وأحس كل اعضائي متجمدة متقيدة مااحس بأي شي حوالية
بس ... !
روحي ترفرف بالحب والسعادة لمجرد ذكراها
وانعاد صدى ضحكتها على مسامعي
همست بصوت ناصي
_ لمياء
بلعت ريكي وتنفست بعمق أريد أشوفها متشوق لعيونها ولملامحها شنو سبب هذا الاشتياق
كلبي يتحرق لرؤيتها أحس روحي تكول صار دهر ما شايفها متلهف ومتلوع لهذا اللقاء ...
عكدت حواجبي وحاولت اتذكر آخر مرة شفتها شوكت جانت
يمكن البارحة أو قبل يومين
صداع برأسي قوي وركبتي متيبسة مااكدر احركها
معقول نمت هواي وفاتني الدوام !؟
لو يمكن نمت بطريقة غلط خلت ركبتي تتشنج
بس ليش عيوني يوجعني والجفن ثكيل
بصوت اقرب للهمس صرت اناديها اني مغمض عيوني وبحالة غريبة عجيبة
_لمياء لمياء وينج ؟
كلبي زادت دكاته العنيفة وحسيت بصداع قوي وصوت اجهزة وناس هواي اغلب الكلام الي سمعته هو ..
_كعد فاق من الغيبوبة لك الحمد يا الله
وتحول صوت الهمهمات والارتباك الى صوت بجي وهذا البجي هو للفرح أصوات كثيرة يا ربي كلها غريبة عني وهي صوتها ماكو وينها لمياء ؟
وجاهدت حتى أفتح عيوني بس جفني يا الله ثكيل وصدري عليه جبال من الهم والضيق والنفس بالكوة اسحبها
مع صوت البشر هناك صوت اجهزة غريبة
كررت مرة ثانية بصوت ونبرة واهنة وضعيفة ..
_ وينج لمياء أريد مي
هنا زادت الهمهمات والأصوات ومن بينها صوت امي وبجيها
ليش صوت لمياء مختفي
من بعد صعوبة فتحت عيوني ما شفت غير البياض النظر مغوش ماكو أي شي واضح كدامي بس أشخاص عمالقة كبار لابسين أبيض
جريت نفس عميق ورجعت غمضت عيوني وفتحتهن وتوضحت الرؤية بصعوبة عندي
امي ووالدي ودكتور واكفين فوك راسي نظرات مبهمة غريبة منبهرة
امي متغيرة وكبرانة وجهها مليان تجاعيد وخالي من كل الزينة
عيونها مليانة دموع ومن فتحت عيوني زاد بجيها
أبوي مو احسن من حالها بس كاتم دموعه بصعوبة والدكتور مبتسم وفرحان ملامحه مستبشرة بانتصار عظيم
ما جنت مستوعب اي شي كل ظني جنت نايم مثل اي يوم وكعدت استقبل يوم جديد بس كنت غلطان
جانت فتحة عيوني من غيبوبة سنوات
والصدمة على وجوه الكل
الدكتور فرحان ومفتخر والممرضين والممرضات دخلو إنذار مااعرف ليش
امي تبجي وحاضنتني وابوي سجد للرب سجدة شكر
واني عرفت نجاتي من الغيبوبة عن لسان الدكتور الي كال بكل بشاشة وحب ..
_ الحمد لله على سلامتك أستاذ عادل
عاكد حواجبي اباوعله وأحاول أستوعب كلامه !
بلعت ريكي بصعوبة متخشب ومتجرح
اي حركة مني اتشنج حتى وجهي عضلاته متوترة
امي حاضنتني ما كدرت ارفع أيدي عليها وأمسح على ظهرها واطمنها
جنت ما مستوعب ولا متذكر أي شي مااعرف شلون وصل بية الحال أدخل غيبوبة!
كم يوم كم شهر كم سنة!؟
يا ترى احنا بيا سنة !؟ وبيا شهر ؟
اليوم شكد من الشهر الميلادي والهجري
شنو الي فاتني !؟ ناسي اختلفو لو بقو مثل ما هم ولمياء وينها لمياء !؟
الدكتور من شاف صفنتي نظر لبابا يطمنها
_ لا تقلق أبو عادل مستغرب وهسة انطوه مجال فد ساعة ساعتين وراح يتجاوب وياكم
بس اطلب منكم هسة تطلعون انت ومدامك ام عادل ترتاحون شوي وتشربون عصير بارد واحنا هنا يم البطل عادل بس نسوي كم تحليل ونتأكد من صحته
هز راسه ابوي ونظراته قلقة مصوبها نحوي وراها تقرب من الدكتور وهمس
_ دكتور ليش يكرر اسم لمياء !؟
_ راح نعرف السبب هسة وافهمكم
امي بعدها تبجي وتبوس بايدية واجتافي
_ شسويت بية يا روح امك ليلي ما كدرت انامه مااعرف شلون أشكر رب العالمين من بعد ما فقدت الأمل إنك تعيش
ما جاوبتها وبقيت اباوعلهم مصدوم ... طلعو من الغرفة والدكتور بابتسامته المعهودة صار يمزح وياي ويشوف شغله
واني كل بالي يم لمياء وأتسائل وي نفسي إحنا بسنة ٢٠١٣ هاي السنة هواي مخططلها خطط ومشاريع ولمياء وياي
كملت التحاليل والدكتور صار يباوعلي محتار
_ تتذكر إسمك عادل؟ مو
هزيت راسي وهو ضيق عيونه وضل يفكر
_ احنا بيا سنة عادل !؟
_ اكيد سنة ٢٠١٣
_ وإذا اكولك إحنا بسنة ٢٠١٨
!!!
