العروس في الثوب الاسود

تكمله

حسام : اول شي وصانة عليج كال لأبوية هاي بنتك اريدك تعوضها عني ومتخليها تحس بفقدان ابوها ، خليها بعيونك مثل ما عوضتوها عن سوسن اريدكم تعوضووها عني،
والتفت عليه وكلي عينك عليها واريدكم تعقدون عن قريب واخذها وسافرو يم اخوانها
لتبقون هنا اهلي مايخلوها بحالها ، واذا متت لتخلون ريناد ترجع ورسيل سفروها با اقرب وقت ، بناتي امانة عدكم ريناد ورسيل ، اران ولد ما اخاف عليه ، وخواته حنينات عليه بس بناتي منو الهن متعلقات بيه. واختنك وراح نطاج عمرة .

رسيل: ليش ما لحكو عليه الاطباء ليشششش ...

حسام: لتعيطين رسيل على كيفج ؛ هو منتهي جان ويعرفون بيه ما يطول لهذا من طلب يحجي ويانه سمحوله .

يحجي واني احس سجاجين تذبح بصدري وكلبي وكل حجايه احس ملح على جروحي تنزل ، كمل كلام ، واني عطتتتتت و وكعت من طولي بعد محسيت بشي ، ورة شويه صحيت على واحد يغسلي وجهي فتحت عيني واشوف حسام خالني بحضنه وعمه وخالوا وكم وحده من النسوان واكفين داير مدايري يباوعولي بقلق ويبجون .

عمة : شبيج حبيبتي ليش وكعتي ..

حسام: ماماكلة شي وتخربطت جيبولها شي تاكله ، ادري ليش هيج عايفيها ، غير وحده بيجن تراقبها لو ملتهيات بالكال والكلت.

حجت اخت عمة  زهرة...

_مو عيب خاله شنو هالحجي هيه كالت واحنى ماجبنالها لو سادين حلكها عن الاكل ، وبعدين بهيج مصيبه منو اله نفس ياكل.

نتر بيها ...

حسام: حتى لو اجبرها غصب عنها تاكل، تريدوها تلحك ابوها، كومي يمة سويلهة عصير ولفة اي شي خلي اوكلها .

كامت عمة تسوي اكل، وحسام شالني وداني بغرفة خالوا نيمني على الجرباية وكعد بصفي .

حسام: كتلج ما احجي عاندتي اله تحجيلي هسه زين الصارلج .

ما اكدر احجي اريد اجاوبه ما اكدر صوتي ميطلع شون عبالك فقدت النطق .

حسام: رسيل مو احجي وياج يمعوده لتوكعين كلبي
شبيج بس تباوعين احجي .

كومني وكام يهز بيه ويصيح ..

حسام : احجي رسيل رسسسسيل.

على عياطة فات خالو يركض ،

محمد : شبيها شكو ؟

حسام: يابه رسيل متحجي

محمد: شنووو ، شو وخر عنها ، رسوله بابا احجي شبيج شنو الصار احجيلي .

بس ابجي ما اكدر اجاوبه ، جابت عمة الاكل ،حسام اخذ الصينية منها وكعد بصفي .

حسام : شو فتحي حلكج .

هزيت راسي بمعنى ما اريد..

حسام : لتخبليني يمعوده اكلي الله يخليج .

هزيت راسي بمعنى لا .

كام يعيط ويبجي اكو تحفيات بالغرفة شمرهن بالكاع تكسرن ، وطلع..

خالو يحجي ويبجي ...

محمد: شلون بلوة ياربي اختبارك صعب عليه ، ما اكدر احمله ، الهي برد كلب هالمسكينة باوع لحالها ولحالي.
لاحول ولا قوة الا بالله العلي العظيم .

ثاني يوم من الصبح اجة خالو علاء وزوجته.
وولدة وبناته ونبراس مكدروا يجون فيزتهم تتأخر ، كالو بس يرجع خالو يسافر همة يجوون .

فات خالو يبجي واخذ من خاطري وزوجته هم .
نصبو جادر والناس كلها اجتي بفاتحة بابا صار عزه ضخم ، كلها تحبه ممأذي احد ، وصارت فاتحتين وحده يمنه بغداد والثانية يم اهله بالبصرة، خلصت ايام الفاتحة
والتفتو الي على شبيج وليش متحجين وحاولي بلكت وهاج مي دافي شربي صوتج يرجع ومن هالحجي....

بس المشكله يحجون ويايه اني ما اكدر احجي ، اريد اجاوب ما اكدر ، بالبداية عبالي صوتي مبحوح من البجي كلت يومين ويرجع مر اسبوع وصوتي مطالع ، تخبلو بيت خالوا حسام يمشي ويضرب براسة ويصيح من ورايه اني خرستها اني صوجي حجيتلها ، ومن افتهم خالو هو حاجيلي تعارك وياه وصار صياح بينهم حسام منهار وخالو هم.

على اساس يسفروني ويه خالو علاء . بس حالتي الصحية كلش تعبانة خافو ليصير بيه شي وما اتحمل سفر .كالو سبوعين تلاثه ترتاح ونسافر كلنه سوة .

مرت عشر ايام وحالتي كل مجالها تسوء اكثر، الى ان اصر حسام ياخذني للطبيب .
راح حجز واخذوني هو وخالو

دخلنة يم الطبيب وشرحوله حالتي، طلب تحاليل فقر دم وبعد كم تحليل.. ، انتضرنه برة على ما طلعت نتيجة التحاليل ؛ طلع عندي فقر دم حاد الطبيب يقرة بالاوراق ويحجي ،

_راح اكتبلها ابر تضربها بين يوم ويوم ابررة وهذا كبسول هم تاخذة يومية وبالنسبة لصوتها يرجع لتخافون هاي اثر صدمة جانت قوية ومتحملتها
ومابيها غير العافية ..

حسام: دكتور يعني شكد ويرجع ايام اشهر سنه غير نعرف .

_حاليا ما اكدر اكلك باجر لو بعد سنه ، ننتظر احتمال تحجي غفل واحتمال ما تحجي اله بصدمة اقوة من هاي .

حسام : هههه دكتور تحجي صدك لو تتشاقة وياية..

_ابني اذا تشوف كلامي شقة وضحك روح اعرضها على طبيب ثاني احتمال افهم مني ، وتفضل عندي مراجعين لتاخذ من وقتهم.

حسام: شي اكيد اخذها قابل اعتمد عليك ، لو شنو رأيك انتل روحي بالكهرباء حتى اصدمها وترجع تحجي.

_ اذا انت عندك هيج حلول ليش جبتها يمي جان عالجتها حضرتك مبين تفتهم.