العروس في الثوب الاسود

٥_________٦

دخلت وشفتها تخنك ب آران عطت بيها هاي شدتسوين انتي،،

على صوتي اجتي عمة زهرة تركض وخرتها واخذت اران ،،
ضل يكح حبيبي ومخنوك كوة يتنفس كامت تطبطب عمة على ضهرة وتنفخ بوجها شهك حيل وبجة ضل يصرخ ،،،
طلعته برة سكتته سوتلة ممة شربها ونام ،،،،

ما حجينه ويه ريناد لان اذا حجينة وياها تاخذ طبع السكوت لو تعاند ،،من اجوي خالو وبابا حجتلهم عمة زهرة على الصار .

صادق: صدك والله اليوم اله اكسرها ليش هيج تسوي هاي تخبلت فد نوب شافتني كاعد اسايسها وساكت على سوالفها كامت تتمادة بالغلط .

زهرة : عوفها بروح سوسن لاتضربها بس احجي وياها.

صادق: لا والله فلا اعوفها اذا ما اربيها من جديد ما أطلع صادق وخري ام حسام عني ....

يحجي وكلبه محروك...

محمد : عوفها يمعود شبيك كبيت هذا منين ينطفي هيه طفلة، اللي يسمعك يكول كاعد تحجي على وحده عمرها عشرين سنه تذبح وتصلخ مو هيه تايهة الك.

صادق: لعد شلون اعوفها تتمادى بابه هاي تاخذ الخباثة للكبر هاي رسيل يومية باجية من وراها ومن اجي اسألها متقبل تحجيلي مرات اصعد بسكوت اسمعها بليل تحجي ويه اختها وتعلمها لك رسيل تربيها وتعلمها ومتنطي بيها كدامي واني ابوها هيه شنو فرقها عنها..

رسيل شايلة عقل يوزن بلد هدوء وأدب وكلشي تريدة تلكاه عدها والله تركض كدامي من اريد الحاجة وهاي عكسها بكلشي تعبتني وتعبت اختها عبالك جاي تنتقم من عدنه ادري اعدائها احنه حتى من رحت سألت عليها بالمدرسة اول مافتت للأدارة كتلهم على اسمها رأسن عرفوها لان يومية شكوة عليها ومستواها الدراسي بالنازل واليوم ختمتها تخنك بأخوها تعبتني شسويلها فهموني مو والله راح اتخبل.

حسام: عمو ترة ريناد ما جانت هيج ورة وفاة عمة تغيرت...

صادق: اي عمي هذا حظ عمك الاعوج ..

محمد : روح لبيتك ارتاح واخذ رسيل وآران واذا تريد عوفهم هنا يمنة واني اشوف شنو موضوعها .

صادق : رايح بس بروح اختك تحجيلي الصدك لتضم عليه شنو تكلك وبشنو تفكر...

محمد: ماشي ليضل بالك..

طلع بابا واحنة ضلينة بيت جدو علمود نتغده وهم أران يبقه يم عمه راح خالو يم ريناد ورة نص ساعة طلع و اجة يمنة كعد..

زهرة : ها بشر شكالتلك ...

محمد: اول شي ساكتة ما تحجي ابد تكولين عبالك حلكها مخيط بعدين جبتها منا وديتها منا كتلها ترة امج زعلت عليج وكالت ماحبها لريناد لان صايرة وكحه وتأذي اخوها واني كاعده أتأذة من وراها تدرون شنو كالتلي.

زهرة : شكالت بله.

محمد: والله صفنتني كالت سمعت بابا يكول كله صوجه من وراه ماما راحت وحتى بابا ما رادة وما يحبه بس انت كتله لا اله نجيبة واني لان هو موتها لماما اني اريد اموته و اخلص منه.

زهرة: يايمة سودة بوجهي هاي الطفله تعقدت شلون بينة شنسوي .

حسام : ودوها طبيب نفسي بلكت تتعالج هاي اذا تضل هيج اول فرصة تصير الها راح تسوي شي للطفل.

محمد: راح ابلغ صادق واشوف شنو رأية بالموضوع .

صار العصر وراح خالو لبابا واتفقو يعرضون ريناد على طبيب نفسي ...

ثاني يوم راحو بابا وخالو سألو على طبيب كلولهم على واحد بشارع فلسطين كلش زين اتفقو ياخذوها ثاني يوم هذا الحجي ريناد لحد الان متدري وحابسه روحها بغرفه خالو وماخذه وضع السكوت ومرات تبجي..

رجع بابا اخذها وراح ورة ساعتين ونص اجوي لبيت بيبي اول ما دخل سألته بيبي .

البيبي : ها يمة صادق بشر شنو كال الطبيب .

صادق : ثأوري حبيبي هاكم فلوس وروحو انت وريناد اشترو وتعالو...

نطاهم بابا فلوس وراحو علمود يحجي براحته .

صادق : والله ياحجية شكلج الطبيب من حجه وياها كدامي ما قبلت كلشي تحجي بعدين طلعني برة كال خاف ما تاخذ راحتها اتفضل بالاستراحة طلعت كعدت تقريبا ساعة كاملة انتظر ورة الساعه صاحني السكرتير دخلت.

صادق : ها دكتور بشر تاخرت حيل ...

الطبيب: والله شكلك البنية وضعها النفسي حيل تعبان متعرضة لصدمة خلتها تكره كلشي حواليها وتريد بس تأذي الله يصبرك لان وراك علاج طويل.

صادق: زين شسوي والله مستعد اي شي تكلي عليه اسويه بس ترجع بنتي مثل ما جانت زين دكتور كالت الك شي عن اخوها .

الطبيب : لا هيه ما كالت اله أني سالتها كتلها تحبيه او لا ما ردت علية اكتفت بهز راسها معنى لا.

صادق :هااا زين كل كم يوم اجيبها...

الطبيب: مرتين بالاسبوع علمود تتعافى بشكل اسرع.

زهرة : ياربي الطفلة جانت مثل الورد وينها وين الطبيب النفسي الحمدلله يارب كلشي يجي منك حلو وراضين بيه .

مرت الايام والاشهر وبدت ريناد تستجاب للعلاج النفسي وبين الفرق عليها من خلال تصرفاتها ويانه بلبيت بدت تتقبل وجود آران بيناتنه وبابا خطيه كضاها يومية ماخذ اجازة من الدوام ومكابلنة وكاعد ،،،،

كام يودي ويجيب للدوام ويدرسنة من عدنه شي صعب وشويه شويه رجع مستوى ريناد الدراسي يتحسن،،،

آران كبر حبيبي ونشنش صار عمرة سبع اشهر تعلقت بيه وكمت اموت عليه و على طول شايلته.

زهرة : يمة ضهرج ماتعب شايلته وتفترين خوش تعلوم علمتيه .