العروس في الثوب الاسود

٣٥________٣٦

البارت الخامس والثلاثون

يا طارق الباب رفقاً حين تطرقهُ

فأنهُ لم يعد في الدار أصحاب

تفرقوا في دروب الأرض وأنتثروا

كأنه لم يكن أنس وأصحاب
______________

اخذو بابا للنجف دفنوه بصف ماما ، الله يرحمهم ،

البارحة ادعي ربي يحفظة النه واتخيل هو بيدة ياخذني يسجلني بالكلية  ، واسرح بتفكيري من ألبس البدلة وهو يسلمني لزوجي ، واليوم ،اترحملة ،

اباوع الكل كاعد طبيعي ، نسوان بيت جدي منتضرات الزلة على عمة زهرة ، حتى ينافقن ، خواته عمرهن مافكرن يشوفن بابا لو حتى يتصلن بيه على الأقل. بس هسه لا طلع اخوهن والعزا عزاهن ، وكاعدات حسب الاصول ، ويحاسبن بعمة .هاي ليش هيج ، وهاي ميصير.

رجعوا من الدفنة ، بليل دخل مروان وعمو علي وخالو محمد، اخذو من خاطري ، اجة خالو كعد يمي بالكاع يحجي ويبجي ، واني كلبي خلصان لو شما يحجون هسه ميبردون ناري ، بركان مشتعل بصدري وياكل دواخلي ، من اتنفس ، الزفير يطلع حاااارر يحرك بلاعيمي حرك...

حجه مروان وجان صوته تعبان ...

مروان: كومي جدة نرجع لهلنة ، الدنيا مكلوبة هناك وانصب الجادر اعتبروا اليوم اول يوم ،ولازم هسا نطلع يادوب نلحك، باجر من الصبح كون احنة واكفين وي الزلم.

الجدة : يلا امشينة، لبسن عبيجن يبنات.

صافنة عليها مرية قوية وبحيلها ومبين الكل يخاف منها ، بس كالت كومن ، تطافرن وحدة تلطخ بالثانية.

راحوا واستغربت شعجب ما استفسروا على قتل بابا ، منو قتله وليش وشلون، اباوع البيت متروس نسوان والعين عليه، أقل تصرف اسويه ينتبهون ، اريد بس فرصة حتى اشوف حسام وأساله على بابا ، ماكو ..

النسوان كاعدات واني روحي تلوب، كمت فتت للحمام غسلت وجهي ، اباوع بالمرايا وجهي خريطه صاير احمر على ازرك وشراميخ ، عيوني داخلات بنكرة ، صفنت على روحي الظهر وين جنت وهسه وين ، حسام عازم العالم حتى يعلن خطوبتنة ، اجوي نفسهم يعزونة بوفاة بابا، دنيا غريبة وغدارة ، مالها أمان ، الدنيا عبارة عن امتحانات ودروس وعبر ، فاز اللي نجح بالامحتان وتعلم من الدروس ، واستفاد من العبر .....

(هاي ثاني صفعة الي، والله يعلم شنو ضامتلي الدنيا بعد .)
...
جريت نفس وطلعت ، شفتهن ملتهيات ، تسحبت على كيفي وطلعت للطرمة شفت خالو وحسام كاعدين واكو رياجيل ازواج خوات عمة زهرة ..

دكيت باب المطبخ على كيفي حتى يسمعني حسام ويجي ..

رفع راسه بأتجاه المطبخ يعني انتبه عليه، كام واجه دخلت وكفت على صفحة اجه يمي ، حاله امر من حالي...

حسام: حبيبتي البقاء بحياتج بالي يمج وكلبي ممرود على عمي وعليج ..حجاها و كام يبجي .

واني ابجي ..

حسام: كولي محتاجة شي ...

رسيل: لا بس ردت أسألك على بابا ...

حجيتها والعبرة بزردومي خنكتني...

حسام: باعي منو فوك بغرفتج ....

رسيل: ماكو احد عمة قافله الغرف مالتنه...

حسام:صعدي ارتاحي لتبقين كاعدة بنصهن ، اكلتي ، اكيد لا ..

رسيل: ما الي نفس، حسام اني متت ما اتصور أكدر اعيش طبيعي ورة بابا.

حسام: بعده جرحج جديد ، كلشي بالدنيا يبدي صغير ويكبر اله الحزن يبدي جبير وبعدين بأرادة الله يصغر وترجعين لحياتج وتمشي ،
اني ما اكلج تنسين ماكو واحد ينسى جان نسينه عمة سوسن بس تتناسين حتى تكدرين تكملين حياتج اللي مجبورة تعيشيها سواء بفرحها اوبحزنها ، الله يعينج ويعينه على فراك عمي ، ماكو بطيبته وحنيته واخلاقة ، اوووف ،الله ينتقم منهم اخذو غدر.

رسيل: حسام منوو كتله ، الله عليك ،عرفتوهم ، زين من رحتو للمستشفى بيه نفس حجة وياكم ، سأل عليه عفيه جاوبني الله يوفقك.

لازمة ايدة واهز بيه اريدة بس يحجيلي.

حسام: شاكين ابيت سالم همه السبب بقتل عمي..

رسيل: يا سالم خاف...

حسام: اي هو صديق شجن ...

رسيل: لا ياكلب ليش ليش مو بابا ما اخذ منهم فلوس مو سكت عنهم هاي جزاته ..

حسام: همة مو علمود الفلوس اعتقد ياخذون بثار ابنهم لان عمي سكطة وذبه .

رسيل:زين شلون عرفتوهم همة ..

حسام: ناس شايفين ابنهم الجبير يلاحك عمي من اجه لسه عبالهم صدفه، واليوم من انضرب عمي هو جان واكف بدراجة بعد كم مترر ومن شالو عمي للمستشفى راح.

رسيل: وليش سكتولهم اهل بابا سمعوا بهلشي .

حسام: اي كلنالهم.

رسيل: شو سكتوا وما سسووو شي ما اخذو بثار بابا.

حسام: رحنة الهم لكيناهم شايلين قبل يومين ، يعني مخططيلها زين .

رسيل: كلبي محروك يعني هيج يروح دم بابا هدر ومحد ياخذ حقة راح اتخبل .

حسام: شوفي مادام عمي على حق وهمة باطل ربج يطلع حقة وينقتل بنفس الطريقة القتل بيها عمو ( وبشر القاتل بالقتل) ..

رسيل: شفته بالمستشفى حجيت وياه جان متأذي شنو كال اخر شي .

جر حسرة طويلة وكال....

حسام: ارتاحي بعدين احجيلج وعد بس مو هسه.

رسيل: ابوس ايدك بس كلي كلشي ما اريد منك.

حسام: وعديني اذا حجيتلج ، ماتبجين ولا تسوين اي شي وتروحين تنامين.

رسيل: وعد بس احجي .

حسام: من وصلنة للمستشفى جانت اخر انفاسه،

سكت وكام يبجي ....

رسيل: كمل عفيه ادري صعبة عليك بس اريد اعرف .