#البارت الرابع
#زهراء_محمد_السراي
#توأمي الملعون
*********
صبا
... مهما تقدم العالم وتطور
ستبقى هناك أجيال للأسف اني اقولها
ستبقى اجيال متعمقه بجهلها
تظن تعنيف المرأة
هو التربية
...
وصلنا للبيت أبوي نزع عكاله ووين التوجعني وبيبي فوك راسي بالعوجية مالتها تضربني
امي تباوع ومدنكه راسها تخاف تعارض أبوي وتكسر كلمته
بعد ماكتلني تفل علية وراح
ابو صبا-: بوية اني ماشايف بعمري كله بت هيج صلفه وماتنرد بالالف مرة اكوللها لاترحين وحدج للمهجومه خلي واحد من اخوتج يوصلونج
بنت حليمه الفكر
اني اعلمج إلا تشبعين دكاك يلا يصير براسج خير
منعولة الوالدين
بنت الكلبة فورت دمي
ام صبا-: لا تضوج منها بعدها صغيرة ماتستوجب
ابو صبا-: إنتي حسابج بعدين صارلي هواي مامشغل الصونده عليجن بنات الزمايل
راحت امي جابتله كلاص مي
هو شمره عليها
بيبي توز بيه
-: شوفها شكد صلفه وبعدها تخزر دمعه ماطاحتلها هاي الكتلة لو بية جان متت
البربوك بكل عين صلفه كاعدة ولاجنها
ام صبا-: امشي ولي لغرفتج حركت كلب ابوج
رحت لغرفتي
يريدوني ابجي
لوتنطبك السما عالارض ماابجي
واشوفكم دموعي
حتى تستحقروني
وبالذات بيبي تريد بس تشوفني ابجي ومكسورة
ليش اني حظي خلاني انولد بهيج عائلة متخلفة
منير جان طالع وي أصدقائه
سمعت من امي
بقيت بالغرفه
اضربت عن الغدا
شفت محد أهتم ولا واحد اتضرر
غيري
اني اذا مااكلت محد غيري راح يجوع
وامي عسى ماابقى شهر بلا أكل
ماراح تنتبه
لأن مشغولة بالخدمه ببيوت عماتي
مشغلاتها مثل الخدامه عدهم
ربت كل جهالهن من الصغير للجبير على ايد امي
حتى رضاعه ترضعهم
وتغسللهم
من يروحن للحفافه أو الخياطه
امي تتكفل بكل شي
بجهالهن وبيوتهن
حتى تركب بدالهن
وبالتالي شنو المقابل
بس المهانه
والذلة
الظهرية نامو بقت بس امي
تشتغل ورى البيت
إحنا بيتنا كبير
ستمية متر
واله بابين
طلعت من غرفتي بوجهي للمطبخ
فتحت الباب وانصدمت
بجسد صلب
صبا-: منير !؟
جان لازم بيده لفة استحيت اكوله شتسوي
أخاف احرجه
هو هم انحرج من دون أي شي
صبا-: محتاج شي
منير-: لا
صبا-: لاينشغل بالك على أمير مابيه شي
منير-: أي شفته اليوم بالمدرسة مداوم
صبا-: اها
منير-: محد منهم سأل عني
بس امي
أبوي وايهاب ناسيني
ومحد خابرني كال أرجع للبيت
ماصدكوا أطلع وماارجعلهم حتى يرتاحون من المشاكل
صبا-: لاتكول هيج يجوز مشغولين
وعبالهم رجعت للبيت
منير-: لا
أمير سألته بقى ساكت معناها أبوي مايريدني أرجع
لأن تجاوزت عليهم كلهم بحالة عصبية
صبا-: انت ليش هيج عصبي حاول تتصرف بهدوء
منير-: عندي اسبابي
صبا-: انت تكره أبوك لو
منير-: اي أكرهه
صبا-: بس هو مامسويلك شي
خالو ابو إيهاب حباب وهادي كلش مدللكم كلكم
أحسن من بابا بهواي
اني أشوفه يشتريلكم كل شي تريدوه وكل واحد منكم مخصصله راتب خاص بيه
وحتى خالة دايماً تسولف لأمي
تكوللها ابو إيهاب ماكو منه معيشني ملكه وإحنا كلنا نحبه
اني المفروض اكره أبوي مو انت أبوك نعمه لازم تحمد لله ونشكره عليها
منير-: لاتغرج المظاهر اكو أشخاص موزينين بافعالهم يبينون ومايتظاهرون بالطيبة عادي عدهم يبينون بصورتهم الحقيقية السيئة ذولي أحسن الف مرة من الأشخاص السيئين الي لابسين قناع الطيبة ويبينون كأنما ملاك يمشي عالارض
صبا-: ماجاي افتهمك
منير-: عالاقل ابوج واضح وصريح مامتصنع
صبا-: بس يبقى إنسان سيء والناس كلها تعرفه
منير-: تكرهينه!؟
صبا-: مااعرف يمكن اي ويمكن لا إذا اكولك أي ضميري يأنبني
وإذا اكولك لا أطلع جذابة
منير-: تكدرين تسولفيلي
صبا-: امم هنا!؟
منير-: نروح ورى البيت بالحديقه الخلفية مهجورة تقريباً محد يكعد بيهاا
صبا-: اي صحيح
بس امي جاي تنظف ورى البيت
منير- تكدرين تسويلي استكان جاي
صبا-: اي أكيد تدلل روح واني اجي وراك
منير-: أوك
كنت مستغربة من تصرفاته وي الكل أعصابه كابة للستار حتى وي خالتي
دايماً تشكي لأمي منه
كلش عصبي
بس وياي يحجي بهدوء
أتذكر مرة اجوي بيت عمهم عدهم ثلاث بنات
ولا يجاملهن حتى مايسلم عليهن
يستحي مدري منعزل عن البشر
سويتله جاي وطلعت كعك ورحت شفت أمي بطريقي
صبا-: هذا الجاي لمنير
ام صبا-: خوش تغديتي انتي
صبا-: هو حتغدى
ام صبا-: بس لاتتاخرين بالكعده وياه
صبا-: يمه الحديقه مسيجه محد يشوفنا
ام صبا-: خاف ابوج يسأل عنج
صبا-: خوش
كعدت وياه بالحديقه
يعشق الجاي شرب الاستكان شربة وحده وهو حار
شنو مايحس بالحرارة
شو اني شكبراتني بعدني واحط مي بارد عالجاي حتى مايحترك لساني
صبا-: اصبلك بعد جاي
منير-: ههه ولله ياريت
جبت القوري والشكر علموده
وكلاص مو استكان
مبين الاستكان مايفيده
صبيتله وشفت باكيت جكاير عالطبلة
صبا-: هاي الجكاير الك
منير-: اي
طلع جكارة ورثها
خالتي لو تعرف تضل تلطم إذا رجلها رجال شكبره مايدخن
انوب منير
عزا العزاك منير
صبا-: خالتي تدري
منير-: لا
صبا-: ترا موزين وخالتي تتعقد من شي اسمه جكاير وانت أكثر واحد تعرف طبع امك ماحاجه اذكرك
بعدك صغير وينك وين الجكاير
منير-: لاتكولين لأحد
صبا-: أوك بس ياريت تفكر بالي كلته والله الجكاير موزينه
مضرة ولله شوف شنو كاتبين تسبب سرطانات أمراض خبيثه كومه
ليش تتعب رئتك من هسة ماتسوى
بقى ساكت
اني اغمس بسكت وكعك وجاي
درت وجهي وخليت مي عالجاي
لأن حاار جوى حلكي
منير باوعلي استحيت بس لا شافني من حطيت المي
منير-: اكولج
صبا-: ها
منير-: اريد الرمز حافظته !؟
صبا-: لا
منير-: ليش ؟ ماعندج موبايل
صبا -: لا أبوي يكول البنت إذا صار عدها موبايل تجيبلنا العار والخزي
منير-" اووه بيا عصر إحنا هو موبايل مو رجال إذا البنت ذكية وتربيتها صح ومع التوجيه ماراح تستخدم الموبايل بطريقه غلط يعني مثلج
مستحيل تسوين شي غلط
اني اعرفج
صبا-: شكراً على هاي ثقتك بس أبوي ماعنده اي ثقة بية
منير-: ليش !؟
صبا-: ما ادري بس الي أعرفه الكل يكول هيج وهذا الشي والمنطق من زمان عدهم
البنت عار
وإذا تعرف أبوي تزوج على امي بس لأن جابتني وكنت اني بكرها
منير-: ليش يعني ماجاي أفهم شنو تركيبة والدج بالضبط
صبا-: مو بس أبوي هو متوارث هالشي من عمامه وأبوه
يعني مو بس اني أعاني الي قبلني البنات هم عانن
صعب تصدق اكو هيج نماذج بعدهي لهسة
بس هذا أبوي وعمامي كدامك مامخلين اي قيمه للمرة
والمعجزة الحقيقية هم مخليني أدرس ومابطلوني
كل عماتي وبناتهم تزوجوا من عمر ١١ سنه
يكولون البنية إذا بقت هواي عند أهلها تصاحب وتريد رجل ماراح تستقر الا يأخذها رجال ويسترها
عدهم الي تتزوج مثل العار وخلصوا منه هذا الكلام سمعته من تزوجن إخواتي
منير-: حتى اخواتج
صبا-: اي يعني كلنا تقريباً حتى عماتي وبيبي هم عانن من هاي التفرقة بس هنة مشن على هذا المنوال ومن كبرن كامن يفرقن واي شي عاشنه مثلي
عيّشنه لغيرهن
شلون واحد يذوق المر ويرجع يذوقه لغيره
مااريد أكون هيج بأي طريقه
منير-: تحسسيني جاي تحجين عن شي تاريخي
صبا-: اي هو هذا تاريخ أهلي الزفت والي مااتشرف بيه
منير-: أوك لتضوجين
صبا-: اني حروح محتاج شي
منير-: اريد الرمز كلش محتاجه
صبا-: اكول لاخوي هو ينطيك ياه وبس تخابر خالتي اكولك لاتضوج بأي لحظه أبوك يكولك أرجع لبيتك
منير-: موبيتي
صبا-: بيت أبوك هو بيتك
منير-: لا بس ان شاء الله اشتغل واتعب على نفسي
واكوّن نفسي بنفسي ومن دون مساعدة أبوي ولا إيهاب
صبا-: ان شاء الله
رحت لغرفتي
العصر بس بيبي تفتر بالبيت تشوفه نظيف لولا
شافتني بالصالة أقرأ وماافتهم شي
-: ماتولين تقرأين يم إيهاب يالمصكوعه
سكتت
-: خايبة هووو مو احجي وياج
صبا-: ها ها
-: ووجعا توجع كلبج بنت حليمه
صبا-: انعم الله
-: ماتولين
صبا-: وابوي خاف تسوولي عرس من جديد ومشكلة واني ماعايزة حنه ورنه
-: أمشي ولي من كدامي مااريد أشوف خلقتج الزفرة تلعب سابع روح بية
صبا-: الحمد لله والشكر أروح لبيت خالتي احسنلي
كلت لأمي ورحت لخالتي أخذني أخوي مراد
من طلعنا حاحيته عالرمز وكالي من أرجع انطيه ياه
دخلت لبيت خالتي وسلمت عليها رجلها كاشخ واستوه يريد يطلع من البيت هم سلمت عليه وراح
أول ما طلع خالتي حاجتني بلهفة
ام إيهاب-: منير شلونه أتصل عليه ومايجاوبني خلاني بقلق
صبا-: زين الحمد لله بس ضايج كلش على أمير وبنفس الوقت لأن محد منكم سأل عليه
ام إيهاب-: اني اخابره مايجاوبني ليش ولله بالي يمه
ليش هيج يسوي بيا وينشلع كلبي
صبا -: خالة هو ماعنده نت يمكن لهذا ماجاوبج بس هسة خابريه وشوفي حيجاوبج
خابرته وجاوبها
أمير شفته وسلمت عليه جان يدرس ومركز استحيت اكوله اشرحلي هو كالي إيهاب فوك بالبلكونه
صعدت لكيته يشرب كهوة ولابس نظارته
وبيده ملفات تقارير
ابتسمت تلقائياً
مااعرف حسيت بانجذاب لطيف تجاهه
يعني النظارة وشكله جذاب لابس قميص ابيض كلش راهم لبشرته ولون عيونه عسلي وي النظارة كلش حلوات
مثل الهبلة العبيطه واكفه ومبتسمه
هو باوعلي ابتسم
إيهاب-: شنو توزعين ابتسامات ياصاحبة الابتسامه الخجولة
صبا-: ههه لا بس هيج
إيهاب-؛ كم إنتي بريئة وتملكين رقة عاطفية ونكهة صبيانية كالطفولة
حلو هذا كتبته الج
صبا-: ههه حلو
إيهاب-: حلو مثلج
استحيت كلش
شفته كاتب كومه كتابات شعر وراسم قلوب الأوراق مليان اشعار
صبا-: تحب تكتب شعر
إيهاب-: اي أحب أكتب فصحى وخواطر
صبا-: والشعبي
إيهاب-: اممم أحبه بس مايعجبني اكتب
الفصحى أحسن بالنسبةإلي أكتب خواطر واقتباسات
بسهولة
صبا-: مثل الي كلته إلي من شوي
إيهاب-: ههه أي مثله
صبا-: وهاي الأوراق كلها شعر
إيهاب-: قصائد لشخص واحد وبس هو نمى بداخلي كتابة الشعر الفصحى
صبا-: منو!؟
نظرلي بسرحان
إيهاب-: حجينا هواي صار وقت الجد والدراسة يلا طلعيلي واجباتج
شرحلي الدروس ورجعت للبيت
خالتي راحت وياي حتى ترجع منير لبيتهم
وراح منير
فهمت إنه كل شخص عنده سر ولغز بتصرفاته مع أهله
كيف مايعاملونك أهلك
راح تنخلق شخصيتك
كل شخصياتنا بكل صفة بينا هو ناتج عن المجتمع الي إحنا بيه هوو الي أثر علينا
باليل اجوي خطار هواي لبيتنا
عمامي كلهم تجمعوا
جايين مشاية على بنت عمتي
عماتي بيوتهن قريبة علينا
تلاثة عماتي
وكلهن نفس الطينه
قاسيات ومتخلفات
عمتي الجبيرة زوّجت بناتها كلهن وولدها كذلك
بقت عدها بنية وحده عمرها ١٢ سنة
وجايينها مشاية يخطبونها
رجل عمتي يشتغل وي عمامي بالسوك هم كصاب وعنده محلات بيع مواد غذائية هواي فروع عنده بكل سوك
يعني غني ويريد يتزوج على عمتي
وكل مرة تصير مشكلة
عمامي مايقبلون يتزوج على اختهم
بس هم عادي يتزوجون أربعه أكثر
ساعدت امي بالضيافه
وانطوا للناس موافقه مبدئية
ومااخذوا رأي البنية توافق اولا
لأن هي ماعدها اي شخصية تجاوبهم
بس فرحانه عالعرس والبدلة
وأمها تشمر حجي علية تكولي البايرة العانس
وسمعت حجي لأمي قيامه
راحوا الخطار
عمتي الجبيرة كالتلي باجر تعالي لبيتي ساعديني
لأن امي راح تبقى ببيتنا تنظف وماتلحك
اني قبلت مو على مود أحد بس كفيان شر وجوه
ثاني يوم عطلت من المدرسة ورحت لبيت عمتي
بيتهم هم جبير وحلو
بس وسخ محد ينظفه
جناينها كلهن عازلات ببيوت وحدهن من ورى مشاكلها
وبناتها يجن ويروحن كل شي مايسون
خلف الله على امي هي تطبخ لعمتي ومرات تروح تنظفلها بيتها المعفن
عمتي حايرة بس بروحها
هي مرة جبيرة بس تحب تصغر نفسها لأن رجلها عينه زايغه ويهدد بيها يريد يتزوج عليها
وهي تسوي بالتاتو وتحط بالخبطات
وتخيط قماش أحمر واصفر
وتفتر عند الكشافات هي وبيبي وباقي عماتي المحترمات
دخلت لبيتهم كفيت البجامه
شديت شعري بشالي
ولزمت الماسحه بلشت من المطبخ
لأن ريحته تخزي
عبالي محد بالبيت لأن عمتي أخذت بنتها وراحت للسوك
بعد ماحجن علية وسمعني كلام يسم البدن
ومااعرف شنو المغزى منه
كلمن تزوجت سوت إنجاز عظيم!
المطبخ سويته يلمع لمع
ركبت جدر مركه وتمن
أعرف
لأن ماكو أسهل من الطبخ
اباوع لأمي من جنت صغيرة وبسرعه تعلمت
بدون محد يعلمني
بين ماجنت مشغولة اتذوق طعم المركه
ماسخه رشيت ملح
سمعت الباب اندك
طلعت أشوف منو
لبست شالي وعدلت بجامتي
رجل عمتي اجه بهالوقت!؟
-: شلونج صبا زينه
صبا-: الله يسلمك عمي
اني استحي منه وبنفس الوقت أخاف
بسرعه عفته ورحت للمطبخ ماارتاحله
اجه وراي لزم أيدي
وراد لتبوسني من خدي
-: شلونج
صبا-: زينه
عفته
من جنت صغيرة عادي اباوس رياجيل عماتي
بس من كبرت عيب صرت استحي
وين مااروح يروح وراي
تضايقت كلش منه
أخير شي رحت للغرفة الأخيرة
وسديت الباب
هو ضل واكف بالباب ويدك على كيف
-: اطلعي لتخافين اريد احجي وياج شوي شبيج
بقيت ساكته وخايفه
هذا شيريد مني
-: اطلعي شبيج ليش تخافين مني مااسويلج شي
ماطلعت بقيت سادة الباب علية
راح ورى شوي رجع وهم دك الباب
-: اطلعي صبيلي غدا من ايديج الحلوة
ريحه طبخج مالية البيت
طلعت بس ارجف
أول مافتحت الباب جرني من ايدي عليه
صبا-: عمو شبيك عوفني
-: احبج واريدج
صبا-: عمو وخر شنو تحبني راح تججي عمتي
فدوة اروحلك عوفني لاتفضحني
حضني حيل وبكل قوته
ريحه انفاسه كريهه من كثرة الشرب
لعبت روحي
تندمت شلون فتحتله الباب
ضليت ادفع بيه ودفرته على بطنه
شكبرها منفوخه
كام يصرخ
وصار عصبي كلش
رحت أركض أريد أطلع من البيت
جرني من شالي
شعري انجر وي الشال
تملخ تمليخ
شكد لعبت روحي منه
ضليت ادعي عليه
لك الله لايوفقك عوفنييي
طلعت بالحوش وهو وراي
صبا-: والله أصرخ والم عليك الناس وعود كولي شراح تكول لعمامي وابوي
-: ههه جربي كولي ويصير كتلج حلال
بهالاثناء أحس الدنيا انطبكت علية
كلامه صحيح شلون اطلع هسة
ياربي لاتعوفني بيده
ردت أصرخ بس ماصرخت
شعري مكفش ملابسي تبهذلت وهو يريدني اجيه برضاتي
بالحوش واكفه ارجف وهو يحجي وياي واني بعيده عنه
-: إذا تريدين اخطبج من اهلج والله بس تعاي اريدج كلش
تقرب علية بخطوات هادئة ويحجي بصوت ناصي حتى يهدأني ويضحك علية بلكي ارضخله
اندك الباب هو فز ووجهه صار يضرب ألوان
وكام يباوعلي بخوف
ركضت فتحت الباب
وو
...يتبع
سؤال البارت/ منو دك الباب وتتوقعون صبا تكول انه رجل عمتها تحرش بيها لولا!؟
