طعنات الغدر والحب بقلم إيمي

الفصل الثانى والسبعون

"طعنات الغدر والحب"
بقــــلـــم...(إيــمــــــــــــى  )
.......................................................
الفصل الثانى والسبعون

كانت ندى فى زيارة لعمر مع ولديها وابنتها
قدمت منى لهم العصير ثم جلست وهى تلاعب ابنتها الصغيرة جنا
منى:تعالى يا عسولة انتى
هاا؟؟اسمك ايه بقى
جنا:جنا
منى:الله اسمك جميل اوى
عمر وهو يبتسم:البنت دى لحد دلوقت بتتكسف تسلم عليا ينفع كده؟؟
ندى:جنا!!
تعالى يا حبيبتى سلمى على خالو
نزلت جنا من على قدم منى وذهبت الى عمر وهى تشعر بالخجل
عمر وهو يحملها:هوبااا
قوليلى بقى انتى بتتكسفى منى ليه؟؟مش انا خالو حبيبك
هزت جنا رأسها بالايجاب
قبلها عمر ثم قال:طب حضن كبير اوى لخالو بقى
لاحظت منى حب عمر للاطفال فظلت تنظر الى عمر وهو يحتضن جنا وكانت تشعر بالحزن لكونها لم تحمل حتى الآن
ندى:مش نيرمين مرات سيف حامل؟؟
انا عرفت منها لما روحت علشان ازورهم هم قالولكوا ولا لسة؟؟
عمر:سيف قالى وباركتله كمان
متتصوريش انا فرحانلهم قد ايه
تغير وجه منى وارتسم الحزن على وجهها وهى تفكر فيما يقال
ندى بنظرات تبدى تلميحا:الا مافيش اخبار ولا ايه يا منى ؟؟
انتوا بقالكوا حوالى 3 شهور متجوزين المفروض يكون فى حاجة جايا فى الطريق
نظرت اليها منى وهى تشعر بالاحراج وقبل ان ترد بادرها عمر قائلا:
جرى ايه يا ندى دى حاجة بايد ربنا لا بايدى ولا بايد منى
ندى:جرى ايه ياعمر انت زعلت ولا ايه؟؟انا بطمن بس على اساس لو فى حاجة لاقدر الله تلحقوها من دلوقت
عمر:نلحق ايه بس احنا متجوزين بقالنا 3 شهور يعنى لسة بدرى على منقول نشوف ان كان فى حاجة ولا لأ
وبعدين مين قالك انى عايز عيال دلوقت انا مرتاح كده ووقت ما ربنا يئذن
هيتم الحمل وكله بأوانه
شعرت منى بالاحراج من هذا الحديث فوقفت وهى تقول:انا هروح اجيب جاتو وحلويات علشان القطاقيط دول عن اذنكوا
ذهبت منى الى المطبخ واخذت تحضر قطع الحلوى وعينيها تدمعان
عمر لندى:جرى ايه يا ندى انت ايه اللى خلاكى تفتحى السيرة دى لما تحبى تسألى عن حاجة ابقى قوليهالى انا بلاش قدام منى
ندى بغيظ:انا نفسى افهم بقى انت مكبر الموضوع اوى كده ليه
هو فيه حاجة انت مخبيها عليا؟؟
عمر:لا حاجة ولا محتاجة كل مافى الموضوع ان الموضوع حساس بالنسبة لمنى لانها متجوزة مع نيرمين فى يوم واحد وكون انك تقارنى بينك وبينها ده فى حد ذاته جارح
وبعدين افرضى اننا مخلفناش فيها ايه يعنى
ندى:فيها ايه يعنى ؟؟لأ طبعا المفروض يكون عندك اولاد يشيلوا اسمك ويكونوا سندك ولا عايز تقضى حياتك كلها من غير ما تخلف
عمر!! لو الحمل اتأخر عن كده متستناش لازم تخليها تكشف علشان لو فى حاجة نلحقها من دلوقت
مش كفاية روحت اتجوزت واحدة اقل منك فى المستوى وجاية من الحوارى كمان عايز تعيش معاها من غير خلفة؟؟
عمر بغضب:ندى!!لو سمحتى متتعديش حدودك فى الكلام منى دى تبقى مراتى واللى يمسها يمسنى ولو انتى مغيرتيش طريقتك فى الكلام عنها
فانا مش هسمحلك انك تجرحيها بالكلام ولا تتكلمى عنها بطريقة مش كويسة لامن وراها ولا قدامها انتى فاهمة
ندى بغضب:ايه ده يا عمر انت اول مرة تكلمنى بالطريقة دى هى للدرجة لحست عقلك
انتفضت وامسكت بيد ابنتها الصغرى وقالت لاولادها:يالا بينا يا ولاد خالكوا خلاص مبقاش زى زمان بقى واحد تانى
اتت منى بالحلوى فوجدت ندى تريد المغادرة
منى:على فين ياندى انا جيبت الجاتوه وبعدين انتى مشربتيش العصير
ندى باستهزاء:ما انا شربت
شربت كتير والبركة فيكى
تركتها وغادرت
وضعت منى الصينية ونظرت الى عمر بحزن قائلة:انت زعلتها ولا ايه ياعمر؟؟
عمر وهو يتحسس شعرها:متحطيش فى بالك دى اختى واعرف اتعامل معاها ازاى
المهم متكونيش زعلتى منها
منى:لا ابدا هى عندها حق تطمن على اخوها ونفسها تشوف ولاده
عمر!!ممكن تسمحلى اروح اكشف عند دكتورة يمكن نعرف سبب التأخير واهو نطمن؟؟
عمر:جرى ايه يا منى هو كلام ندى اثر عليكى ولا ايه؟؟
دول يدوب 3 شهور اظن انها مش مدة كافية تستدعى القلق ده كله
منى:معلش علشان خاطرى لو بتحبنى سيبنى اكشف واطمن
انا يا سيدى عايزة اعرف ان كان فى سبب يمنع الحمل ولا لأ
عمر:وافرضى بقى انك طلعتى سليمة؟؟هتطلبى منى اكشف انا كمان؟؟
منى:لاعشت ولا كنت ان طلبت منك كده
انا كل اللى يهمنى نفسى وبس عايزة اعرف ان كان السبب منى ولا لأ
لكن انت يا حبيبى عمرى ما هطلب منك ولا هلمحلك حتى انك تكشف
انا بعمل كده علشانك انت والله ماعلشان نفسى
ضمها عمر على صدره وهو يتنهد قائلا:احنا مش عايزين ندخل نفسنا فى دوامة ونشغل دماغنا انا بقول نسيبها على ربنا وخلاص
منى:طب وافق بس انى اطمن من الدكتورة وبعد كده اوعدك انى مفتحلكش السيرة دى تانى
عمر بصوت هادئ:اللى انت عايزاه
انا مقدرش احرمك من حاجة نفسك فيها
منى:ربنا يخليك ليا ياعمر وميحرمنيش منك ابدا
................................
لم تؤجل منى موضوع الكشف وفعلت فحوصات فى اسرع وقت واخيرا ارتاح قلبها عندما علمت انها لا تعانى من اى عائق يمنعها من الحمل كم كانت سعيدة لهذا الامر ولكنها ترددت ان تخبر عمر بذلك واخذت تفكر مع نفسها فوجدت انه من الافضل الا تخبر عمر بهذا لان ذلك بالتأكيد سيؤثر سلبا عليه وسيظن ان السبب فى عدم الانجاب منه هو ففضلت ان تخفى عنه امر الفحوصات وذهابها للطبيبة
فعندما سألها عن ذهابها للطبيبة قالت له انها ذهبت وقبل ان تدخل اليها غيرت رأيها واقتنعت بكلامه ولابد ان تترك الامر لله وان اراد الله ان يرزقهم بالذرية فسيحدث
تنهد عمر بارتياح لهذا وصدقها وعاشا حياتهما بهدوء تاركين الامر لله
مافعلته منى كان تصرفا حكيما لانها لم ترد ان تجرح مشاعر زوجها لان عمر كان رافضا من البداية ان يدخلا فى دوامة الكشف والفحوصات كما انه لن يقبل بان يذهب الى الطبيب لعمل الفحوصات اللازمة له وسيكون الامر فى غاية الحساسية بالنسبة اليه
................................
كان كارم مستلقى على سريره وقد اصيب بالبرد بسبب تعرضه لبرد الصحراء وهو بدون ملابس وجسده كان مبتلا بالماء
وكانت احدى العاملات تضع قطعة قطن بها مطهر على الجروح التى بوجهه وبينما هى تفعل ذلك ضغطت بعض الشئ على الجرح فتأوه قائلا:آه حسبى حسبى
انتى ايه بتفحتى بالراحة شوية
العاملة:انا آسفة يا كارم بيه
كان فؤاد جالسا امامه فقال:وبعدين يا باشا ناوى تعمل ايه
كارم للعاملة:سيبى الهباب اللى فى ايدك وامشى يالا معونتش محتاج حاجة
العاملة:امرك يا كارم بيه
خرجت العاملة بينما نظر كارم الى فؤاد والرغبة فى الانتقام بادية على ملامحه
ضغط على اسنانه وقال:لازم تجيبلى الكلب ده لغاية عندى يبوس جذمتى
انت متعرفش عمل فيا ايه هو البغلين اللى كان جايبهم
تأوه من ظهره عندما حاول ان يعتدل وقال:دول مرمطونى
انا؟؟؟
انا يتعمل فيا كل ده ؟؟
فؤاد:هدى نفسك يا باشا وخلينا نفكر بهدوء
كارم:هو انا لسه ههدى ده مضانى على اعتراف بكل حاجة عملتها
فى سلمى والمصيبة انه كتبنى اعتراف بانى مضيت سلمى على عقد لشركة وهمية علشان اورطها معايا فى تجارة المخدرات يعنى روحت فى داهية من كل ناحية
فؤاد:وايه اللى خلاك تعمل كده بس يا باشا ماكونت تستحمل
كارم بغضب:ما انا استحملت يافالح اومال المطبات اللى فى وشى دى بسبب ايه ماهى بسبب انى رفضت امضى من الاول
الحاجة الوحيدة اللى مقدرتش عليها هى الكهربا
وحاولت استحمل لكن مقدرتش
فؤاد:انا بقى عندى حل هيخليه يجيلك لغاية عندك ومعاه الاعتراف ومش بس كده ده هيبوس رجلك علشان تسامحه كمان
كارم: هو ايه الحل ده الحقنى بيه ؟؟؟
فؤاد:نخطف حد من اهله ونهدده اذا مجاش وجاب معاه الورقة هنخلص عليه
كارم:هوده فاضله حد من اهله انت كمان
عايزنا نخطف مين؟؟سلمى تانى؟؟مينفعش لان الظابط حاطط عليها حراسة مشددة من ساعة اللى حصل ولو هوبنا ناحيتها الموضوع هيتهرش
عمته؟؟معتقدش دى هتجيبه على ملا وشه ده غير انها لو اختفت الكل هياخد خبر لانها ام سلمى وهنقلب الدنيا علينا لان الظابط مش هيسكت
فؤاد:مراته يا باشا اظن دى بقى هتجيبه على ملا وشه وهيترجاك انك متئذيهاش وساعتها بقى هتقدر تتحكم فيه زى ما انت عايز وعمره ما هيقدر يبلغ لانه عارف انه لو فكر يعملها يبقى عمره ماهيشوفها تانى
كارم:هو اتجوز؟؟
فؤاد:جرى ايه يا باشا انت مش معانا فى الدنيا ولا ايه ده متجوز من كام شهر
كارم:والله فكرة
برافو عليك يا فؤاد هو ده الكلام
فعلا مراته هى الكارت اللى هنقش بيه ويبقى يعملى فيها دكر ويبلغ ساعتها هنخلصله عليها ويبقى يثبت بقى ان لينا دخل بحاجة
فؤاد:يعنى انفذ يا باشا؟؟
كارم:ودى عايزة كلام؟؟طبعا نفذ
اموت واشوفه جاى مذلول قدامى وساعتها بقى هطلع عليه القديم والجديد ابن سالم نصار
بس اوعى توديها نفس المكان اللى كنا حاطين فيه سلمى
انا عايزك تحطها فى مكان الدبان الازرق ميعرفلوش طريق جرة
فؤاد:امرك يا باشا
.....................................
اقترب ميعاد فرح ابنة نادية التى ستسافر دادة لتحضر حفل زفافها كما وعدت اختها بذلك واخبرت كل من سيف ونيرمين بأنها ستسافر لمدة اسبوعين لتساعد اختها فى اعداد بعض التجهيزات الى تتم قبل حفل الزفاف فقد وعدتها بذلك
حزنت نيرمين لان والدتها ستبتعد عنها تلك الفترة ولكن دادة اخبرتها بانها قد تعتذر لنادية عن حضور الحفل بسبب تعب نيرمين فى الحمل الا ان نيرمين تظاهرت بالفرحة وقالت لدادة:
متقلقيش عليا يا ماما انا كويسة روحى احضرى الفرح علشان طنط نادية متزعلش وابقى سلميلى عليها وعلى بنتها وباركيلهم بالنيابة عنى
دادة:بس شكلك مش مبسوطة
انا ممكن مروحش واعتذر...
قاطعتها نيرمين قائلة:لا يا ماما مالوش لازمة انا كويسة والله انا بس كل اللى مزعلنى انك هتوحشينى مش اكتر
احتضنتها دادة وقالت:انا هبقى اتصل بيكى كل يوم علشان اطمن عليكى
اهم حاجة انك تتغذى كويس وتاخدى بالك من نفسك اوك؟؟
نيرمين:حاضر يا ماما المهم تاخدى بالك انتى من نفسك وتروحى وتيجى بالف سلامة
سافرت دادة بعد ان اخبرتهم بيومين وفى ذلك اليوم كانت نيرمين جالسة فى الفراندة وهى تنظر الى الخضرة من حولها وهى غارقة فى افكارها
جاءها سيف من خلف ووضع يده على عينيها
انتفضت نيرمين بعض الشئ وقالت:سيف!!
نزع سيف يده من على عينيها وجلس امامها قائلا:الجميل سرحان فى ايه؟؟
نيرمين:ابدا مافيش
بس انت جيت بدرى النهاردة على غير عوايدك
سيف:عارفة انا جيت بدرى ليه؟؟
نيرمين بصوت هادئ:ليه؟؟
سيف وهو يقرب وجهه منها:علشان وحشتينى
اخفضت نيرمين بصرها للحظات ثم ابتسمت وقالت:بجد يا سيف؟؟
سيف وهو يبتسم:طبعا بجد
امسك بيديها ونظر فى عينيها قائلا:اذا كنتى بتوحشينى وانتى معايا
مش هتوحشينى وانتى بعيدة عنى؟؟
تنهدت نيرمين بخجل وابتسمت قائلة:انا لولا انى عارفة ان مرواحك للشركة ده ضرورى انا مكونتش خليتك تبعد عنى ابدا
لانى بشتاق لك فى كل اللحظة
سيف!! انت بالنسبة لى النفس اللى بتنفسه
قام سيف من مكانه وهو ينظر اليها
نيرمين:على فين
حملها سيف وهو يقول:انا بقول ندخل نتكلم جوه بعيد عن عيون الناس احسن
نيرمين بخجل:استنى بس يا سيف عيون الناس ايه هو فى حد حوالينا؟؟
دخل سيف بها الى الغرفة وهو يقول:اصل الكلمتين اللى انا عايز اقولهوملك مينفعش يتقالوا فى البلكونة
نيرمين:طب استنى بس
وضعها على السرير
ثم ذهب لاغلاق باب الفراندة وفرد الستارة
نيرمين:وليه كل ده يا سيف؟؟ماكنت قولت اللى انت عايزه بره وخلاص
سيف وهو يبتسم لها بتلميح:اصلها كلمة سر
اخفضت نيرمين بصرها خجلا حيث انها فهمت ما يرمى اليه
..................................
وقفت منى امام المرآة وهى تسوى حجابها لتتأكد من انها جاهزة فرن هاتفها النقال
جرت عليه بلهفة وفتحت قائلة:ايوة يا حبيبى انا جهزت خلاص
عمر:طب يالا انزلى بقى انا واقف تحت مستنيكى
منى:ثوانى واكون عندك
انهت منى المكالمة واخذت حقيبتها وخرجت
وجدت عمر بانتظارها داخل سيارته فركبت بجانبه وقالت:مقولتليش بقى هتودينى على فين؟؟
عمر:لااااا دى مفاجأة مش هقولك الا لما نروح
منى:طب لمحلى حتى انت من ساعة ماقولتلى انك عاملى مفاجأة وانا هتجنن واعرف هى ايه؟؟
عمر وهو يبتسم:مش هقولك اى حاجة الا لما تشوفيها بعينك
بعد حوالى نصف ساعة اقتربت السيارة من المكان الذى يقصده عمر فطلب من منى ان تغمض عينيها
منى:حاضر اهوه؟؟
بس يالا بقى علشان لو طولت اكتر من كده هفتح عينى
عمر:لأ اوعى هزعل منك بجد
منى وهى تبتسم:حاضر يا سيدى بس يالا بقى
نزل عمر من السيارة وفتح الباب الآخر وانزل منى واوقفها بمواجهة المفاجأة التى حضرها لها
عمر:فتحى بقى
فتحت منى عينيها فوجدت نفسها امامها فيلا فخمة فى قمة الجمال وامامها حمام سباحة كم كانت رائعة بحق
منى بسعادة بالغة:اوعى تقول ان دى هتبقى فيلتنا
عمر:هتبقى؟؟
لأ دى فيلتنا فعلا انا بقالى فترة بشطب فيها علشان ننقل فيها
قريب يلا بقى عاوزك تتفرجى عليها من جوه علشان هخليكى تختارى العفش بتاعها على ذوقك
وضعت منى يدها على قلبها قائلة:لا يا عمر كده كتير بجد
انا حاسة ان قلبى هيقف من الفرحة
معقولة!!
بقى انا هعيش هنا؟؟
عمر:انتى مستقلية بيا ولا ايه انا فى امكانى اجيب فيلا من زمان واكتر من واحدة كمان لكن انا اللى مكونتش بحب اعيش فيها وخصوصا انى كنت عايش لوحدى زى ما انتى فاهمة وكنت مأجل موضوع الفيلا ده لبعدين
مش يالا افرجك عليها من جوه بقى؟؟
دخلت منى وعمر الى الفيلا وتفقدت كل شبر فيها وهى لاتصدق دقة وجمال وروعة تصميمها وبعد ان تفقدتها كلها
نظر عمر اليها قائلا:هاا ايه رايك؟؟
منى بسعادة:رايى؟؟رايى ايه بس انا حاسة انى بحلم
عمر:لأ مبتحلميش والدليل على كده انك موجودة فيها دلوقت
منى وهى تلف ذراعيها حول رقبة عمر بدلال:بصراحة يا حبيبى مفاجآتك كلها تجنن بس بالراحة عليا انا مش حمل الحاجات الحلوة دى انا خايفة المرة الجاية مستحملش واطب ساكتة
عمر وهو يبتسم:الف بعد الشر عليك يا جميل
نظر اليها قليلا ثم قال وكأنه تذكر شيئا ضايقه:يووووووه شوفتى الحظ؟؟
منى:ايه يا حبيبى فى ايه؟؟
عمر وهو يبتسم:للاسف اوضة النوم مافيهاش سرير
منى:ماهو طبيعى تكون مافيهاش سرير مش فاضية ولسة هتتجهز
عمر وهو ينظر اليها بتلميح:اصلى كنت عايز اعرف السرير بسوستة ولالأ
تنهدت منى وهى تبتسم قائلة:شكلك كده مش ناوى تجيبها البر انا بقول يالا بينا احنا مش خلاص اتفرجنا؟؟
غمز لها قائلا:طب ايه؟؟
منى:ايه ايه؟؟
اراد عمر ان يقرب وجهه من منى ففوجئ بمن يقول بصوت عالى
عمر بيه!!!نورت يا عمر بيه
التفتت منى وهى تشعر بالفزع ووضعت يدها على قلبها بينما نظر اليه عمروهو يقول بضيق:هو انت؟؟اعمل فيك ايه؟؟حد يعمل كده؟؟
مش تكح ولا تستأذن انت داخل زريبة
الحارس:آسف ياعمر بيه انا بس لقيت الباب مفتوح وحضرتك واقف مع الهانم فقولت ارحب بيك
عمر:وحضرتك كنت فين بقى ان شاء الله دا انا هنا من الصبح محستش بينا غير حالا؟؟
الحارس:كنت بعمل زى الناس ولمؤاخذة
عمر:زى الناس!!!
مالت منى على اذنه وقالت بصوت منخفض وباحراج:قصده كان فى الحمام
عمر:آآآآه طب يا خويا ارجع مكانك وخلى بالك من شغلك كويس
الحارس:حاضر يا عمر بيه
عمر باحباط:يالا يا حبيبتى
مستنية ايه؟؟
ابتسمت منى وهى تكتم ضحكتها
خرج الاثنان حتى وصلا الى السيارة ركب عمر السيارة وبجانبه منى
عمر:قطع علينا اللحظة الحلوة منه لله
منى وهى تبتسم:لحظة ايه بس ما احنا كده كده كنا ماشيين
ابتسم عمر وهو يدير محرك السيارة وانطلق بها وهو ينظر لمنى قائلا:على العموم تتعوض ما احنا كده كده مروحين
ابتسمت منى وهى تنظر اليه ثم تنهدت بسعادة
...................................
كانت نيرمين جالسة فى العيادة الخاصة التابعة للطبيبة التى تتابع عندها وقبل ان يحين دورها رن هاتفها فنظرت فيه فوجدته سيف
ردت عليه بسعادة قائلة:ايوة يا حبيبى
سيف:عاملة ايه يا حبيبتى طمنينى
نيرمين:الحمد لله انا كويسة متقلقش
سيف:طب دخلتى للدكتورة ولا لسة؟؟
نيرمين:عندها واحدة جوه اول ماتخرج هدخلها على طول
سيف:طب اول ما تخرجى من عندها ابقى طمنينى
ولما تروحى برده ابقى طمنينى اوك؟؟
نيرمين:اوك يا حبيبى
سيف:معلش انا مضطر اقفل علشان ورايا اجتماع واول ما هخلصه هبقى اتصل بيكى
نيرمين: ولا يهمك ياحبيبى
باى
انهت نيرمين المكالمة وهى تفكر للحظات فوجدت المرأة التى كانت عند الطبيبة قد خرجت فدخلت بعدها
كان السائق بانتظارها وخلف سيارة نيرمين سيارة جيب بها ثلاثة تابعين لكارم حسين قد كلفوا بالمهمة المتفق عليها
اطمأنت نيرمين على جنينها وعلمت من الطبيبة ان حملها على مايرام وجددت لها الدواء من فيتامينات وكبسولات غنية بالحديد والكالسيوم لتساعد جسدها على تحمل اعباء الحمل
خرجت نيرمين من العيادة وهى تتصل على سيف
رن هاتف سيف وهو داخل غرفة الاجتماعات فاستأذن منهم ووقف جانبا ورد عليها
نيرمين:انا اسفة يا حبيبى ان كنت عطلتلك عن الشغل بس قولت اطمنك انى خرجت من عند الدكتورة وهروح دلوقتى
سيف:طب طمنينى قالتلك ايه؟؟
نيرمين وهى تبتسم:اطمن الحمل تمام والجنين حالته كويسة وكتبتلى على شوية فيتامينات وقالت اتغذى كويس وخلاص
تنهد سيف بارتياح وقال:ماشى يا حبيبة قلبى المهم اول ماتوصلى طمنينى علشان مفضلش قلقان
نيرمين:حاضر يا حبيبى
ارسلت له قبلة فى الهاتف
ابتسم سيف وارسل لها قبلة بصوت منخفض وقال:هتوحشينى على ما اشوفك
نيرمين:وانت كمان يا حبيبى
انهت نيرمين المكالمة وتوجهت الى السيارة وركبتها وانطلق بها السائق وخلفهما السيارة التى تلحق بهما
بعد مدة بسيطة لاحظ السائق ان هناك سيارة تضيق عليهما الطريق وكأنها تتعمد مضايقتهما
نيرمين بقلق:فى ايه ياعم حسين
حسين:مش عارف ياهانم غى عربية كل شوية تزنق عليا
نيرمين بصوت منخفض:استر يارب
وضعت يدها على بطنها وهى تخشى على جنينها
بعد لحظات اصطدمت السيارة بهم من الجنب
فاشار لهم حسين بالابتعاد
اسرعت السيارة حتى سارت امام سيارة نيرمين وتوقفت بعرض الطريق فاضطر حسين للوقوف
نظرت نيرمين الى تلك السيارة وتسارعت دقات قلبها فوجدت الثلاثة يخرجون منهم وكانوا يرتدون ماسكات سوداء على وجوههم
فشل عقلها عن التفكير وحدث كل شئ فى لحظات فلم يلبثوا ان اخرجوا حسين من السيارة وضربوه على رأسه واخرجوا نيرمين رغما عنها وهى تصرخ وكمموا فمها بمخدر حتى غابت عن الوعى وأخذوها واخذواحقيبتها ووضعوها فى سيارتهم وانطلقوا بسرعة الريح
بعد ان انتهى الاجتماع جلس سيف فى مكتبه وهو ينظر الى هاتفه بقلق فلم تتصل عليه نيرمين حتى الآن
فلم يستطع ان ينتظر واتصل بها وهو يشعر بالقلق فكان الهاتف يرن ولكنها لم ترد عليه
زاد قلقه اكثر فاتصل على السائق ربما يرد عليه ويطمئنه الا ان السائق كان فاقدا للوعى بسبب الضربة التى وقعت على رأسه
لم يستطع سيف ان ينتظر فاسرع الى السيارة وقلبه مضطرب من شدة القلق واخذ يتصل على هاتف نيرمين تارة وعلى هاتف السائق تارة الى ان فاق حسين وهى يمسك برأسه والدماء تسيل منها فاسرع الى الهاتف ورد بصوت يستغيث قائلا:الحقنى يا سيف بيه
سيف بقلق:ايه اللى حصل يا حسين برن عليك مبتردش ليه؟؟وفين نيرمين
حكى حسين له ماحدث واخبره بالمكان الذى توقفت سيارته فيه
اسرع سيف بسرعة البرق الى حسين وعندما وصل ترجل من السيارة مسرعا اليه قائلا:مين اللى عملوا كده انطق
حسين:3 يا سيف بيه
3 مغطيين وشهم ضربونى على دماغى وخطفوا الهانم وفص ملح وداب
وقف سيف ينظر الى السيارة وهو لا يصدق وكاد عقله ان يطير فظل يتصل على هاتفها ربما يرد احدا من خاطفيها الا انهم لم يردوا فركل السيارة بغيظ وهو يقول:ياولاد الكلب!!
اتصل سيف على عمر وهو فى قمة التوتر
رد عليه عمر
سيف:عمر!!!لازم تجيلى حالا انا محتاجك ضرورى فى كارثة
مصيبة
عمر بقلق شديد:فى ايه يا سيف انت قلقتنى
سيف:نيرمين اتخطفت ياعمر
عمر بفزع:ايه؟؟ازاى ده حصل؟؟
سيف:تعالالى دلوقت وانا هبقى افهمك كل حاجة بس متتأخرش ارجوك
عمر:طب انت فين دلوقت؟؟
وصل عمر الى حيث ينتظره سيف فنزل من السيارة واسرع الى سيف قائلا بوجه قلق:ايه اللى حصل يا سيف؟؟
سيف:ولاد الكلب خطفوا مراتى اقسم بالله لو لمسوا شعرة واحدة منها لكون قاتلهم واحد واحد
عمر:اهدى بس وخلينا نفكر بهدوء
مين اللى له المصلحة يعمل كده؟؟
سيف:مافيش غيره هو كارم الكلب انا متأكد انه هو اللى ورا الموضوع ده
عمر:كارم!!!وايه مصلحة كارم فى خطف نيرمين
تنهد سيف بضيق وقال:اكيد علشان ينتقم منى و اسلمه الورقة اللى انا مضيته عليها
عمر:ورقة ايه انا مش فاهم حاجة
سيف:انا هفهمك كل حاجة
.....................................
جلس كارم على الكرسى وحوله رجاله ونيرمين ملقاه على الارض وهى نائمة على جنبها
كارم لفؤاد:والله برافو عليك يافؤاد مكونتش متخيل انك هتنفذ بسرعة كده
فؤاد:خدامك يا باشا
اشار كارم الى احدهم لينثر الماء على وجهها
ففعل فشهقت نيرمين وفتحت عينيها بصعوبة ونظرت حولها وهى تحاول ان تعتدل فوجدت نفسها فى مكان غريب ومجموعة من الرجال ضخام البنية واقفين وفؤاد واقف بجانب كارم الذى كان جالسا امام نيرمين وهو ينظر اليها بابتسامة ساخرة قائلا:نورتى يا مدام
شعرت نيرمين ان قلبها سيقف من شدة الفزع وتذكرت ماجرى معها عندما تم اختطافها فقالت بصوت مخضوض:انتوا مين؟؟
كارم:متخافيش يا حلوة
انتى عندنا هنا فى الحفظ والصون لحد ما حبيب القلب يجيب الامانة اللى عنده يا كده يا مش هيشوف الطلعة البهية دى تانى
ابتعلت نيرمين ريقها بخوف وهى لاتفهم ما يجرى
نيرمين بخوف:مش فاهمة حاجة!!
يعنى انتوا عاوزين ايه؟؟
كارم:مش لازم تعرفى احنا عاوزين ايه
بس اللى عاوزينك تعرفيه اننا مبنهزرش واللى بييجى عندنا بيخرج للدنيا شخص تانى من اللى بيشوفوا عندنا يا اما بيتجنن يا اما بيموت
اسهلهالك اكتر؟؟
انتى اكيد تعرفى اللى حصل لسلمى اهو انا بقى اللى عملت فيها كده
نيرمين بخوف:سلمى بنت عمة سيف؟؟
كارم:ايواااا هى دى
اهى دى شرفت عندنا لمدة كام يوم واكيد عرفتى جرالها ايه؟؟
كاد قلب نيرمين ان يتوقف وارتعد جسدها واخفضت بصرها دون ان تنطق فقط كانت تحرك شفتيها بصمت وهى تدعوا فى نفسها ان تخرج من هنا دون ان تتعرض لاى اذى
كارم:يعنى مسألتنيش انا ابقى مين؟؟
ظلت نيرمين مخفضة بصرها دون ان ترد عليه من شدة خوفها
كارم:معقولة تبقى ضيفة عندى ومعرفكيش بنفسى؟؟
اقدملك نفسى
وقف كارم بجسده الطويل ذو البنية القوية وهو يقول باستعلاء:
انا كارم حسين من اكبر رجال الاعمال فى البلد
سمعتى عنى قبل كده ولا اول مرة تسمعى عنى؟؟
على العموم لو اول مرة تسمعى عنى فأكيد وجودك هنا هيعرفك بيا اكتر
عندما سمعت نيرمين اسمه تذكرت كل ما قالته سلمى عنه وازداد خوفها منه ولم تستطع ان ترفع بصرها لتنظر اليه
وضعت يدها على بطنها وهى ترتعد من شدة خوفها على جنينها
ظل كارم يخطو حولها بخطوات بطيئة فسمع صوت هاتفها يرن وقف قائلا لفؤاد:
هاتلى الموبايل ده
امسكه فؤاد ونظر فيه قائلا:برده هو يا كارم بيه ده مبطلش اتصال من ساعة ماجبناها هنا
امسك كارم بالهاتف وهو يبتسم قائلا:حبيب القلب مبطلش اتصال
شكله كده بيحبك اوى
اقترب منها بنظرات غير مريحة قائلا:بصراحة عنده حق هو فى حد يشوف الجمال ده كله وميقعش؟؟
اخفضت نيرمين بصرها ودقات قلبها مضطربة من شدة الخوف
فؤاد:مش هترد يا باشا؟؟
كارم:خليه يرن زى ماهو عايز انا عايزه يستوى على الآخر علشان اول ما نكلمه ينفذ كل طلباتنا من غير ولا كلمة
فؤاد:اللى تشوفه يا باشا
كارم لنيرمين:تعرفى يا مزة لو حبيب القلب رفض ينفذ اللى هطلبه منه هعمل فيكى ايه؟؟
نظرت اليه بخوف دون ان ترد
كارم:شايفة الوحوش اللى واقفين هناك دول؟؟
نظرت نيرمين الى الذين اشار اليهم وكانوا ضخام البنية ذو مظهر مخيف
كارم:هرميكى ليهم واخليهم يمزمزوا فيكى براحتهم
ودول مابيرحموش
ظلت تتنفس بسرعة من شدة الخوف وكاد قلبها ان يقف واخفضت بصرها ولم تنظر اليه