ك
يما العادة رنيم دارت روتينها و خرجت و هي هابطة على تطليعة راسها شافتو يديها ولاو يرجفو عندها شحال متلقاتش بيه و لا شافتو
كملت تمشي متجاهلاتو
كمال : واش الزين ميصبح علينا
حطتو فالثقيل و كملت تمشي حتى لقاتو شدها من يدها
كمال : لوقتاش راح تقعدي تتجاهلي فيا هكذا
رنيم : اطلقلي يدي هبلت كيفاش تمسني
كمال : ياك جيت خطبتك قدام الناس كامل بصح نتي محبيتيش واش حبيتي نزيدلك
رنيم : ما نقبلش ماشي بسيف و دوكا شد قدرك و خطيني
زيرلها على يدها و جبدها عندو
كمال : **** **** تقبلي حبيتي ولا كرهتي قلت نخليك براحتك بصح نتي طوالو رجليك ظلي برا ؛ الطونوبيل و الخرجات حسبتلك خبارك مراحش يجيبوهوملي
رنيم : اطلقني قتلك
عينيها تعمرو بالدموع و هو مزير على يديها قدما سيات تجبد روحها مقدرتش وقت سمعو الباب تفتحت مالفوق كمال عرف بلي كاين واحد هابط جبد روحو و هي كذبت يطلقها شدت يدها مهبطة راسها و دموعها هبطو حسته كسرلها يدها
كمال عينه على رنيم باش ميخليهاش تهرب و عينه على الدروج يستنى شكون راح يهبط
كمال : نتي جبتيها لروحك رنيم
دور عينه يشوف فالدروج حتى يشوف ادم هابط وقتها جبد روحو شوية من رنيم و قعد يقلب فعينيه
ادم وقت وصل عندهم شاف رنيم شادة يدها و مهبطة راسها راح ليها
ادم : رنيم وشبيك !!!
رنيم تحكي ****
كمال كان مدايرلي كوشمار فحياتي وين ما نروح لاحقني حتى كرهت و وليت نخافو بارسكو نعرفو مهبول و يدير كلش بصح فاخر فترة تهنيت منو مزدتش كامل شفته حتى قلت بلاك نساني و ربي هناني منو بصح يا حسرة ماشي كل حاجة نتوقعوها تصرا و اليوم زدت كرهتو و عفتو يدي حسيتها تكسرت قاعدة غير ندلك فيها باش تحبس و دموعي على شوافري ... قلبي خبط وقت سمعت صوتو طلعت راسي بخفة وقت سقساني ؛ ذبلت عينيا و دموعي طاحو لا اراديا
ادم : رنيم وشبيك راكي مليحة
غمضت عينيا و درتلو براسي لالا حسيت بكمال خرج يجري ، ادم عقد حواجبو و قال
ادم : واش دارلك
هبطت راسي فتحت عينيا وقت شدلي يدي لي كانت حمرة
ادم : هو دارلك هكا
درتلو براسي ايه
ادم : يسكن هنا هذا !!
رنيم : اممم فوقكم
ادم : موالف يديرونجيك
رنيم : اممم
ادم : كنتي قادرة تشكي بيه رنيم
مسحت دموعي بيدي
رنيم : خافت محبيتش تكبر لحكاية ...
دارلي براسو ايه
ادم : مراحش تروحي دوكا
رنيم : اممم
خرجنا و كل واحد راح للطونوبيل تاعو
..........
هكذا جازوا اليامات ؛ يامات عمري ما كنت متوقعة نعيشهم و احاسيس عمري ما ظنيت نحس بيها و هاذي اجمل حاجة فالدنيا متقدرش تعرف غدوة واش مخبى ليك ، حياتي وليت نحسلها طعم ماشي كيما قبل كانت محصورة بين الدار و الشغل بصح دوكا ولات عندي خدمة عندي صحابات وسام و ريحاب لي عمري ما ظنيت نلقى صحابات كيما هما نقدر نقول عليهم خواتاتي في وقت صغير والفنا بعضنا و رجعنا نخرجو كيفكيف و نجوزوا اغلب وقتنا كيفكيف
ادم ، ادم نهار على نهار مشاعري تزيد تكبر من جهته فهاذ شهر لي جاز عييت نحبس تخمام فيه مقدرتش فالاول قلت تعلقت بيه سورتو كي كل مرة يعاوني فيها بصح لقيت روحي نستناه فليل مالطاقة حتى يدخل عييت نجبد روحي ماقدرتش لقيت روحي نحبه هذا تفسيري الوحيد عمري ما حسيت بهاذ المشاعر و اليوم ستعرفت لروحي بلي طحت على راسي منبعد ما كنت نضحك على البنات لي نسمعهم يحكيو حكاياتهم مع لي يحبوه اليوم رجعت كيما هما ؛ بصح الفرق هو انه مراني نستنى منه والو عارفة بلي ميحسش بواش راني نحس على هاذي هاذ المشاعر غالقة عليهم فقلبي مرانيش حابة نعيش فكذبة ولا نتامل بزاف باش مع الاخر نتصدم بالواقع
طلعت راسي وقت دخلت ريحاب
ريحاب : رنيم مزال باش تخرجي
رنيم : اهه دوك نخرج
ريحاب : هيا باي باي لازم نروح محمد راهو يستنى فيا
رنيم : اتهلاي فروحك
سلمت عليها و خرجت منبعد انا زدت شوية و رفدت دوزاني و خرجت لقيت الاولاد نصفهم راحو و قعدوا شوية لي كي شافوني دارولي بيدهم باي باي ضحكت معاهم و كملت نمشي وصلت للطونوبيل لقيت ماريا تما مع عمها كانت راح تركب فطونوبيلتهم رجعت تجري باستني تبسمت و قلتلها
رنيم : شطورة بلاكي تنساي تلوني رسومات لي مديتهملكم
ماريا : ايه
طلعت راسي وقت شفت عمها جا قدامنا
مراد : مساءالخير مدام
رنيم : مساء النور .... اممم ماريا حبيبتي انا لازم نروح
ماريا : باي باي
ركبت فالطونوبيل و رحت
واحد نصف ساعة كنت لحقت للدار ؛ فتحتلي سولا وقت سمعت الحس سقسيتها
رنيم : كاين ضياف ؟؟
سولا : ايه جات رباب و ماني فاطمة
رنيم : اهه اوكي
نحيت سباطي ( حشاكم ) و دخلت سلمت عليهم
كيما فرحتك ب ثلاثة حلقات فرحوني بالتفاعل تاعكم الزينات و الى الملتقى ان شاء الله في بارت جديد 💚
YOU ARE READING
انت املي _ باللهجة الجزائرية 🇩🇿 _
Romanceحكايتنا هاذ المرة غير باقي التفاصيل تعرفوهم فالكرونيك الكرونيك من تاليفي و هي من نسج الخيال 💛
