العروس في الثوب الاسود

تكمله

فتح عيونه واندار عليه

صادق: غير اكو وحده بس تحوص ما خلتني انام،

رسيل: والله متحركت ..

صادق: نامي كافي ما ضلت بس ساعتين ونكعد يلا حبيبتي .

هو هم ميكدر ينام مثلي ومتأكده يفكر ،
بالكوة غفيت واول ما كعد بابا فزيت حتى هو اخترع

صادق: اسم الله شبيج بابا

رسيل: مابيه بس خفت انام وترحون وما اشوفكم .

صادق: شلون اروح وما اودعج كومي يلا كعدي اخوانج

رسيل: كلبي كام يوجعني يعني اكعدهم حتى يروحون مني وما اشوفهم منا لسنه كامله.

كعدتهم بدلت ل الاران و كل شويه ابوس بيه لو اروح احضن ريناد .

رسيل: رنودة انتي عاجبج تروحين..

ريناد: لا

رسيل: لعد ليش وافقتي

ريناد: اذا اني ما اروح وانتي متروحين بابا ميروح .

رسيل: هم صدك ، حبيبتي ديري بالج على نفسج وعلى اران وبابا انتي الكبيرة بعد داريهم زين .

ريناد: ان شاءالله ...

حضنتني هيه تبجي واني ابجي الى ان سمعنه صوت بابا يصيح يلا ريناد تأخرنه .

كلبي انشلع بالزايد اريد انزل الدرج ما اشوف زين من الدموع التنزل .

طلعنة لبيت جدو لكينه خالو وحسام مبدلين حتى يوصلون بابا .

دخل بابا على بيبي بوسها وماعرف شنو حجه وياها وسلم على خاله سهاد و اجه للهول سلم على عمة زهرة .

صادق: ام حسام الطيبه الاصيله ام الوكفات الحلوة ، لو شما اسوي ما اجازي ربع تعبج ويايه و ويه اطفالي الله يحفظج ويبارك بيج وبعائلتج يا اختي ونعم الاخت .

اندار على خالو..

وانت يا اخويه ونعم الاخ ، اخويه مو بس بالاسم ، اخ المواقف والصعاب ، سنين انت عكازتي وتجوتي من اتعب ودومك بضهري الله يخليك اليه ذخر وسند .

خالو بس يبجي اختنك ما كدر يحجي ولا كلمه .

وانت حسام ابني الكبير واخو لبناتي طول عمري مأمن عليهن يمك لان انت تربيت على ايدي ومن يوم يومك اصيل واخو خيتك وما فد يوم طلع منك عيب اريدك تدير بالك على اختك وعينك عليها كون من اجي تكلي عمي هاي امانتك مثل ما عفتها لكيتها.

حسام: تدلل عمي روح وأمن بعيوني رسيل اخليها.

صادق: والنعم منك سالمه عيونك .

التفت عليه ، اخ ياربي اجه دوري بس ابجي والله ما اشوفهم زين غواش بعيوني.

صادق : بنتي السباعيه اريدج قويه وماتبجين اريدج جبل متنهزين شجرة قوية شما عصفت الريح بيها ثابته بمكانها اريد اروح وارجع الكاج مطلعه اعلى معدل، اكثر من اللي اتمناه اني .

حضنته وبوسته وحضت ريناد واران ومكدرت احجي ولا كلمه...

محمد: يلا كافي تاخرتو اني طالع قبلكم للسيارة حسام تعال صعد الجنط .

راحو صعدو واخذو كلبي وياهم مجنت اعرف هاي اخر حضنه لاخوتي وبعد ما اشوفهم مجنت اعرف هاي اخر نضرة مني الهم جان مليت عيني شوف بيهم ، جان عفت كلشي ورحت وياهم راحو واخذو كلبي .

مر اسبوع على روحتهم واني حالي حال الميته متحملت فراكهم خصوصا بابا شكد يسافر ويروح مرات اسبوع ويرجع بس جنت اصبر نفسي اكول كم يوم واشوفه بس هسه لا سنه كامله ويجوز اكثرر.

حسام: رسيل رسيل وينج ...

رسيل: هااا

حسام: يمعوده كومي بدلي محاضراتج راحت ما كافي اسبوع راح منج ..

رسيل: ما اروح ..

حسام: والله بس يخابر عمي اكله لو ليش انتضره اني نازل اخابر .

رسيل: هوب هوب انت مصدكت صاير حاروكه كل مايخابر ومفتن رسيل ما اكلت رسيل مانامت رسيل ماتدرس.

حسام: لا تنسين انتي امانه خلوج عندي .

رسيل: يبوو راح يكرعني هسه بابا اله يحجيلك هالحجايتين.

حسام: دكومي يلا لو اجرج جر ..

رسيل: كمت كمت بس وخر ..

حسام : منتضرج اذا ما نزلتي اصعدلج ترة

رسيل: ماشي

بدلت على السريع ونزلت طلعنه وصلت للمعهد ، اخذت كل المحاضرات وطلعت لكيته واكفلي ابتسمت .

حسام: هاي شلون ورطه ورطت روحي بيها

صعدت وصعد بصفي ...

رسيل: ليش ياورطه .

حسام: تعال يوميه ودي وجيب وانتظر اقل شي نص ساعه على ما تطلع ست الحسن.

رسيل: منو كلك اتبرع صوجك .

حسام: ما تبرعت كربسوج براسي شلون امانه ثكيله.

ضربته على جتفة حيل كام يضحك ..

رسيل: والله ماكتلك وديني وجيبني وبعدين خالو موجود الله لا يعوزني عليك..

اختنكت وبجيت عبالك ردتها من الله ، اعرفه يتشاقه بس اني صايرة ما اتحمل حتى اذا واحد كلي شلونج ابجي .

حسام: يوووو بجت يمعوده اشاقه والله ياكلمه وردلي لمكانج بعد توبه اذا اتشاقيت وياج بس سكتي .

مرت الايام نفس الروتين محاضرات ومدارس بدت ويوميه اخابر بابا وريناد واران اضل ساعه احجي وياهم واكوم اقره ، الشي اللي مامفتهمته حسام يشرحه الي خطيه ابد ميمل .

للمدرسة خالو رجع يوديني ويجيبني بطلني من الخط خاف يصير شي ميأمن باحد بعد.

وحسام حاير بمحاضراتي

مرت الشهور واحنه هسه شهر الرابع سنة ٢٠٠٦

سنة المأساة سنة الطائفية والتهجير سنة القتل.

زاد الخوف وزاد الرعب منعرف مصيرنه شنو،

واحد حده لساعه ستة بره البيت رجال اللي يطلع بعدها ، القتل والخطف بفلس صار والبيوت كامت تنباع بنص السعر الناس خطيه تريد بس تسلم بروحها كل مناطق بغداد هيج صارت ماكو منطقة سلمت من الخطف والقتل والتهجير.