"طعنات الغدر والحب"
بقــــلـــم...(إيــمــــــــــــى )
.......................................................
الفصل السادس والاربعون والسابع واربعون
دخلت زينب الى المطبخ مسرعة وهى تتنفس بسرعة والقلق بادٍ على وجهها نظرت الى رقية وهند بقلق قائلة:
انتو قاعدين هنا والست نيرمين فى المستشفى؟؟
رقية بحزن:مستشفى!!
عندها ايه كفى الله الشر؟
زينب:كل اللى اعرفه ان الست نيرمين فى المستشفى وبيقولو حالتها وحشة اوى
ودادة فاطمة كمان تعبت من قلقها على الست نيرمين ونقلوها الاوضة اللى جنبها
هند:استر يارب
ياترى هم عاملين ايه دلوقت
زينب:احنا هنقعد نتكلم كده ونسيبهم
يلا بينا
رقية:استنى بس يا زينب
هنخرج كده احنا التلاتة ونسيب القصر من غير منستأذن من سيف بيه؟؟
زينب:اطمنى
سيف بيه بنفسه هو اللى بلغ عمى حسين علشان يعرفنا
وطلب مننا اننا نروح المستشفى علشان نبقى جنب دادة فى الظروف دى
خلعت كل من هند وزينب مريلة المطبخ
وغطت رقية الاناء الذى امامها وهى تقول:طب استنى لما اغير هدومى هنروح كده؟؟
زينب:على العموم انا جاهزة روحوا انتوا اجهزوا وانا مستنياكو
رقية:طب هناخد تاكس
ولا عم حسين هيوصلنا بالعربية ؟؟
زينب:انتى رغاية اوى على فكرة
عمى حسين هو اللى هيوصلنا بالعربية التانية
يالا اخلصى مش عايزين نتأخر اكتر من كده
خرجت رقية وهند من المطبخ وتنهدت رقية بضيق وهى تقول:
ربنا يقومك بالسلامة يا ست نيرمين انتى ودادة فاطمة يااااااااااااارب
انا عارفة كل ده كان مستخبيلنا فين؟؟
................................
جلس المحامى مع عمر جانبا ليتكلم معه بخصوص القضية
نظر الاستاذ علاء محامى عمر اليه قائلا بصوت منخفض:
انا عايزك تسمع الكلام اللى هقولهولك وتنفذه بالحرف الواحد علشان اعرف اخرجك من الورطة دى
نظر اليه عمر بملامح هادئة قائلا:اتفضل قول
علاء:لما يسألوك فى النيابة عن البنت دى
قولهم انك لقيتها مرمية على الطريق بنفس الحالة اللى هى فيها دى
وانك متعرفش عنها اى حاجة
متعرفش مين اللى عمل فيها كده
وانك انت اللى انقذتها ومهانش عليك تسيبها وهى فى الحالة دى
عمر:بس انا اعترفت بكل حاجة
علاء:وبعدين بقاااااا
اسمع الكلام اللى بقولك عليه من غير ماتتعبنى معاك
انت عايز تخرج من هنا ولا لأ
عمر:طبعا عايز اخرج
علاء:يبقى تنفذ اللى بقولك عليه
وهم لما يسألوك عن اعترافك قولهم انهم ضغطوا عليك واجبروك على الاعتراف
سهلة مش هنغلب فى الموضوع ده يعنى
عمر :طب ونيرمين
هتعمل معاها ايه؟؟
علاء:دى بقى سيبها عليا انا
هى بس لما تفوق هبقى اتكلم معاها واقنعها انها تنكر اللى حصل
هنديها قرشين كويسين والموضوع يعدى
عمر بضيق:على فكرة نيرمين مش كده
عمرها ماهتقبل تاخد ولا مليم
كنت قدرت اقنعها بالفلوس لما كانت عندى
لو كانت بتاعة فلوس مكونتش عملت فيها كده اصلا
كنت غرقتها فلوس وخلاص
وانا مش هسمحلك تجرح كرامتها
علاء:ياسلام!!!
وانت خايف على كرامتها اوى كده
كرامتها قصاد حياتك ومستقبلك
تختار ايه؟؟
عمر:برده مش موافق على موضوع الفلوس ده
علاء:بلاش الفلوس
هنهددها هنعمل اى حاجة
سيبلى انا الموضوع ده انا هتصرف هلاقى ميت طريقة
المهم انك تعمل اللى بقولك عليه وخلاص
عمر:انا آسف
مش هقدر اعمل كده
ومش عايزك تقرب من نيرمين ولا تضايقها باى حاجة
كفاية اللى شافته بسببى
علاء:هو ده وقت عواطف
لو مسمعتش كلامى ممكن تاخدلك فيها 10 ..... 15 سنة
يعنى مستقبلك هيضيع
لازم تساعدنى انت الاول علشان اقدر اطلعك من اللى انت فيه ده
تنهد عمر بحيرة ثم قال:طب مافيش اى حل تانى؟؟
علاء:هو ده الحل الوحيد
قولت ايه؟؟
سكت عمر قليلا وهو يفكر ثم قال :انا هنفذ اللى انت قولته
بس اوعدنى انك تبعد عن نيرمين خالص
ومتضايقهاش
كفاية المصايب اللى هى وقعت فيها بسببى
سكت علاء قليلا ثم قال:خلاص يا سيدى
نفذ انت بس اللى انا قولتلك عليه
وبالنسبة للمجنى عليها مش هضايقها ولا هعملها حاجة
هنحاول نستعطفها ونترجاها تتنازل
مش هنستخدم معاها اسلوب التهديد ولا الرشوة
حلو الكلام؟؟
عمر:كده بقى انت ريحتنى
...............................
