العروس في الثوب الاسود

تكمله

صادق: لا هاي مرية عدها ايتام وتدور شغل واني صارلي فترة أسال على وحده زينه وبنت اصول دلوني عليها راح تجي يومية الصبح تكمل شغل البيت كله وتساعدج بالحجية وسهاد وترجع الضهر زين .....

زهرة : الله يوفقك ان شاءالله وياربي تطلع خوش مرة

صادق : ان شاءالله اصيح الها علمود تتفقين وياها

زهرة : صيحها خلي تتفضل ..

دخلت المرة وبابا طلع واتفقت هيه وعمة زهرة تجي بين يوم ويوم .

بدت تجي هاي المرة الصبح تشتغل وتسوي اللي عليها وتطلع عمة زهرة حيل ارتاحت لان خف الحمل عليها

ومن تجي لبيتنه تنظف ولازم بوجود بابا لو عمة زهرة ميقبل تدخل اذا بس احنه البنات يكول كلشي يصير الحذر واجب ليش ما فد يوم احنه بالمدارس وعمة زهرة فايته تسبح ومأمنه عليها يم بيبي وخاله سهاد
كومي وغافليهم على اساس تكمل شغلها طلعت رايحه لبيتنه و تندل وين نخلي المفتاح ومفردشة( مهوسة) غرفه بابا كالبتها كلاب ماكو شي بمكانة ماخذه الفلوس ومهزومة ........

يتبع.......

العروس في الثوب الاسود

البارت الثامن

لحضة لا هالدرب بيه ذكريات
يعني من دون الطرق من دونها

كون ذيج الشجرة تنكص وتموت
وكون هاي المسطبة يشيلونها

فدوة ذاك الجسر لا تعبر عليه
هنا حلفنة العشرة ابد منخونها

وكلي هم يمر وكت تنساني بيه
كتله من جنازتي يشيعونها

أنا لو ناسيك ومغادر هواك
الرجفة هاي بجسمي شيسمونها

وليش أغاني التطلع تذكرني بيك
دموعي تنزل كبل ما يبدونها

نعمة النسيان اكبر جذبه هاي
ما تصرف بعد لتعيدونها ..

_______
.
زهرة : ها يمة رسوله جيتي
رسيل : اي عمة اجيت صارلي ربع ساعه

زهرة : اختج وثائر اجو بعدهم ...

رسيل: لا بعدهم بس اني اجيت من وقت لان اليوم اجتماع الأمهات ...حجيتها وسكتت اختنكت نزلت دموعي.
اجتي عمة زهرة حضنتني

زهرة: يايمه ليش تبجين اني امج حبيبتي لو كايلتلي جان اجيت وياج..

رسيل : ما صار شي عمة عادي لتهتمين..

مسحت دموعي وكمت غسلت وجهي ورحت للمطبخ صبيت تمن وفوكاه مركة فاصوليا يابسه حيل احبها اكلت ورحت نمت يم بيبي على جربايتها ..

البيبي: هله بحبيبتي تعالي.

تقربت منها باستني وضلت تلعب بشعري لحد ما غفيت .

وره ربع ساعه حسيت على هوسه الولد وريناد اجوي من المدرسه واران وياهم يهوس على واهسهم يموت على الجهال واللعب .
كمت رحت يمهم بالهول كاعدين كلنا فات خالو سلم وكعد ،، راحت عمه صبت الغده  وكعدو تغدو ،،، كمت اريد اروح للبيت حسام صاح وين .

رسيل : للبيت اريد انام شوية واكعد اقره ..

حسام : انتضري اني اوصلج ..

طلعت وحسام اجه ويايه دخلت للبيت  يلا راح...

اول مادخلت حسيت اكو شي بلبيت صحت ..

رسيل : بابا شنو جيت ..

ماكو محد يجاوب اباوع الهول مخربط دخلت لغرفه بابا واشوف الدنيا مكلوبة بوب الكنتور مفتوحه،، الهدوم مطشرة المجارير كلهة بالكاع تخبلت كمت ارجف من الخوف كلت هسه يطلع الحرامي ويكتلني خلاص كمت امشي سريع واتلفت منا ومنا على ما وصلت باب الطرمة قطرة دم ماضلت بيه صحت بصوت عالي،، خالو عمة الحكولي حرامي حرامي ركضت لبيتهم ومستمرة اعيط طلعو حفاي يتراكضون صاحو شكو خير يمعودة

رسيل : خالو حرامي بلبيت...

احجي وحلكي يابس من الخرعه ...

محمد : شفتيه بعينج ...

رسيل : لا بس البيت مكلوب ..

ركض خالو وعمه واني وراهم اول ما دخلنه لكينه حسام بالهول رايح للبيت اول ما سامع عيطتي ،،

ومدور البيت كله ..

محمد : هااا لكيت شي ...

حسام : ماكو احد فارغ البيت ...

ضلينه نفر براسنه ياحرامي هذا اللي يطب ويقفل الباب ويرجع المفتاح بمكانه . حسبه تودينه و حسبه تجيبنه
انتضرنة بابا على ما اجة جان طالع بشغلة
وحجيناله كلشي ، راح لغرفته ورة شوية طلع وعيونه براسه ...

صادق :  هذا الباكني حرامي بيت ..

محمد: شنو قصدك يعني منه وبينه ...

صادق: هاي شبيك يمعود اشك بنفسي وما اشك بيكم بس القصد  واحد فايت لبيتنه ويندل مكان المفتاح وين نخليه وشمعنى بس غرفتي مهوسه اكثر شي .

محمد: اني ابالي شغله بس حرام اظلم حضي وبختي..

صادق: اني اكلك هيه ماكو غيرها ..

محمد: انت فهمت شنو اريد اكول حتى تحجي

صادق :اي تقصد المرة الي تنظف اني هم اول ماحجيتولي كلت ماكو غيرها لان الوحيدة اللي تندل المفتاح وين هيه من اجتي تنظف البيت شافتني منين طلعته .

عمه زهرة لطمت على صدرها وكالت.

زهرة :  ياااا واني نسيتها اليوم والتهيت برسيل جانت تبجي وراحت من بالي عفتها يم عمتي وفتت اسبح طلعت لكيت رسيل راجعه من المدرسة وهيه ماكو..

حسام : هيه ماكو غيرها تندل بيتها مو عمو ..

صادق : اي ورانة بفرعين ...

محمد : امشي نروح نطيح حضها ..

صادق: هاي شبيك غير اكو دليل شي يثبت هيه بايكة خوما نروح نهد عليها وهلمرة تفتر السالفه علينه وتعال جيب عمامك وخوالك ويزوعونه العافية ...

محمد: هم صدك لعد شلون شنسوي هسه...

صادق : ندز زهرة تروح تحجي وياها وتهددها تكللها شافوج الجوارين واجوي كالو النه اذا مترجعين الفلوس نرفع دعوة عليج وتنحبسين .

محمد: شكد الفلوس بله ...