#البارت ١١
#زهراء_محمد_السراي
#شارع حيفا
*********
أطياف
هواي بيبي مسولفتلي عن يوم القيامه بس كالتلي اكو رب العالمين أرحم الراحمين
بس بالمدرسة كلش خوفوني
باللحظه الي دخلوا علينا الملثمين مغطين وجوههم أسود بأسود
بس عيونهم طالعه
دخلوا على غرفه الحراسة مالت خالي مؤيد
كل واحد لازم بيده سلاح
من شفنا اسلحتهم وصوت سحب الأقسام كلنا كمنا نبجي
وعلى فرد صرخه
أختي رنده شالت حمودي
ووكعت على وجهها
كلنا نريد بس نكوم من مكاننا بس منكدر
الخوف مسيطر علينا
دخلوا الأشخاص الملثمين على خالي مؤيد
بس حس الرمي نسمع
كلنا نريد ننهزم
لأن شي أكيد راح يدخلون علينا
وراح يقتلونا
الخوف والرعب سيطر علينا
نسوان خوالي مايكدرن يكومن
بادت رجليهن
محد كدر ينهزم
محد من عدنا عنده قدرة وقوة
يكوم على حيله
ويسيطر على حالة الهلع والرعب الي صابتنا
بذاك الوقت العصيب
الصدمه والخوف خلتنا نتراجف
ماكدرت افسر هالشي
بس من شفت بيبي تتشاهد
كلت هذا يوم القيامه
*********
رنده
أطفال تصرخ
ليش مااكدر اكوم من مكاني
صوت إطلاق النار كدر يتخلل بعمق مشاعرنا ويخوفنا
ويرعبنا
الأطفال كلها تصرخ وتبولت على نفسها
بيبي تتشاهد!!!
معقولة هاي نهايتنا!!!؟
من بين كل الأصوات المرعبه
سمعت بيبي
بصوت ناصي تهمس وبخوف صوتها يرجف
بالكوة تنطق
بالكوة تنفهم مخارج الحروف
الجدة-: أشهد أن لا إله إلا الله وحده لا شريك له
وأشهد إن محمداً عبده ورسوله
مستحيل اي حروف تكدر توصف حالة الرعب والصدمة والخوف
الي بيننا
بهاي اللحظه كل ذرة من كياننا تدمرت
موبس اهتزت
خوالي مغمضين عيونهم
واكفين بمكانهم مااتحركوا
فيما بعد عرفت شنو معنى وكفتهم وهم مغمضين عيونهم
معناها خوفهم وعجزهم عن فعل اي شي
محد راح لغرفه الإستراحة مال خالي مؤيد
صوت إطلاق النار عالي كلش
يارب دخيلك يارب دخيلك
بس هاي الكلمات على لساني اكررهن
الأطفال كلها تبولت على نفسها من الخوف
فجأة ويكون مقدمات
صمت
ماسمعنا بعد اي صوت
طلعوا من الغرفه الأشخاص الملثمين بسرعه البرق
صعدوا بسيارتهم وراحوا كلهم
وعم الهدوء
وكأن الخوف الي صابنا مجرد موجه
بعدنا بصدمتنا
وطلعنا من خوفه دخول المجرمين علينا
ودخلنا لموجه رعب
خالي مؤيد لغرفه الإستراحة بس لا
بس لا
بس لا قتلوه
الكل فاتح عيونه وبصدمه
الف تفكير
تزاحم علينا
توجهنا نركض كلنا للغرفه
نشوف خالي
ومن شفناه
ومن شفنا الدم
حرفياً قلوبنا تدمت وتجرحت من المنظر المخيف
شفنا خالي
ملطخ بالدم
وصديقه نفس الحالة
واسوء
منظر صديق خالي وراسه متطشر بالكاع
مااكدر اشرح اي شي
المجرمين ضاربيه طلقه براسه
بقت الصورة المرعبة بنص ذاكرتي
وبخزينه الجانب المرعب من حياتي
جمجمته متفلشه والدم مالي الغرفه والحيطان كلها دم
صديق خالي مؤيد
مات
خالي مؤيد أربع طلقات ببطنه مخروط خرط
كبت العيطه والصراخ
صار من أعلى الأصوات الي تردد صداها بشارع حيفا
صدى قوي ومرعب
خالي صابر يرجف كلنا نتراجف
بيبي تقربت من وجه خالي مؤيد
حطت ايدها على كلبه وراسها تسمع صوت دكات كلبه
صاحت
بي نفس
يممه صابر
بسرعه خوالي شالوه
وركضوا بيه للمستشفى
كلنا رحنا للمستشفى
رجينا المستشفى بالصراخ
وبيبي تبجي مفرفحه
أول مادخلنا المستشفى
الدكاترة كبل دخلوه لغرفه العمليات
همزين مدينه الطب قريبة علينا وماتأخرنا
الدكتور كال لحكتوا عليه بأخير لحظه
خالي مؤيد بعده عريس جديد تقريباً صارله ستة أشهر
متزوج بنت خاله موغريبة علينا بس يموت عليها وهي هم تحبه متفاهمين تزوجوا تقليدي بشور امي وبيبي
كرايبنا والجيران كلهم عرفوا بالخبر هذا وبسرعه بسرعه
الكل التم
اجن خالاتي وأمي أخذت الكرايب كلهم لبيتنا
لأن بيت جدي صغير وماكو مكان رجعت إني وامي من المستشفى بعد ما الدكاترة كالوا ان شاء الله مابيه شي و راح يعيش باذن الله
بس نسويله عملية
امي فتحت باب بيتنا
وكل الكرايب اجتمعوا ببيتنا
بيتنا أكبر من بيت جدي
وأحلى
بيت جدي متهالك وقديم
أقل عاصفه أو هزة ارضيه يوكع عليهم حالتهم موهاكد
بس بيتنا بابا تعبان عليه
حلو جماليته مرتبة
أهل زوجه خالي مؤيد اجوي هم
بيتنا حلو بس موقصر يعني أحسن شوي من بيت جدي
وابوي هم شغله أحسن من شغل
خوالي
يبيع لفات كص
على الشارع
عنده بسطية صغيرة مثل المطعم إحنا نسميها
مانمنا ليلنا
امي عافتني يم الخطار انضغطت كلش ريكي يابس من الخوف
وبعدني ارجفف من الصدمه
يارب سترك
استرنا من هالمصايب
نطلع من مصيبة
ندخل بمصيبة أكبر
صار بيتنا هوسة
ناس هواي
حرت وين اكعدهم
امي من وصلتني للبيت
رجعت مرة ثانية للمستشفى
ثاني يوم الصبح
خالاتي راحن لخالي مؤيد بالمستشفى
وامي رجعت النا
وجهها مورم
رنده-: ها يمه بشري خالي شلونه
صار زين؟
تهاني -: زين زين
تحجي بصوت ناصي وبتعب
تهاني-: سووله عملية
وبعده على الله
رنده-: ونعم بالله العظيم
تهاني-: سوي غدا حتى أخذ منه للمستشفى محد ماكل هناك
وجدتج راح توكع علينا
رنده-: بيبي !
سودا عليا شلونها
تهاني-: كل شوي ووكعت وتخربطت
حقها يمه حقها
كامت تبجي امي
وكل دمعه شكبرها
رنده-: يمه فدوة لكلبج لاتبجين
بوستها براسها وبست ايديها
رنده-: يلا اسبحي
ايديها كلها دم
وحتى خدها لأن بايسه خالي مؤيد بجتفه ومتلطخه
جهزتلها الحمام وثوبها
سبحت امي
واني جهزت الغدا بجدورة وخليته بعلاليك
الظهر امي كالت يلا نروح
اني فرحت اريد أشوف خالي مؤيد واتطمن عليه
بقن نسوان خوالي ببيتنا
وبنات خالتي
هنة شاطرات
رحت اني وامي
من وصلنا للمستشفى خالي صابر شفته سلمت عليه
سألته على خالي مؤيد
كالي طلعوه من العملية واخذوه للقوش( ردهى المرضى)
وشوية شوية صحى من البنج بس يون ونين يهدم الحيل
دخلنا عليه لكيت خالي مؤيد يضحك ومابيه شي
اوف
احمدك يا رب
شكد فرحت
خالي مؤيد مابيه شي
بيبي كاعده عنده وتبجي
خالي عرفنا كلنا واحد واحد
رحتله بوست ايديه وبجيت صار عصبي ماقبل علينا نبجي
كال لاتبجون
اني احجي وياه مختنكه وبعبرتي
رنده-: خالي خوفتنا عليك والله
كمت اشهك
بيبي هم كامت تبجي
مؤيد-: يمه فدوة اروحلج اتطمني مابية شي والله موتشوفيني كاعد احجي وياج وكل شي مابية
يلا يمه روحي للبيت ارتاحي مهدود حيلج من البارحه لخاطري إذا عندي خاطر عندج
روحي يوم
كام يباوع لزوجته
هي كاعده يمه ولازمه أيده وتبجي بسكوت
هو غمزلها إحنا كلنا كمنا نضحك ودالها بوسه
مؤيد-: تعاي تعاي نامي يمي
دتعاي تمددي بصفي مشتاقلج
تهاني-: هههههه أنت بيا حال
امي كالت لزوجه خالي
تهاني-: كومي عيني تمددي بصفف رجلج
خالتي نزلت البردات وسدت الشبابيك ومرت خالي تمددت نامت بصف خالي وإحنا خربانين ضحك على خالي مؤيد
لأن بس يتشاقى ويانا
بيبي اخذوها للبيت ترتاح
ورى شوي اجت ام مرت خالي مؤيد
وياها ريما
جايات وحدهن خوالي ماقبلوا على ريما محد مسوي سوايتها شلون تجي للمستشفى هي والمرة بلاية رجال وياهن
أختي ريما وكحه ولسانها متبري منها
لفلفتهم تلفلف بالحجي
امي خزرتها تسكت
الله يستر من ريما إذا تحط براسها شي لوتنكلب الدنيا تنفذه صدك اني جبيرة امي بس ولاعندي جرأتها ولاقوة شخصيتها
موبنية بعشرة زلم وازيد عمرها جان تقريباً بين ال١٧ وال١٨ يعني كبرت وصارت ماتتحاجى اي شخص يكولها بعدج صغيرة ماتقبل
مر هذا اليوم بخير وسلامه
رجعت اني وامي للبيت وريما هم بالكوة اخذناها ويانة بقت بس خالتي يسر وزوجه خالي وأمها
فرحنا وحمدنا الله وشكرناه
ثاني يوم الظهر كاعدين نتغدا استونا حطينا الأكل على السفرة اجت مرت خالي مؤيد هي وأمها
امي سالتهن على مؤيد
زوجه مؤيد-: مؤيد زين الحمد لله ردت أبقى يمه بس ماخلاني كالي روحي ارتاحي إنتي وامج ورجعنا
ضلت بس يسر عنده
تهاني-: ارتاحي إنتي وخالتي تغدن وسبحن مناه للعصر نروحله كلنا
زوجه مؤيد-: ان شاء الله
خلصنا غدا
وبيبي وكلنا العصرية كعدنا بالساحه منتظرين نجهز كل شي حتى نروح للمستشفى
وسمعنا صراخ
وصوت الصراخ مو مرة ولا صوت غريب
هذا خالي مؤيد
اي هذا صوته
!!!؟؟؟
...يتبع
