العروس في الثوب الاسود

تكمله

رسيل: وميفوت لازمتله جفجير لو عوده ماسحة بيدي لو كزة يريد احد يدليه.

حسام: شوف شلون لسان  لا عقل ولا فهم وبس بالمرادد استاذه.

رسيل: حسام هسه شرايد ..

حسام: من تشوفين اكو ولد غربه ليش ما تلبسين حجاب واصلا شعندج واكفه بالمطبخ .

رسيل: والله اني واكفه في امان الله وهو طب شسويله

حسام: باعي لا اهدد ولا احجي ولا اسويلج شي لان اعرفج تعاندين وتسوين العكس بس احلفج بروح امج ماريدهم يشوفوج شتريدين اجيبه الج لهنا بس لا تطلعين والله اضل قريب عليج واذا ماموجود دزي اي احد عليه اجيج ركض.

رسيل: لا ما اطلع ليضل بالك .

حسام : اكيد

رسيل : اي والله ..

حسام : ماشي ..

راح حسام واول مرة اشوفه هيج خايف بس من شنو ما اعرف.

صار الغده جابلي ماعون تمن وعليه دجاج مبين من برة الاكل تغديت وضليت وحدي تالي اجتي ريناد كعدت يمي .
رسيل: هاا شعجب جيتي..

ريناد: لكفني ابن خالج وكلي روحي يم اختج لتضلين بنص الزلم ..

رسيل: ليش وين جنتي ...

ريناد: اخ كلبي لج جنت بالمطبخ صافنه على ولد العم يبووو يخبلون شكلهم اله اشرد...

رسيل: لج شنو هالحجي وشنو اشرد منين متعلمتها وبعدين متستحين تباوعين عليهم هسه شيكولون عليج ..

ريناد: ميكولون لان ميباوعون مؤدبين شلون بيه جعت اريد اتغده راح اصب واجي ..

رسيل: متأكده تتغدين لو رايحه على غير شي ..

ريناد : اتغده طلعتي انكس من حسام ثنينكم قنقينة(اللي ينك هواي) .

كمت فتحت الباب اجه حسام ركض عبالك منتظرنة خطيه هالولد والله..

حسام: ها رسيل ..

يحجي ويباوع منا ومنا ..

رسيل: ريناد تريد اكل اذا متصير زحمه عليك جيبلها ماعون

حسام: عايز تاكلني بعد لج تغدت مرتين كل شويه وجايه للمطبخ تصب ماعون وتاكله وتطلع اله عطت بيها يلا اجتي لهنا رسيل لزمي اختج لا تنطيها عين هاي مراهقه واعرف شتفكر .

رسيل: ماشي ..

فتت وسديت الباب شفتها واكفه وكالبه الخلقة عرفتها سمعت .
رسيل: اذا سمعتي الحجي احترمي نفسج وكعدي هنا بين متفض عيب تجي حجايه لابوج.

ريناد: صدكتي بيه هذا واحد مريض نص عقل يتخايل وين اكو هيج شي

رسيل: هاا وعصافيرج الطايرات وتحجيلي بولد عمج..

ريناد : هو انتي مال واحد يسولف وياج اصلا زايده مني

رسيل: فعلا زايده اذا تحجين هيج حجي ماصخ بلاه احسن

عافتني ونامت معجبها الحجي هيه اختي وعايشين سوة وما اعرفلها طبع صار الليل واجه بابا للغرفه

صادق: بنات تعالو سلمو على جدكم سأل عليكم بس لبسكم غيرو ..

رسيل: بابا هدومنه فوك ..

صادق: شو بله انداري امشي مابيه شي ثوبج طويل

كمت رتبت شعري كبال المرايا سويته ذيل حصان عالي ولبست شحاطتي  وطلعنه اني وريناد وياريتني مطلعت شفت ٣ رياجيل وابو بابا جدي اللي بحياتي مشايفته ولا سامعه صووته غير اليوم  وخالو وحسام وثائر اول ما فتت اجتي عيني على حسام اباوعله كام يرجف من الاعصاب خفت حتى اسلم عليهم من وراه..

صادق: امشي بابا هذا جدج ..

بوسته وكتله هلو

الجد : شني الهلو هاي شمعناها عود

رسيل: لعد شنو اكول؟
صخنت وخدودي صارن حمر من الفشله احس الكل يباوع ويراقبني اريد اختفي من كدامهم وهذا جدي لازم ايدي مجلب بيها ..

الجد: كواج الله بنيتي انتي ياهي منهن ..

رسيل: رسيل

الجد: ياهله برسل كواج الله تعاي احبنج ...

ضليت واكفه بمكاني شنو احبنج

واحد كاعد بصفه اول مرة اشوفه جان يهمس .

_ دنكي يريد يبوسج الحجي الله يسلمه يحب يبوس ...

الجد: اسكت لا بارك الله بيك تشوفين هذا
اسمه ياسر أبن عمج علي ابو مروان ..

وضاك (ذاك ) اسمه مروان الفحل الكبير .

هذا نفسه اللي شفته بالمطبخ ...

وضاك اسمه أيهم من بعد مروان ذول كلهم ولد علي .

التفتت الهم وكتلهم اهلا وسهلا ...

ردو بصوت واحد وخشن اهلا بيج ...

الجد :تعاي كعدي حدي( بصفي) التفت للولد كاله ..
وخر لك خلي البت تكعد ..

ياسر: صار حجي بس لا تنفعل...

كام وكعد مقابيلي...

اجتي ريناد بوسته لجدو.

الجد: أنتي ياهي بيهن ..

ريناد: جدو اسمي ريناد ويدلعوني رنوده ..

الجد: عيدي بويه هذا موش اسم لغز .

ياسر : جدي الناس تطورت غير انت بعدك ع القديم .

الجد: وشبيه اسم حمديه وكرجيه وغيرهن لو اله رنياد مدري ياهو ..

ريناد: بضحكة والله ياجدو هذا احلا من اسمي بعد التفتت على بابا كالتله غير اسمي رنياد والله احلا .

اني وحسام وثائر وحته عمة مستغربين تصرفات ريناد شبسرعه ذبت ميانه كام حسام وصاح عمه وراحو للمطبخ ورة شويه عمة اشرتلي تعالي فتت للمطبخ واشوفه يكمز من الاعصاب .

حسام: ليش هيج فتي شكتلج اني مكتلج لبسي خرة اذا طلعتي وشعندج اصلا طلعتيلهم زين هسه من اكلوج اكل هذا الكلب ياسر ماشال عينه عليج اطب ادميه هسه واحول الكعدة يمهم .

رسيل: هم رجع عليه اني شكو انت من كلت لاتطلعين طلعت لا سمعت صوتي لا اجه بابا وكال صيحي اختج جدكم يريدكم وطلعنه

حسام: ليش ما لبستي حجاب ما تدرين ذوله ماعدهم مره هيج تطلعلهم شفتيهم شلون صفنو عليج متعجبين اللي تدخل بدون حجاب عليهم كأنما ما لابسه شي .