العروس في الثوب الاسود

تكمله

هزت راسها وكالتله اي. بليل سمعنة بابا يحجي وياها كللها اي شي يخص البنات ما الج دخل حياتج وحد وهنة وحد ما اقبل اي كلام زايد وياهن ينامن يكعدن يسهرن اي شي يسوونه ما الج دخل عليج بحالج وبس.

شجن: صار عيوني انت بس لتزعل .

صادق: تصبحين على خير

شجن : وين

صادق: وراية دوام .

مرت الأيام والوضع نفسه متغير شي اللي تغير هو الحرب الأمريكية على العراق بيوم جنة كاعدين بيت جدو ونسمع الاخبار الوضع كلة ميطمن ناس تكول هذا انقلاب وناس تكول راح تصير حرب ويتغير الحكم وكل شوية خبر شكل واشاعة شكل الى أن كعدنة الصبح على القصف طلعنة نركض من الغرفه مالته وبنزلتنة من الدرج شفنه بابا ديصعدلنة وبيدة اران .

صادق: رسوله حضرو كم قطعة ملابس وتعالو ..

رسيل : وين نروح..

صادق : لبيت جدكم ننجمع هناك ونقفل البيت ..

رسيل : ماشي..

التفت على شجن..

صادق : شجن انتي هم استعجلي ..

هزت راسها وفاتت لغرفتها

.لمينة ملابسنة ورحنة كلنا بيت جدو .

صار خوف ورعب والضرب كلش قوي بغداد احتركت حرك.

محمد: تره مو مال نضل هنا امشو نروح لبيت عمي راضي بالانبار..

صادق: يابيت عمك راضي ليش القصف بس بغداد اكيد المحافظات كلها ..

محمد: لا يابة بغداد أكثر يصير بيها قصف لان مركز،، المحافظات أكيد اقل.

صادق: تريد تروح اخذ عائلتك والله وياك أني واطفالي باقين هنا وبالنسبة للحجية وسهاد نسيت وضعهم شلون تاخذهم وطريق طويل بله انسد الطريق ولازم تمشون شنو تسوي بهيج حاله.

محمد: والله هاي مامحسبلها شمدريني شفت الناس كلها هجت كلت بس احنة ضلينة .

صادق: الشي قبل لا تحجيه فكر بيه من كل الجوانب يفيدك لا يلا تغرد ..

محمد: انت متصدك تلزم عليه لزمة فيلسوف زمانك..

صادق: لان احجي الحق اصير فيلسوف زماني .

ضحك خالو محمد..

مشت كم يوم والكهرباء انضربت ضلينة على اللاله والفوانيس ..

والليل كلة نكضيه بالحديقة سوالف وضحك وبابا وخالو وحسام يلعبون دومنة وطاولي وعمة وشجن سوالف صارن صديقات حيل قوت علاقتهم اخر فترة .

ثاني يوم المغرب كاعدين واندكت الباب حيل كام بابا فتحها طبت ام شجن تدك وتلطم وتعيط يبووو لحكولي....

يتبع....

العروس في الثوب الاسود
البارت السادس عشر

دخلت أم شجن تدك وتلطم وتعيط يبو الحكولي
ركضو كلهم عليها يريدون يلزموها ماكو ملخت نفسها تملخ عمة زهرة تحضن بيها وتهدي وماكو مستمرة الى أن عاطت شجن من مكانها  ابد متقربت يم امها  الوحيدة ضلت كاعدة...

شجن: كافي عاد خلي نفتهم شبيج ثبرتينة ...

ام شجن: ولج اخوانج راحو،، راحو عزوتج ..

شجن : غير تحجي وين راحو فهمينة كافي بجي ...

ام شجن متربعه بالكاع و تناشغ بالبجي وتحجي

ام شجن : ولج اليوم صعدو بالتريلة( شاحنة _ لوري) وراحو يجيبون حصو ورمل وطالعلهم رتل مال امريكان ورمو عليهم ....

محمد: منو بلغكم حجية خاف الخبر اللي وصلكم كذب

ام شجن: لا يمة لا متأكدين جماعتهم بغير تريلة همة اللي كلولنة...

صادق: لااله الا الله كومي حجية غسلي وارتاحي وهسه نروح اني ومحمد نسال جماعتهم ونتأكد ...

ام شجن : اي يمه فدوة لطولك اروح..

اللي خبلنة وخله عقلنة يوكف شجن مابدر منها اي رده
فعل لا بجت لا عيطت عادي وتتصرف طبيعي احنه بجينة وتأثرنة وهيه لا...
دخلن هيه وامها بالهول وبابا وخالو محمد وحسام طلعو يشوفون شنو الموضوع وعمة زهرة طلعت بالحديقة شالت المواعين واستكاين الجاي..
اني وريناد بالمطبخ بس اللي يحجي بالهول نسمعة.

ام شجن: ولج ادري بيج فرحانة بموتت اخوتج بس  بالجذب ابجي نزلي دمعه كدام عيالج شيكولون عليج.

شجن :شيكولون خلي يكولون ميهمني وعلى شنو ابجي عليهم خلي ابجي على روحي شمروني لواحد متعقد من الدنيا وراح يعقدني وياه شكد كتلهم ما اريده اني صغيرة ما ناقصني شي لا اله تتزوجيه خوش رجال وانتي كبرتي منو ياخذج بعد ونريد نخفف حمل حتى نتزوج احنة. عبالك جنت عاله عليهم وبس يريدون يخلصون مني وعبالج ناسية سوالف الضرب مالتهم الي ومن زينو شعري بالموس قبل اربع سنين ومن فشلتج تكولين للكرايب طلعت براسها ثعلبه وزينتها.

ام شجن: شتريدين اكول للعالم لكفوها اخوتها عدها علاقة بواحد وطالعه وياه لو تردين اخوتج يطبطبون على ضهرج ويكولون عفية استمري بتلويث سمعتنة بالوحل.

شجن: مامسوية غلط حبيت قابل كفرت والولد راد يتزوجني

ام شجن: اي طبعا كفرتي من تسوين علاقات من ورانه كفرتي وهو وينه شو ما تزوجج ضحك عليج وعافج.

شجن: ليش همة ولدج نطوه مجال يخطب شو جنزوه تجنز خلوه يصيح التوبة بعد اذا اتقرب لبتكم.

انصدمت من اللي سمعتة مكدرت استوعب الكلام معقوله هاي هيج قذرة طلعت اندرايت واشوف عمة زهرة ورايه تخرمش بخدودها .

زهرة: يايمة تعزينة وتصخمنة عزة بعيني شلون  بصادق اذا عرف يمة رسوله لا تحجين شي اروحلج فدوة والله اذا عرف ابوج يروح بيها .

نحجي همس علمود ليسمعونة جرتني عمة للطرمة .

رسيل: اول مايجي بابا اكوله ما اسكت على شنو تبقة هنا ترجع منين ما اجتي اصلا بابا مطايقها...