العروس في الثوب الاسود

تكمله

زهرة: ياخوية الله يزيح همك ويبرد كلبك بجاه كلمن عنده جاه يم الله شكد جنت شايلة هم وخاله ايدي على كلبي من يروح لحد ما يجي اني دمي ناشف.

صادق: هانت ان شاءالله وهنا بنص اهلنا وكلها تعرفنة بعد ماكو داعي تخافين.

راحو بابا وخالو واتفقو على كلشي وبدو يتسوكون
يومية يسوون شغله بالمحل لحد ما كمل وياهم حسام  واصدقاءة ثنين ساعدوهم بشغله الصبغ والكهرباء وتعليك الرفوف .

كمل المحل وبدو يفتحون وبابا من يرجع من الدوام يروح يفتح ومرات من عندة سفر خالو وحسام يفتحون.
اجة رمضان الخير واستعدينه اله اجمل استعداد هاي السنة قررت اصوم الشهر كله والتزم من ناحية الحجاب والصلاة وما افطر جنت اغلس يوم اصوم يوم لا وبيوم اللي اصوم بدون حجاب وصلاتي متقطعة  اصلي الظهر انسى العصر وهكذا هسه لا قررت التزم .

ليلة اول يوم من شهر رمضان قررنة نتسحر بيتنة ونجيب بيبي وخاله سهاد يمنة سوينة سحور وعصاير طبيعية تمر هند وبطيخ وعنب عمة فنانة بالاكل والعصاير هاي شغلتها .
تسحرنة وبقة تقريبا لوقت الاذان نص ساعة فرشنة المصلايات وكلمن قران كدامة الولد ليكدام واحنة وراهم بس اكو مسافة هواي بيناتنة قرينة قران وصلينة الفجر جانت اجواء كلش حلوة وراحة نفسية وراها بيت جدو رجعو للبيت واحنة نمنة ثاني يوم كعدنة ساعة اربعه ونص وبوجهنا لبيت جدو اني وريناد دخلنة كبل للمطبخ حتى نساعد عمة لان متلحك واحنه عائلة 
سوينة الفطور وأذن فطرنة تمر وولبن ورحنة صلينة المغرب وصبينة الاكل ....

بابا حبيبي قرة دعاء الافطار واحنة نردد وراه

خلصنة اكل وغسلنة المواعين و نظفنة البيت ويه عمة واجه وقت الحلو سوت عمة كاستر ومحلبي وخلتهن بكاسات ورشت على الوجه فستق حلب ومكسرات .

استمرت الايام على هذا الحال ويومية ننقهر لان ينقص يوم من الشهر نتمنى ميخلص وسبحان الله كلشي يسهل بيه الطبخ والتنظيف.

بيوم قبل الفطور بساعتين عمة رادت كم شغلة من ابو الاسواق وخالو جان بالمحل وحسام طالع دزتني على بابا للبيت حتى اكله ويروح يجيب .

رسيل: بابا عمة تريد شغلات من ابو الاسواق تكدر تجيبهن

صادق: كتبيهن بورقة وخلي اروح اجيبهن واجي

رسيل : ليش اكتبهن اني حافظتهن اجي وياك وهم اغير جو ضايجة.

صادق: يلا امشي

صعدت بدلت على السريع لبست صايه وفوكاها شال لبسته عدل ولا شعراية طلعت مني .

اني من قرب رمضان وصيت عمة تجيبلي صاية وحجابات الي ولريناد .

طلعنة توني اريد اصعد بالسيارة وطبك حسام بسيارة خالوا ونزل..

حسام: ها خير وين ....

صادق: اروح اجيب كم شغلة امك تريدها ...

حسام: مو ابوية دزني يريدك بالمحل ..

صادق: اجيبهن وامرله ...

حسام : روحله انت واني اروح اجيب الغراض ...

صادق: يلا بكيفك رسوله صعدي ويه حسام جيبو الغراض وارجعو ..

انجبرت اصعد وياه لان اذا اكول لا ما اروح بابا يحس اكو شي مو طبيعي صعدت ليكدام وهو صعد وحرك السيارة ومشينة شفته عبر ابو الاسواق.

رسيل: تره المحل صار ورانة ...

حسام : اعرف ...

رسيل : لعد اذا تعرف ارجع ..

حسام : عندي شغلة وياج وبعدين نرجع ...

رسيل: رجعني هسه لو تنزلني ،

قفل البوب ومشى سريع .......

يتبع.....