العروس في الثوب الاسود

تكمله

اله يوم ويومه قريب.

شوق: خوش عصابه صايرات وحده تدعي عليه وحده على اخويه هين يجي واعرف شكله.

دفعتها نور طلعتها برة الشقة .

نور: ايدج الج سوي الترديه ..

سدت الباب ورجعتلي تباوع عليه وتبجي لج ليش هيج خليتيها تضربج ليش مكسرتي ايدها الحقيره .

رسيل: اخوها خله بيه حييل حتى اكدر اقاومها لو اردلها الضربه .

نور: علمود السوار هيج سوة ...

ضحكت بتعب،

رسيل : انتي تتوقعين علمود السوار لو رادها حجه حتى يضرب ويهين بيه .

نور : كومي كومي خلي اسبحج  الله يفرجها عليج  وتطلع حوبتج بيهم .

اخذتني ودخلتني جوة الدوش فتحت المي عليه وجسمي كله يون كتلها اريدة بارد  ...

نور: ليش خاف تستبردين.

رسيل: كلبي حار اريدة يبرد ...

فتحت المي البارد ونزل يلجم جروحي عبالك سجاجين وتذبح بجسمي واخذتني الصفنة ورجعتني بيت ابويه.

__________________

نرجع ....

ثاني يوم العطلة اجة بابا وكال حضرو ملابسكم باجر ورانة سفر..

محجيت شي صعدت خليت ملابسي بالجنطة جينزات على بلوزات صوف وقماصل وتراكات بيت صفنت اخذ شي طويل ويايه خاف هناك ميخلوني اطلع والبس بكيفي، زين شلون راح اتحملهم والله حيرة يربي .

دخلت ريناد وبدت تحضر ملابسها بلهفة وفرحانه ..

رسيل: هاي هيج فرحانة لان راح ترحين لبيت جدج لو ندري هيج تضحكين ونفسيتج تتغير جان من زمان نتصالح وياهم .

باوعتلي وضحكت ...

ريناد: متشوقه اشوف منطقتهم وبيتهم وشلون عايشين اعتبريها تجربه وتونسي شبيج قافله .

رسيل: تجربه عابت هيج تجربه اي والله ..

ريناد: اذا ما عاجيج لتجين ضلي بيت جدو .

رسيل: حتى بابا بعد طول عمرة ميحجي ويايه هو اني بس اريده يصالحني مستعدة اسوي اي شي علمود يرضه عليه .

ريناد: لعد لتسوين مشاكل وخلي العطله تعدي على خير  ..

صفنت عليها هاي اللي جنت اني انصحها صارت هيه تنصحني استغفرالله ربي .

كملنة ترتيب الجنط وحضرنه ملابس لباجر
نمنة وكعدنة بابا ساعه سته الصبح ..

صادق: يلا بنات كومو بدلو تأخرنة ..

كمت فتت للحمام غسلت وفرجت اسناني وصعدت بدلت لبست بلوز طويل اكرها والبسه قليل بس لان رايحين للبصرة ما اريد حجاية تجي لبابا ولبست قمصله ولفيت شال على راسي .