انت املي _ باللهجة الجزائرية 🇩🇿 _

بارت 27

باش نتفاهمو نلقى تفاعل على هاذ الحلقتين نحطلكم الحلقات بالسبت ان شاء الله عادي ملقيتش نحط مور رمضان ان شاء الله 😕😂

غمضت عينيا و تبسمت بقهرة عمرها مراح تبطل عادتها خرجت من تما بعدما كملت هدرتها نحيت حوايجي و حطيت الطبسي لي فيه الفاكهة و ديتهولها رجعت نطيب فالعشاء لي غير طاب وجدت الطابلة و مع الاخر سولا محبتش تاكل قالت بلي كلات تاكوس قبل ما تدخل لليكور و ماما كانت رقدت
قعدت فوق الطابلة وحدي نخلط فالجواز هذاك بالمغرفة من كثرة ما عييت لابيتي تكوباتلي كرهت كلش و كرهت روحي بالاخص لقيت روحي انا دايمن لي نمد و الناس تدي بلا مقابل لوكان يطلبوني فعيني نمدها و منهدرش و نتقبل كل انواع التجريح تنهدت حاسة روحي عييت بزاف حاسة الدنيا ضياقت بيا كل ما نقول الدنيا ضحكتلي نرجع نولي للصفر ماما لي كلما نقول خلاص تناسات حكاية الزواج ترجع تفاجئني بكلام يجرحني كثر من المرة لي قبلها و الحاجة كي تتكسر مرة متتعاودش تولي كيما كانت قلبي طاب طاب من كثرة ما سمعت كلام فحياتي على هاذي ننصح اي وحدة تقرا فكلامي هذا ما تخليش الناس يجرحوك و يفوتو حدهم معاك بارسكو اذا صرات مرة و زوج و ثلاثة راح يوالفو فيك يوالفو يستنزفو طاقتهم منك و فالاخر راح تتكسري بزاف و هاذي ليكم تاني ما تجرحوا حتى انسان صعيبة بزاف كسر خواطر الناس بلاك كلمة نتوما تقولوها بلا قصد ولا وعي بصح متقدروش تشوفو الاثر لي تخليها فالانسان  .... تفكرت ادم و كلام ماني فاطمة ضحكت باستهزاء من روحي و انا نخمم فيه و فليال الفرق بيناتنا كبير مرانيش نقلل من قيمتي بصح هاذي هيا هي طفلة شابة طويلة عندها لاطاي تهبل متهلية فروحها حطة بزاف و باين عندها شخصية قوية و هي اكثر شخص يوالم ادم بارسكو يتشابهو فكلش نضت رفدت هاذيك الماكلة لي ما تمستش كامل فرزت الكوزينة و رجعت لشمبرتي و غير حطيت راسي فوق المخدة رقدت

......

من تاليف  youchroniquedz

هكذا جازت السمانة على ابطالنا رنيم الصباح تكون مع الخدمة و لعشية تروح عند فاطمة تعاونها و هكذا حتى لحقت لخميس
طلعت رنيم و وسام لفوق عند فاطمة دوك تقولو واش جاب وسام ؛ هي فاطمة عرضت صحابات رنيم بحكم رنيم قايمتلها بكلش و تعرف بلي ريحاب و وسام هوما الوحيدات لي قراب ليها فعرضتهم و بمانه وسام تحب الهول جات باتت عند رنيم باش تعونهم منقبل و ريحاب راح جي غدوة للعشا برك ؛ ريهام و لجين تاني جاي بارسكو كانوا معروضين و بيانسور دار ادم كانوا جاو منقبل

طلعوا لفوق لقاو فاطمة قدام الدار لي مقابلتها بحكم فتحوها باش يعشيو تما الرجال

فاطمة : ها رنيم جيتي
رنيم : واش ماني فرغوا الصالون
فاطمة : راهم يفرغوا فيه و نتوما ابداو سيقوا الشمبرة لكبيرة منبعد كي يكملوا الصالون روحوا ليه
رنيم : اوك وسام امشي قدامي

راحوا جابو الماء و الصابون و كامل واش يسحقوا و راحو للدار هذيك رنيم كي شافت الرجال فالصالون زربت فمشيتها باش تدخل للشمبرة شافها غيث دارلها بيدو سافا تبسمت معاه و دارتلو ايه

وسام : رنيم شكون هذا قولي
رنيم : غيث صاحب ادم وليد وليد ماني فاطمة
وسام : يا جدك مقلتليش بلي كاين هاذ المنتوج هنا لوكان جيت هذا شحال ... بصح حاسة بلي شفتو منقبل بصح وين
رنيم : هاكي
وسام : وشنو
رنيم : البالي ابداي نقي فالشمبرة
وسام : اففف

بدات تبالي و رنيم معاها حتى دخل غيث

غيث : رنيم

داروا بين زوج عندو

رنيم : انعم

وسام قاعدة تخزر فيه و تتبسم و هو تاني شافها و تبسم معاها

غيث : فطومة راهي فالصالون تسحقك
رنيم : ايه

حطت البالي و خرجت و غيث كان رايح منبعد دار تبسم مع وسام غمزها و خرج و هي ذابت فبلاصتها و حمارت قاعدة تمروح بيدها منبعد بدات تضحك و تغني

وسام : و الله عملها و غمزني جا كلم امي و بابا ( هاذي غنية اذا تعرفوها ) و ان شاء الله غدوة يخطبني ايييي

قاعدة تفرفط وحدها و تضحك حتى دخلت رنيم لقاتها تتبهلل

رنيم : وشبيك يا طفلة هبلتي
وسام : اههه
رنيم : ركزي روحك شوية
وسام : خلاص خلاص

كملوا يسيقوا فالشمبرة حتى لقات غيث عاود جا

غيث : رنيم رانا كملنا الصالون فرغناه اذا تسيقوه
رنيم : ايه صحا
غيث : كشما تسحقو تاني
رنيم : اههه لالا تعيش

خرج و هما كملوا واحد خمس دقايق ولا

غيث : رنيم ارواحوا تتعشاو راهو جا عمي منصف و جاب معاه العشاء من برا
رنيم : انا مرانيش قادرة ناكل دوكا
غيث : و صاحبتك ... قصدي بلاك تكون جاعت جي تتعشى قبل مايبرد

ضيقت عينيها فيها

وسام : ايه رنيم انا جعت نروح نتعشى هذاك هو

حطت لي فيدها و خرجت و غيث خرج تاني

رنيم : ربي يستر من الحكاية لي راح تخرج موراهم هادو

يتبع 🧡🧡💛💛💚💚