بارت قصير لعيونكم
ماهان علية اعوفكم متوترين😘😂
ماكدرت انزل بس هالبارت ولله
وادري قصير
#البارت ٢٦
#زهراء_محمد_السراي
#توأمي-الملعون
*********
صبا
عماتي وبيبي يتشمتن بيا بصفحه
ويتهمني بخطف محمد
ويكوللي لأن إنتي نحس وفكر أول ما الولد تقدملج انخطف
هذا الحجي الي مثل السم بالكوة جرعته
وكمت أفكر يمكن كلامهم صح مو بس هن حتى ام محمد خابرتني وكامت تغلط علية
عذرتها لأن ام ومحترك كلبها على أبنها
ثاني يوم خالتي كالتلي رياض خابر منير ولاكينه
ميت لو عايش ما ادري
كلما اخابر منير ينطيني رفض
إيهاب وأبوه مشغولين بشغلهم ومامتدخلين حتى صدك جذب يخابرون أهل محمد ويتطمنون عليهم ماكو
لأن يخافون ومايحبون المشاكل بس منير جريء ومايخاف بكل شي يجازف
يوم كامل تخابر عليهم محد يجاوب وكلهم غلقوا موبايلاتهم
طيبة تخابر زوجها رياض ومايرد
اني حالي صعب صدك بعدني ماعارفه معدن محمد بس ماانكر وجوده بحياتي مميز
من التفكير عيوني ووجهي الشاحب صرت مثل الشبح مالي لون
حتى شعري كام يتساقط نوم ماانام
ومن غير الحجي الي يحجونه علية
مناه لنص اليل لازمه موبايلي ومنتظرة خبر من منير
غفيت شوي وموبايلي اهتز
بسرعه فزيت
منير يتصل علية
رديت بخوف
صبا-: الو الو
منير -: لكينااااه
جان فرحان واسمع صوت ناس وياه وهلاهل وبجي هوووسه وهو يصيح صياح حتى اسمعه
منير ورياض وأبو محمد ماكالو شلون لكو محمد
والسبب الشرطه منعتهم منعاًباتاً
لأن العملية سرية وهو بس محمد مخطوف هواي وياه ومعجزة جبيرة صارت من محمد سلم من العصابة وما قتلوه
جان بينه وبين الموت شعراية
ماخذين وحده من كلاته والله أعلم شنو رادوا يسوون بيه
محد حجى غير هذا الكلام شكد سألناهم والناس هم سألتهم بس ماحجوا
التزموا الصمت وماعرفنا اي شي عن قضية خطف محمد ومنير وبقت لغز
أهل محمد فرحتهم ماتنوصف خطية
ذبحوا ذبيحه عجل بنفس اليوم
وسوو عزيمه كلش جبيرة
وعزمونا كلنا إحنا وبيت خالتي ام إيهاب
اني صليت صلاة الشكر
جنت متشوقه أروح أشوف محمد اني من شوكت اشتاق لشخص هيج
واتلهف
إحساس جان مميز
يختلف عن شوقي لايهاب لأن جان إحساس مال مراهقين ومبالغ بيه مثل الخيال
جهزت نفسي أروح بس اريد اشوفه واتطمن عليه
رحنا ومالكيناه بالبيت
سألت طيبة لأن جانت تشتغل بالبيت مال عيالها وتعبانه رغم ماجان عدهم خدامه مرة جبيرة بالعمر ووياها بنتها
بس العزيمه كلش ضخمه حتى شيوخ عشيرتهم اجو
صبا-: اكولج طيبة محمد وين ؟
طيبة-: بالمستشفى تعبان باجر يطلع ان شاء الله
صبا-: ليش بالمستشفى مو كالوا مابيه شي
طيبة-: حبيبتي لاتقلقين مابيه غير العافية ان شاء الله بس مثل ماكالوا ماخذين كليته المايخافون الله
وقلة تغذية وهالامور
فصاير عنده فقر دم حاد وتيفو
الله يشافيه انشاء الله إنتي ادعيله
صبا-: ان شاء الله يكوم بالسلامه
كلش ضجت لو ادري ماجاية
كمت افتر بالبيت
مو بيت عبالك قصر كلش جبير وقاطين مو مثل حالتنا
إحنا وين وهم وين
ماعبالي هيج حالتهم
الله يرزقهم بس حالتهم المادية أحسن من حالتنا بهواي
وحقها ام محمد ماتريدني
الفروق هواي هم كلهم دارسين وعدهم شهادات عليا
واني أهلي كلهم اميين ومحد تفكيره راقي
لحد الان بعدهم يفرقون بين الولد والبنت
ومن الناحية المادية هم كلش أغنياء ولهذا دايماً أشوف محمد عنده سيارة جديدة
إحنا حالتنا المادية هم زينه بس مو مثلهم فهيت عالبيت الحديقه تخبللل بيها كراسي وطبلة
نظيفه ومرتبه مخصصين الها فلاح كل يوم يسقيها ويرتبها
وبيها مجروحه جبيرة ومسبح
حديقه كلش جبيرة
لاحظت الفروق بالضبط شنو هي
رجعنا للبيت وبالي يم محمد
خابرت منير هو بالمستشفى وياه أبد ماعافه
دكيت عليه مايجاوب
خفت رجعت دكيت عليه مرة ثانية
جاوبني بعد ماكايلة شي هو كال
منير-: صبا شوي واخابرج هسة جاي احجي وي الدكتور
وسد الموبايل
انتظرته
تالي خابرني
منير-: الو
صبا-: ها منير شنو كال الدكتور
منير-: ليضل بالج ماكو شي
صبا -: اكيد !؟
منير -: بس جرح العملية ملتهب ومتوسخ يعني من شايلين كليته شلون ماكان ولد الحرام
من لكيناه كبل ناقليه للمستشفى
هسة هو زين بس محتاج عناية
الدكتور يكول راح تصير عنده مضاعفات
كليته الثانية مو كلش قوية يعني لازم يهتم بصحته ورى مايطلع من المستشفى ان شاء الله
صبا-: ان شاء الله
منير-: كعد هو وسأل عليج
سكتت مختنكه وضايجه
منير-: الو وين رحتي
صبا-: ها
منير-: محمد يريد يحجي وياج بس تعبان
كلتله بعدين
صبا-: خوش
منير -: شبيج يمعودة لتضوجين مابيه شي كعد يحشش ويضحك عبالك جان بسفرة سياحية
سمعت ضحكه محمد ابتسمت من وحدي
محمد-: ويامن تحجي علية
منير-: وي خطيبتك المستقبلية ثبرتني ثبيرة بالاتصالات وين محمد وين إذا صار بيه شي اسويه بالعشاير والعب بيكم فلك
محمد-: ههههه
لا تردون حالي كبل سديت الخط
وكمت أضحك على منير شكد خبيث هسة شيكول علية خفيفه
أصلا صوجي اني اسأل منير عليه
رجع اتصل بيا من جديد ومارديت كلش مستحية
دزلي رسالة
😂😂😂ولج ردي
شفتها وماجاوبت
رجع دز
بس لا زعلتي يلا عاتي عاتي 😂😂😂
دزيتله😒😠
بعد ولا احاجيك
نمت لأول مرة بعد خطف محمد
شوي ارتاح بالي
ثاني يوم
كعدت نفس الروتين بس كلش مشتاقه للمدرسة مالتي هسة شي اكيد فصلوني لأن صارلي هواي غايبة
كعدت تريكت ووكلت امي وانطيتها العلاج
بس صفنت شلون باجر إذا تزوجت امي منو الها
اني اعرف خالتي ام سعاد ماتقصر بس هي هم كبرت
