العروس في الثوب الاسود

تكمله

محمد: عيني ام احمد بلكت ترحين للمستشفى بمكان ام حسام كلش تعبت خاف هم توكع مابيه حيل بعد اريدها شويه ترتاح وتبدل وارجعها وهم تحضر عزة سوسن والله تتخبل اذا ماحضرته هيه هناك وتبجي وتلطم لمت الناس عليها لا اكل ولا شرب صارلها يومين ..

ابتهال: تدلل ابو حسام هسه البس عباتي واجي وياك ..

اخذها خالو وراحو ورة نص ساعه دخلت عمة زهرة..

هلكد بجت وعيطت ملخت نفسها عبالك توها سمعت بخبر ماما وعاى بجيها النسوان تبجي،،،

خلص العزة وراحت الناس فرغ البيت علينه وبدت الوحشه ،،، عمة  زهره وعمة ابتهال يتناوبون بين البيت والمستشفى و نبراس هنا تسوي اكل للولد وعينها على بيبي وخاله..

بيبي طول فترة العزة هيه على المسكنات لان موزين عليها البجي ، اول ما يفكها المسكن تكعد تبجي وتبدي تلطم يرجعون ينطوها مسكن ...

مر اسبوع على وفاه ماما والبيت كئيب وزواياه مملة ومظلمة..

بيوم السابع كاعدين بالهول اجوي نسوان الطرف،، هاي اللي تقرة قران ع روح ماما وهاي اللي تصبر بعمة زهرة وخاله سعاد ،،،
ورة شويه سمعنه صوت رياجيل عالي  طلعنه نركض للطرمه لكينه بابا واكف وداير مدايره رياجيل ويصيحون بصوت عالي .

حجه علي ابو مروان اخو بابا الكبير  ( بعدين عرفت هذا عمي )

علي : اسمعني صادق  المرة وراحت لدار حقها وانت صارلك سنين مقاطعنة واللي بسببها صارت القطيعة و المشاكل وقطع الارحام راحت يم رب كريم .

جاوبه بابا منتفض...

صادق : هاا يعني ام رسيل هيه اللي جانت تدور مشاكل وقطعت الارحام مو جزاك الله خير جاييني مناك لهنا ومتعني وقاطع مسافة وجايب هاي الزلم كلها وياك علمود تهيني وتهين زوجتي وتكسر عزاها ما استحيت  ماخجلت من نفسك .

صاحو الرياجيل  كول ياالله ابو رسيل مايصير هيج كلشي  بالتفاهم .

حجة جواد أبو حازم اخو بابا الثاني

جواد : صادق خوية احسن الله لك العزاء اللي جنت مقاطعنه علمودها راحت واحنه بهاي جيتنه نريدك ترد لديرتك وعشيرتك وابوك الحجي هو اللي دزنه عليك وكال ماتجون اذا ما تجيبوه وياكم.

صادق : بلغو للحجي الله يطول بعمرة خلي ينسى عنده ولد اسمه صادق هو مو تبرة مني وطردني من بيته كدامكم وكدام نسوانكم وخجلتوني ويه زوجتي بعد شكو ،،،خصم الحجي لا ادوخكم ولا تدوخوني اني ماعندي اهل اهلي بيت ابو علاء وبس.

حجه جابر ابو قسور اخو بابا الثالث

جابر : والله ما مرجية منك ياخوية يا ابن ابوي عيبه عليك وكفتنه هنا وتحجي هيج حجي لو ما عندك عزة جان عرفت شلون اتصرف وياك امشونه مالنه حجي وياه بعد .

علي : ماكو ما يضل هنا يرجع ويانة و يلزم حلال ابوه  وبناته يتربن عدنه مو عند الغرب.

خالو محمد صار عصبي كال...

محمد: ياغرب ابو مروان عيب هالحجي احنه اهلهن واني ربيتهن ع ايدي الله شاهد مافرقهن عن أولادي .

صادق: خوية ابو حسام انت الاخ اللي ماجابته امي ،،
انت سندي بهاي الدنيا واني للموت ماعوفكم ولا اعوف بيتي وبناتي يربن عد ابوهن بعدني الحمدلله اتنفس ومامتت حتى تكول يربن عند الغرب وذوله الغرب اللي ما عاجيبك  ذوله اقرب منك لبناتي انتو غربه بالنسبه الي والهن،،،ؤ ابو مروان لم اخوانك و ولدك  وروح منين ماجيت اني رجال مو معزب من رخصتكم .

علاء : من رخصتكم اني صار ساعه اسمع حجيكم واتهامكم الباطل لاختي  ، طلعتونه غرب ومايصير عرضكم يتربه عدنه وساكت اريد اشوف ليوين توصل وياكم سمعوني زين بيوم اللي اجة اخوكم يخطب اختي اني مارضيت انطي مرة مو لان اختلاف طوائف لا والله والله شاهد عليه بس مارضيت  لان جاي وحده واجاني مرة ومرتين وعشره واني ما ارضه اله يجيب اهله لحد ما وسط ناس كبار ومشايخ يلا رضيت والحمد لله لهاي اللحظة ماندمان زوجته اختي لان زلمة والنعم منه بس هذا حجيكم اني ما اقبل بيه وانتو سمعتو رأي اخوكم تريدون تباتون هنا اشيلكم ع راسي ماتريدون الله ومحمد وياكم ترافقكم السلامه.

علي: احنة مو شغله طوائف سنة وشيعة مارضينه ناخذ بنتكم لصادق ،،كل مافي الأمر احنه ماعدنه ولدنه وبناتنه يزوجون من الغرب لان ناس ماخذه من ناس كلنه ولد عمام  وجنه رايدين اله بنت عمنه من عدنه وبينه علمود الحلال مايطلع للغريب وهذا تفكير الحجي واحنه شبينه وكبرنه ع هذا الشي مو هسه انت تجي تعلمني الاصول من تالي وكت ،،،،
واحنه ناس معزبين لو يجي كاتل ابنه مانرضه نوكفه بالباب ونحجي وياه نفتح اله الدواوين  وياكل ويشرب واذا النه حك يمه ناخذه مو مثل وكفتنه هسه وحجايه التنكال تعالو دخلو انت رجال مامعزب يلا يابة امشونة    و لاتنسه خلي ابالك بنات اخوي مايطلعن للغريب في امان الله ..........

يتبع...

العروس في الثوب الاسود

البارت الرابع

في هذه الساعة المتأخرة من الوهن

أحتاج لمشاهدة مسرحية فكاهية

تدفعني للضحك بهستيريا

احتاج أن اسرق البسمة من ثغر طفل

لا يأبه لبؤس هذا العالم

احتاج لصوت أحبهُ يباغتني باتصال مُفاجئ

أحتاج لعناق صادق

لحكايا رفاقي المجنونة

أحتاج لتذكرة سفر ترتحل بي

عن أفاق هذه الحياة..

أحتاج للأغتراب عن أمسي