العروس في الثوب الاسود

١_________٢

العروس في الثوب الاسود
البارت الاول

في وقت ما وفي زمن جميل مضى
كان لدي أم وأب وأخت وأخ.

كان لدينا صباح نتجول بين ردهاته ونحن نصافح كف الحُلم.
كانت قلوبنا تقيم افراح واعراس من شدة الفرح .
وتطرق نوافذ الفجر ضحكاتنا .
منذ أن رحلو عني اختلسو قلبي مني وما عدت أعرفه
ما عدت افهم هذا التخبط الذي يسكن اعماق صدري.

لا اعرف أن كانت امنياته ما تزال موجودة أم انه تخلى عنها عندما ودعتكم.
لربما يمر الفرح الى جانبي ولا اتمكن من رؤيته أو الالتفات له في حين أني منهكة في المخاوف والأنهزامات المتتالية..

مصابة بفزع لاينفك يلاحقني
أخاف أن تغادرني وجوه أحبتي
قبل أن اشبع نضري منها
أخاف أن افقد رائحتهم
تعزيني ثيابهم الصامتة
اخاف أن افتش عن أماكنهم ، عن مقاعدهم
عن الطرقات التي مرو عليها
عن الاوطان التي سكنو فيها
وتصفعني حقيقة سفرهم الابدي عن مخيلتي......
...
...
...
فتحت عيني احس بروده بعظامي اريد اتحرك ما أكدر
جسمي تعبان وضلوعي احسها متكسرة

احاول اكوم وافشل ما اكدر شدعي عليك عساك بحركة كلبي وكل عظمه كسرتها بجسمي كون الله يكسرك .
تعبت الهي بعد ما اتحمل كمية الضرب والأهانة وين اروح وييين .
اباوع داير مدايري الاغراض متطشرة والتحفيات متكسره والصالة يرثى لها يمكن مثل حالي واكثر ..

ورة كل كتلة انكتلها اكوم وانظف الهوسة اللي سواها واشيل الغراض اللي كسرها وارجع كلشي بمكانه لان حضرته لازم من يرجع كلشي مرتب ونظيف .

ولازم احضرله الميز بيدي اي اني احضره اله بيدي
مجبورة..

حاولت اكوم واتجة ع ايدي اكوم واوكع الى ان سمعت صوت الموبايل يرن خلصت اول رنة والثانية واني احاول اكوم ماكدر رجلي متساعدني...

خلصت رنه الموبايل وصار هدوووووء حاولت اوكف واخيرا كمت كوة انتجيت بالقنفة وكفت ، كمت ادور ع الموبايل مادري وينه راح ويه الهوسه وين الكاه هسه

اباوع منا ومنا بعدني دا ادور رجع دك رحت اجر رجلي وامشي كوة وصلت للمكان البيه الموبايل لكيته مشمور جوة الطبلة..

طلعته شفت رقم غريب واني العينتين محذرني ممنوع اجاوب واذا جاوبت اعرف شراح يصير بيه تجنبآ للمشاكل مرديت لان اعرفه شنو وشلون يتخبل عليه اذا عرف اني فاتحه خط على رقم غريب..

انطفه ضوه الموبايل كعدت ع القنفة رجعت راسي ليوره، ورة شوية لمض ضوه الشاشة اجتني رساله فتحتها مكتوب رسيل أني ريناد ردي ..

فتحت عيني ع وسعهن اريد اتنفس ما أكدر ماعرف شنو اسوي ارتبكت وبنفس الوقت فرحت اريد اتصل ع الرقم ايدي ترجف ..
غمضت عيني قوي واخذت نفس واتصلت على نفس الرقم
سمعت صوتها اي والله هذا صوتها ، اخ ياصوتج يا اختي مجرد كالت الو رجعتني لبيتنة بالأعظمية لبيت أمي وأبوية لمدرستنة ...

لحياتنه الحلوة لدلالنة واخذني التفكير وسرحت واتذكر بيتنه ولمتنة ...

نرجع بالذاكرة لقبل كم سنة..

سوسن : يلا رسيل ماما كومي وكعدي اختج صار وقت المدرسة يلا حبيبتي حتى خالو يوديج بدربه تأخرت على دوامي حبيبتي يادوب الحك ابدل وخليتلكم الريوك بالمطبخ .

رسيل : اي ماما كايمة..

كمت والنعس بعيوني اني من النوع كلش احب النوم واكره كعدة الصبح خصوصا بالشتا والدنيا باردة اتعاجز اكوم اسمع صوت ماما تبدل وتصيح علينه يلا بنات خالكم راح ييجي فضوها عاد
رحت اكعد ريناد هم مثلي ويمكن اتعس كوة تكوم تنبل مال نوم ع كولت خالو محمد ..

رسيل : ريناد ريناد ..

احجي وانغها بيدي حتى تكعد ..

رسيل : ولج كومي تاخرنه .

ريناد: كمت والله بس شويه حبابه

رسيل: لاحبابة ولا شي كومي ترة تجيج ماما معلية ..

رحت غسلت واجيت لبست الصدريه والقميص هنا اني صف خامس ابتدائي وريناد صف ثالث بيناتنه سنتين
وماما حبيبتي تريد جهال بعد بس بحكم شغلها متكدر لان ميصير حامل وتداوم .

اعرفكم على عائلتنة ..

بابا حبيبي اسمة صادق يشتغل موظف بمطار بغداد الدولي مضيف طيران..

وماما سوسن هم مضيفة طيران ...

تزوجو عن علاقة حب

اول سنة مصار عدهم اطفال باالأتفاق يعني همه مارادو
بحكم عملهم .

اني شرفت للدنيا من بعد سنتين زواج وحب خمس سنوات اسمي رسيل بابا سماني بهذا الاسم

معنى أسمي_ الماء العذب

ورة سنتين شرفت اختي ريناد للدنيا وطبعا ماما اختارت الاسم هلمرة .