انت املي _ باللهجة الجزائرية 🇩🇿 _

بارت 57

ادم : ماني ساهل ندبر راسي متتقلقيش نتي برك ارضاي عليا هذا مكان و راح نهدر مع مروان مرات يجيو عندك مرات روحي عندهم و يما و بابا دوك يجيو ولي روحي قعدي عندهم يامات و المراة هذيك راح جيك كل يوم باش ديرلك الانوسلين
فاطمة : انا متخممش عليا قولي نتا كيفاش راح دير
ادم : انا ساهل ندبر راسي
فاطمة : وشمن ساهل ؛ واش رايك تولي تروح عند مروان ياك خوك نورمال
ادم : لالا ماني قتلك خلاص ندبر راسك
فاطمة : خلاص ملا كي يجيو والديك نقوللهم يرجعو لدارهم
ادم : فطوم وعلاش السمير بابا لازم يقعد هنا باش يكمل لي كونترول مع الطبيب تاعو
فاطمة : عندك الحق .... خلاص دير لي تساعدك خليني نروح نسقملك حوايجك
ادم : لالا متشقيش روحك منبعد نديرهم
فاطمة : لالا مكان حتى عذاب ادم
ادم : ملا انا نروح نتلاقى بغيث و سيف
فاطمة : ربي يسهل

.........

ريحاب : على هاذي مجيتيش هذاك النهار
رنيم : اممم
ريحاب : ايه واش صرا منبعد
رنيم : ايه البارح جات ماني فاطمة و ..... ( حكاتلها واش صرا ) ( هدوك لي قالولي لوكان مقبلتش تروح مع فاطمة هكذاك لوكان مسمعتش واش قال ادم يا الستاوت )
ريحاب : ااااه هذا ادم قال هكذا ... ياختي واش نقولك حيرتيني بصح واش قتلك واش قتلك شفتي نهار تلاقيت بيه فالدار هذيك قتلك الخزرة تاعو فيها لوش ايااا و احساسي مكانش غالط ايه و نتي واش قلتيلو
رنيم : زدمت عليهم و قتلو صح ادم واش سمعت
ريحاب : صححح
رنيم : ريحاب وشبيك هبلتي بعدما سمعتهم رحت سيقت
ريحاب : هههه
رنيم : بصح ريحاب البارح نهار كامل و هو مدور وجهو عليا
ريحاب : تستاهلي نتيا قاعدة تتشنفي عليه و وعلاش بارسكو شفتي خديجة حاكمة يدو مسيتيش تفهمي قبل واش صرا
رنيم : معلباليش بصح حسيت قلبي قريب مطرطق وقتها
ريحاب : علبالي فاهماتك بصح ماشي هكذا .... دوكا انا نقول نتي روحي هدري معاه بارسكو اذا راح يقعد مشنف عليك هكذا راح ضيعي غير الوقت
رنيم : لالا انا منقدرش ريحاب
ريحاب : كي قلتيلي انا ندير واش نحب قدرتي و دوكا لالا نورمال روحي قوليلو مقصدتش واش قلت و تمسكني شوية ... هو مسكين كي قلتيلو متزيدش جيب خديجة دارلك بخاطرك و كي راحت تدنى ليه قاللها بلي يحبك هنا تعرفي بلي سيد سيريو لوكان عينو كان قادر يلعب بيها كيما يحب
رنيم : زعما
ريحاب : ايه روحي
رنيم : دوكا !!
ريحاب : ايه ياك ويكاند روحي قعدي شوية مع مانو و لقاي لاشونص و هدري معاه
رنيم : و ماما مراهيش تخليني نطلع عندهم
ريحاب : روحي و انا نغطي عليك استناي

خرجت ريحاب طلت لقات الكولوار فارغ ؛ راحت للصالون بلعقل لقات حياة تتفرج فالفيلم ولات للشمبرة

ريحاب : شوفي انا دوك نروح للصالون نخرج يماك للبالكون بكاش سبة و نتي قفزي طلعي ؛ و كي تكوني مولية بعتيلي ميساج ندي يماك للكوزينة نقوللها اذا تقدري تعلميني ندير المسمن تاعك
رنيم : ريحاب انا ماشي موالفة و ....
ريحاب : يا جدك على جال ادم هيااا

و كيما كان الحال رنيم دارت براي ريحاب و طلعت لعند فاطمة غير طبطبت فتحتلها

فاطمة : اهه رنيم .... ( مسحت دموعها ) .... ادخلي
رنيم : ماني غير لخير واش كاين ... كشما صرا لعمو منصف
فاطمة : لالا غير ادم راهو رايح
رنيم : لوين !!!
فاطمة : راح يرجع لخدمته la mission تاعو خلاصت
رنيم : و وقتاش يروح
فاطمة : اليوم فليل
رنيم : و دوكا مكانشو
فاطمة : راح يشوف صحابو
رنيم : اممم ملا انا نخليك
فاطمة : وعلاش جيتي كشما سحقيتي
رنيم : اههه لالا جيت برك نسقسي عليك ... انا نروح هذاك هو
فاطمة : بالسلامة

لحقت لعشية بلخف و فدار فاطمة كانت هي بالضبط واقفة قدام الباب تودع فادم لي خرج بلخف محبش يزيد كثر و يخليها تنوح

.....

حاطة راسها على التاقة و تشوف فيها يحط فالفاليز فالطونوبيل

رنيم : هكا يا ادم روحت بلا ما تودعني حتى

مسحت دموعها و دخلت للداخل

رنيم : ابكي رنيم ابكي كيما قالت يماك

.....

غلق لامال و راح يدخل للطونوبيل منبعد دور راسو لتاقتها لقى ضو طافي عرفها رقدت ؛ ركب و ديمارا هبط شرا الما و رجع يسوق بعد واحد عشر دقايق من لي كان يسوق لحق لواحد طريق خالية حتى يسمع العياط من برا و يشوف فبنادم يجري مور طونوبيل تاعو عقد حواجبو و مقدرش يعرف شكون بحكم كان بعيد

💜💜 خليولي ارائكم في البارت و اقترحاتكم و الى الملتقى ان شاء الله في بارت اخر 💚💚