العروس في الثوب الاسود

تكمله

بجيت متحملت ، جان نور تجي تلزم جتفي.

نور: لج فد لا يكون ؟ وخلت ايدها على حلكها وشهكت.

عفتها وصعدت اركض فتت للغرفه وبجيت بجي مصاير، ليش علقني بيه لعد ، ليش اهتم بيه ، اذا هو يعرف حاجزيله غيداء، مو جديدة على أيهم مثل ما علق زمن بيه وعافها اني هم عادي يكسر كلبي وين الجديد يعني ، الضاهر شورهم بيد اهلهم .

كمت ابجي عيوني ورمت ونمت ،
كل يوم نور تسألني عندج مشاعر لايهم ، اجاوبها ب لا

الى ان ملت بس حسيتها مصدكتني .

مرت الايام والاسابيع والشهور خلص الشتا واجه الصيف وقرب على نهايته وراح تودعنه سنه ٢٠٠٧
مرت الاشهر بهدوء نوعا  بيها عواصف ترابيه لكن بدون اعاصير .
اكيد متخلو من مشاحنات بيني وبين مروان اللي واكفلي عظمة بالزور

صارت السنه مال بابا وسوو قرايه مله جابوا وهيجت جروحي كلها .رادت نور انزع  الاسود مقبلت ابد ، كتلها انيي انزعه بعدين مو هسه.

علاقتي ب أيهم ساءت متحسنت من بعد ما شفت غيداء وياه حتى السلام كطعته واصلا ما اخليه يشوفني،شكد ما هو مثكل عود ضايج مني اني ثكلت اضعاف ، كم مرة تصدف نتشاوف لو طالعه من الحمام لو من الغرفه ، يباوعلي ويجر نفس ويفوت .

وبيوم طكت روحي كمت دكيت الباب على مروان .
ماكو ميجاوب .رجعت دكيتها ، طلع أيهم يباوع متعجب، يعني شعندج

التفتت واستمريت ادك الى ان فتحها والنوم بعيونه .

مروان: شكو شكو ثبرتي الدنيا، من ما فتحت ليش تلحين.

رسيل: لو شي مو ضروري مجان اجيت عليك.

اتجتف وارتجه على على البااب بجتفه .

مروان: وشنو العندج ضروري احجي.

رسيل: اني ليوين ابقه هيج.

مروان: شون يعني

رسيل: وضعي معاجبني

مروان: شبيه وضعج ، منو مثلج ، شو مدلليج دلال .

رسيل؛ واني مرايده هذا الدلال اريد ارجع لبيت خالو.

مروان: انت بيج جني بين فترة وفتره يفز ويصيح اريد خالو.

رسيل: مروان لتقلد كتلك اختنكت صارلي سنه هنا ومتعودت اريد ارجع كافي عاد .

مروان: هممممم ، الذابحه روحج عليه تراه تزوج .

صفنت بوجهه هذا شديحجي.

رسيل: منو قصدك

مروان: اللي ابالج ، عافج وتزوج

رسيل: حسام

مروان: هو بعينه

رسيل: كذاب منو يكول ؟ وليش اصدك بيك اصلا .