العروس في الثوب الاسود

تكمله

زهرة : خويه بروح العزيزه الغالية لترفض هلمرة والله لو الحجيه ما واكعه فلا اكلك ،، اني اريد وحده تساعدني وتعيني بلبيت لخاطري لتعاند بناتك كاعد يكبرن وابنك و يرادلهم مداراه فكر الله يخليك .

بابا سمع الحجي وسكت حسيت من سكوت بابا راح يوافق عفتهم وصعدت ابجي وره شويه اجتي ريناد متخبله  

هاي شنو بابا صدك راح يتزوج ..

رسيل : ليش شنو وافق ..

ريناد: اي كال لعمة انتي شوفيلي وحده على معرفتج لج شلون بابا حيتزوج وحده غير ماما وتجي تعيش يمنه والله ما اخليها تجي هنا اذا اجتي اروح لبيت جدو  اعيش...

رسيل : شو اسكتي من هسه تدورين مشاكل كومي طفي الضوه اريد انام ...

عافتني وطلعت ضليت افكر شلون بينه من ناحيه تجي تساعد عمة وهم تدير بالها على اران من احنه بالمدارس وبابا بالدوام ومن ناحيه افكر اخاف تجي وتأذينه اوووف ممكتوب علينه الراحه ابد .

ثاني يوم اجه بابا الصبح وكال بدلو انتي واختج وتعالو ورايه لبيت جدج.

رسيل : اي بابا ..

بدلنه ورحنه لبيت جدو ،، بابا كللها لعمه..

صادق : ام حسام يابه هذا اران خليه يمج ولو زحمه عليج اريد اخذ البنات ونروح لأمهم نزورها .

زهرة : عمت عيني جيبه وروح والله لوما الحجيه وسهاد اله اجي وياك ..

صادق : مره الجايه نخلي محمد يمهم واخذج وعد ..

زهرة : ياريت طاك كلبي عليها ترحون وترجعون بالسلامه ..

صادق : الله يسلمج..

طلعنه صعدنه بالسيارة وتوجهنا للنجف بابا دفنها هناك وكتب وصيه لخالو اذا مات يدفنوه بصف ماما .

الطريق كلش طويل ومتعب وصلنا للمقبره نزلنه ..

وضلينه نمشي بين القبور ،،،لكينه قبر ماما بسهوله لان بابا على طول يجي الها اول ما صار الكبر كبالنه بابا كام يبجي ويشهك نام على كبرها واسمعه يحجي ويبجي..

صادق: لج سوسن وين عفتيني ورحتي شلون نطاج كلبج تعوفينه لج كومي لبيتج ولبناتج بيتج وبيت اهلج انهجم من بعدج انتي رحتي واخذتي كل الراحه وياج يابعد راحتي وعافيتي لج كومي يريدوني اتزوج ترضين اتزوج غيرج ترضين اشم عطر غير عطرج ترضين حبيبج يروح منج بسهوله اخ يانار كلبي تدرين شنو اكثر شي قاهرني وخلاني اكره روحي قبلت اتزوج قبلت اني ما استاهلج خنتج اني واحد خاين ميستاهل حبج وكام يصرخ ويبجي واحنه يمه حاضنيه ونبجي على بجيته وراها كام جاب مي وغسل القبر ،،،قرينه الفاتحه وعفنه روحنه يمها ورجعنه ........
يتبع ...