العروس في الثوب الاسود

تكمله

حسام: انتضري يدخلون اول وبعدين فوتي شوفي شلون صار تدافع،و باعي على كيفج دوري اسمج تلكيه بقوائم على الباب وكتبي اسمج على الدفتر لتنسين .

رسيل: ادعيلي حسام الله عليك ، والله راح اتخربط

حسام: ماكو شي سباعيه انتي يلا عيني فوتي .

رسيل: باي

حسام: الله يسهلج

دخلت للمدرسة دورت اسمي اول قاعة ماكو ولا الثانيه لكيته بثالث قاعه واخيرا ، اجاني صوت من داخل القاعه .

طلعو الجنط والكتب برة بسرعه ، فقط القلم الرصاص والجاف والمساحة والمقطاطة اي شي ثاني ما اريد بس اشوفه اعتبره غش .

طلعت شغلاتي من المحفظة وشفت الورقه قريتها ورجعتها ، ودخلت دورت اسمي على الرحلات ، لكيته وكعدت .

ياربي سهلها عليه لخاطر بابا اريد افرحه .

توزعت الدفاتر ، وعلمونة شلون نكتب الاسم وشنسوي ..رفعت المدرسه الدفتر وحجت بصوت عالي..

بنات انتباه ، هاي الورقة الاولى هنا ينكتب الاسم والمرحله والمدرسة الحقول الجوة اتركوها هاي للمصحح، تمام

صارت ثمانية ونص توزعت الاسئله ، زاد وجع بطني ،كمت احجي ويه نفسي حتى اهدأ رسيل اهدي على كيفج ، سهله ان شاءالله ، راح تجاوبين .

_انتي صوتج ويامن كاعد تحجين ، التفتت على الورايه ،

_انتي انتي ..

رسيل: اني ست ..

_اي ..

اشرت براسي اي و سكتت .

وصلت الي ورقة الاسئلة وبلشت احل عفت سؤال الاحكام اخر شي حتى اجيب بيه درجه كاملة ، حليت الاسئلة الحمدلله جانت اغلبها اعرفها بس فراغين ماعرفت حلهن كتبت بكيفي اهم شي ما اتركه فارغ.
وصلت لسؤال الاحكام حليته وكملت ، بديت اراجع
وسديت الدفتر ، كعدت شويه ارتاحيت ، صارت ساعه عشره اله ربع بدو يستلمون الدفاتر ، سلمت دفتري وطلعت اخذت المحفظة ، كلشي مجايبه غيرها لا كتاب ولا جنطة .اني من النوع ما اراجع قبل الامتحان ابد لان احس كلشي ناسيه وارتبك لهذا عفت هاي العادة من زمان.

طلعت واشوف حسام صاير طماطة من الشمس خطيه منتظرني اباب المدرسة .

رسيل: ليش مارحت ورجعت مو حارة عليك موزين ...

حسام: معليج مني شلونج بالامتحان .

رسيل: الحمدلله بس عندي فراغين معرفتهن .

حسام: يعني ٩٥..

رسيل: ان شاءالله ..

حسام : ان شاء الله يلا صعدي..

صعدت وضلينه نسولف على امتحان ثاني يوم ...رجعت تغديت وبلشت عربي وهيج مرت الامتحانات وطبعا ما انسى فضل حسام عليه شكد تعب ويايه، ودرسني .