العروس في الثوب الاسود

تكمله

صادق: خير من الله تحويشة العمر ...

محمد : لا بربك لعد شو عبالك اني مبيوك مو انت يابرود اعصابك يا اخي ..

صادق : اللي يروحله عزيز يشوف كلشي بالدنيا تافه وما يسوة يقهر روحة عليه ولا تنهزله شعرة احتمال لو قبل من جانت سوسن عايشه جان انقهرت واحترك دمي بس هسه لا عادي.

زهرة: والله حجيك كله صحيح يا ابو رسيل الله يصبرك اكوم اروح الها بس دليني بيتهم وارجع ...

صادق : يلا راح اوكفلج على صفحه ..

راحو ورة نص ساعه اجوي...

محمد: ها بشرو لكيتوها خافت راح ترجعهن ...

صادق : وحده وحده على كيفك ليصير بيك شي
ماهيه شايله ...

محمد: يعني شنو فهمني ...

صادق: السالفه كالاتي البنيه مرتبه وضعها كلش زين ومدسترة امورها كلها ومجيكه مكان الفلوس وشايله قبل يومين بغير منطقه واليوم باكتني ونهزمت ومحد يندلها ما تاركه اثر يوصلنه الها  حتى للدلال  اللي جانت مأجره منه البيت رحتله كال اجتني الصبح دفعت الايجار مال اربع اشهر وراحت وهيه قبل يومين مسلمه مفاتيح البيت ...

محمد: شون ناس الله لايوفقها كون كل فلس اخذته يحركها حرك ...

صادق : هذا هو ربك موجود وهيه وربها تتجازة...

محمد: وهسه شنو راح تسوي ...

صادق : اقطع الاجازة واداوم شسوي قابل ...

محمد: اووف يلا فدوة اهم شي انت وبناتك وابنك سالمين ...
صادق: رحم الله والديك ، الحمدلله على كل حال..

زهرة : يلا رسوله كومي نرتب الغرفه ...

صادق: عوفيها رحمه لابوج اني ارتبها اريد اندل كلشي واسفطها مثل ما اريد ....

بابا حجه هيج حتى عمة لتتعب  

طلعو بيت خالو واني وبابا كمنة نلملم بلبيت ونرتب بيه اخر شي سوينه غرفته كلش تعبنه .

مشت الايام و حياتنا كالعاده بين دوام وبيت ودراسة ماكو فد شي يذكر بس الي صار والسبب اللي خله حياتنه تنكلب هو مرض اران من وره البرد صارت عنده نشله قويه ونزلت بصدرة كام يتنك وبس يبجي لان  يتنفس بصعوبة وكل فترة يضيق عنده النفس ويصير ازرك ونركض بيه للمستشفى،،،،،

بابا خلصت طاقته وتعب حيل  لان با اخر فترة اران يمنه يضل بس بفترة دوام بابا يوديه يم عمة وباقي اليوم كله يمه هو يوكله ويسبحه ويبدله واني اساعده .
وبيوم كاعدين بلبيت واندكت الباب قوي طلع بابا وصاح...

صادق: جيت جيت ...

فتح الباب فاتت عمة زهرة وتصيح..

زهرة : الحك صادق عمتي تخربطت لا ايد ولا رجلل ...

طلع بابا يركض رحت وراه  اباوع بيبي صايرة صفره وعيونها مكلوبه ليفوك شالها بابا وركض وصل للسيارة جان يعيط رسيل جيبي السويج والمحفظه رحت اركض جبتهن اخذتهن عمة زهرة وفتحت السيارة ،،،صعد بيبي واخذ عمة وراحو ....

هذا الحجي ساعه خمسه العصر رحت يم خاله سهاد كعدنه يمها اني وثائر وريناد خطيه خاله سهاد كلش فقيرة وعلى نياتها نحجي وياها تحجي نضحك تضحك واذا محد يسولف عدها استعداد تبقه ساكته ايام بحيث مرات الجوارين من يجون عبالهم خاله خرسة ...

رجع بابا ساعة ثمانية ونص كال رسيل حضريلي ملابس لعمتج ولبيبيتج والعلاج مال بيبي كله خليه بالجنطة بسرعة ومن يجي خالج كليلة يلحكني.للمستشفى....لان بيبي راح تبات اليوم وتبقه يمها عمتج زهرة حالتها تعبانه ...

راح بابا ورة ساعه اجه خالو وكلتله خطيه تخبل وراح...

ساعه ١٢ رجع وحده .

رسيل: ها خالو شونها بيبي

محمد: بيبيتج حيل تعبانة وضربتها جلطة هلمرة كلش قوية بحيث فاقده ماحاسة بأي احد .

كمت ابجي على بيبي حيل حنينة وطيبة وابد ما اذكر بيوم صيحت علينه لو منعتنه من شي .

رسيل : لعد بابا ليش ما اجة ...

محمد: ابوج ضل بالمستشفى واني رجعت علمود سهاد .

سكتت ...

بيبي نامت بالمستشفى ٣ ايام وطلعوها للبيت وكل فتره تتخربط ونوديها عمة زهرة تعبت بابا تعب البيت كله متوتر ابد ممرتاحين .
ساعه بالتسعة اني وبابا بالمطبخ نسوي بالعشا واندكت الباب راح بابا فتحها فات خالو وحسام ...

صادق : يلا تعالو شلون عشا سوينه اني ورسوله يلوك لهذا الحلك..

محمد: دايم خويه بس جيتك بسالفه وماريدك تخجلني..

صادق: هاي من يمته وجاي بيناتنه هاي الرسميات ..

محمد: مو هذا الموضوع اللي راح احجي بيه وياك حيل حساس بالنسبة الك .

صادق : هسه غير يحجي ويفضها مو نشفت دمي فوت بالموضوع بلا هالمقدمات ..

محمد : شوف خويه اني تعبت وعمري مو صغير وانت هم تعبان وجهالك متبهذلين وزهرة بعد مو مثل حيل قبل تعبت مرضت الحجية اخذت من حيلها حيل تشيل وتحط على عدد الدقايق وابنك يوميه مريض ويرادله عنايه الله يخليك بلا متحجي فكر بالموضوع انت الوحيد اللي تكدر تطلعنه من هذا الوضع اللي احنه بيه

صادق: يعني هيج الامور كلها بيدي واني راح اخلي حياتكم تصير وردي والكل يصير بخير اذا تزوجت محمد اني احبك واحترمك ما اريد تطلع مني حجايه عايبه بحقك كلت ما اتزوج يعني ما اتزوج....

بعدهم يحجون واجتي عمة زهرة جان تكول ...