انت املي _ باللهجة الجزائرية 🇩🇿 _

بارت 56

خديجة : انا نحبك نحبك منهار شفتك ( حشمت فبلاصتها ) و تكذب لوكان تقول بلي ممرقتليش .... ادم مراح تقول والو

قلبها وجعها و هي تسمع فيهم كانت راح تروح لوكان مسمعتش واش قال الشي لي خلى قلبها يضرب قريب مخرج من بلاصتو
ادم : بصح انا نحب واحد اخرى

غمضت عينيها كي قاللها هكذاك و قالتلو

خديجة : شكون هادي

رنيم قلبها بدا يخبط حطت يدها عليه خايفة تسمع اسم واحد اخر

ادم : رنيم 

فتحت عينيها ؛ عمرها ما حطت فبالها بلي يقدر يكون يحبها

.....

خديجة : ههه رنيم

دار ليها

ادم : و دوكا تقدري تخرجي خليني نكمل

قبل ما تخرج رنيم كانت رجعت للشمبرة ؛ تكات الباب و بدات تقرص فروحها

رنيم : مرانيش نوم

بدات تتبسم وحدها و تتفكر فلي قالو حتى قاطعتها فاطمة

فاطمة : يا طفلة يا طفلة
رنيم : اههه ماني ... انعم
فاطمة : وشبيك مصبح و انا نهدر معاك و نتي تتبسمي وحدك
رنيم : اهه والو
فاطمة : قريب تكملي
رنيم : ايه قعدلي نسيق برك شمبرة
فاطمة : ملا كي تكملي اهبطي باش نحطو نفطرو كاين لي جاع
رنيم : ايه

خرجت فاطمة و رنيم كملت تسيق

.......

ميرا : افففف تحمست بالزيادة واش داني نجي ؛ يديا تحرقو بلاجافيل

كملت تحك فالتواقي حتى سمعت وسام تهدر موراها

وسام : خير جاتك صعيبة تحكي تاقة

دارت ليها ميرا

ميرا : خير واش تسحقي
وسام : نسحق حاجة وحدة ... بعد من الراجل لي يحبني
ميرا : ههه قصدك ملي تحبيه ماشي لي يحبك
وسام : ههه ضحكتيني ميرا تعرفي اكثر واحد يغيض فالحكاية نتيا ..... ( دنات عندها ) .... عشقتي واحد عمرو ولا عبرك ولا حبك ههه مدارلكش الربع فواش دارلي انا و هكذاك قاعدة تجري موراه و فالاخر خانك و كي خانك باش فطنتي تعرفي وقت كان يحكيلي واش كنتي ديري كيما المذلولة كنت نقولو حبيبي انسى الطفلة باينة مريضة
ميرا : تعرفي تنطبق عليك الهدرة تاع مبتسمين رغم الاعاقة مالغري السيد ماشي شايفك كامل و نتي تجري موراه رانا شفناه اليوم مليح كيفاش يعاملك على هاذي مكلاه تبيني بلي راكم فرحانين مع بعضكم و المريضة لي راكي تهدري بيها راكي دوري مع فضلة غيرك نقصد غيث و روحي وصليلو هدرتي مليح و نزيدلك انا لوكان محبيتش نطلقو صدقيني منخليهولك و مدامك راكي معاه معنتها انا حبيت و تعرفي شكون لي يغيض فالحكاية ماشي انا تتتت راكي غالطة لي يغيض هو باباك لي بنته خرجت **** خطافة رجال فهمتي

رمات الشيفون لي كانت تمسح بيه على وجهها و راحت و خلاتها مسحت وجهها مكرزة

وسام : مزال متعرفيش وسام مليح اذا مخليتوش يكرهك و ميزيدش يشوف فيك منتسماش وسام

........

تلمو كامل ياكلو فالارض فوق واحد الغطاء كانت فرشتو فاطمة بحكم الدار كانت فارغة ؛ حطتلهم حقهم تاع الماكلة لي طيبتها و سيف كان زاد شرالهم بيتزا من برا
دخل ادم كان اخر واحد لحق ؛ قعد قدام فاطمة

فاطمة : ارواح وليدي هاوليك حقك
ادم : يعطيك الصحة ماني
فاطمة : بلا مزية وليدي

غير طلع راسه جات عينه فعين رنيم لي كانت تخزر فيه ، دور راسو للطبسي متجاهلها

هبة خبطت رنيم

هبة : بهدلتينا يا طفلة
رنيم : وجعتيني هبة
هبة : اا يما الطفلة من قطن تتوجع بالخف
رنيم : ارواحي نسييلك
هبة : ههه خلاص خلاص

صونا تليفون ادم ناض و راح للكوزينة

ادم : الو وي

مسح على وجهو

ادم : متقدروش تخليوها على سمانة .... ايا خلاص صحا

كوبا و رجع لبلاصته منبعد كل واحد رجع لبلاصته كملو خدمته و ولاو للدار و هكذا خلاص النهار على ابطالنا

نهار جديد و احداث جديدة :

فاطمة كانت قاعدة فشمبرتها تقرا فالمصحف حتى سمعت صوت الباب

ادم : ماني نقدر ندخل
فاطمة : .... صدق الله العظيم ..... ادخل ادم

دخل و تبسم معاها قعد قدامها و قاللها

ادم : تقبل الله
فاطمة : امين ... خير ما جابك
ادم ( شدلها يدها ) : فطوم انا لازم نولي
فاطمة : وين
ادم : لخدمتي عيطولي لبارح و قالولي la mission تاعي خلاصت هنا و لازم نرجع 
فاطمة : ادم كيفاش هاذي قوللهم نكمل هنا وعلاش هكذا ناوي ديرلي لاطونسيون
ادم : يا ماني خدمتي تقول هكذا
فاطمة : و وقتاش تروح
ادم : ليوم فليل نديماري
فاطمة : لالا ادم

طرطقت بالبكاء

ادم : ماني وعلاش البكاء وعلاش ديريلي هكذا هيا فطوم مسحسي دموعك
فاطمة : لوكان غير مجيتش مالاول خليتني والفتك و دوك راح تروح حرام عليك ادم ... و كيفاش دير ادم حتى والديك دوك يجيو يعيشو هنا وين حبيت تبات هامل تما لا ماكلة عليك لا رقاد شكون يغسلك حوايجك اهه ادم يا وليدي حبس الخدمة هادي خلينا منها و دير projet وحدك ولا خدم اي خدمة