18 ROSES: Laws of the Elite || #Wattys2017 Winner [UNDER REVISION]

114TH ROSE || She's not an Elite!

114TH ROSE || She's not an Elite!

- MICHELLE SUMASTRE -

Matapos kong makita ang nasabing artikulo tungkol sa akin at sa tunay kong pagkatao na hindi ako isang nouveau riche at hindi ako isang elite ay agad kong nilisan ang lugar na iyon. Ngunit alam ko naman hindi lang hanggang do'n sa lugar na iyon ang mga panghuhusga at mapangmatang tingin ang matatanggap ko. Kahit saan ako magpunta ay naroon ang mapanghusga at mapangmatang tingin ang tinatapon sa akin ng lahat. Para akong naglalakad na walang ulo dahil pinag-uusapan ako kung saan-saan.

Alam ko namang darating ang panahong malalaman ng lahat ang tungkol sa akin... pero masyadong napabilis ang pangyayari. Hindi ko ito napaghandaan.

Hindi rin ako nakatakas sa mga mapangmatang tingin sa loob ng aming classroom. May mga tingin na natatanggap ko tulad sa labas at may iba namang naguguluhan habang nakatingin sa akin. May iba naman na gustong magtanong ngunit hindi nila magawa dahil ayaw ata nilang madamay sa gulo.

Ayoko namang umasa kina Quia at Chantal pagdating sa mga problemang ganito pero para bang nanghihina ako habang tumatagal ako sa lugar na ito.

Dahan-dahan naman akong napatayo nung dumating ang guro namin sa Speech and Oral Communication. "Please, give respect."

Walang sinuman ang sumunod sa akin. Nanatiling tahimik ang iba habang ang iba naman ay sinamaan ako ng tingin na para bang sinasabi nila na 'sino ako para utusan sila'.

"Please, give respect," ulit ko ngunit wala namang sumunod. Napatingin ako sa aming guro at inimuwestra n'ya ang kanyang kamay para paupuin ako.

"Good morning, class."

"Good morning, Madame."

Isang mabigat na paghinga ang ginawa ko kasabay ng paghawak ko nang mahigpit sa aking mga kamay.

Nag-iisa na ako sa lugar na ito...

Ayoko sanang umuwi ngayong tanghalian pero kasi wala akong choice. Kung mananatili ako sa refectory o kahit saan sa Empire Academy, makakatanggap lang ako ng mapanghusgang tingin at mga salita mula sa kanya kaya uuwi nalang ako. Hindi ko alam kung papasok ba ako mamaya o hindi basta ang gusto ko, makaalis ako sa lugar na ito.

Alam kong kaduwagan ito ngunit mas mabuti nang umiwas kesa ang lumaban na alam ko namang hindi ko maipapanalo. Lalo pa't alam na ng lahat na hindi talaga ako isang Elite.

Isang buntong-hininga ang pinakawalan ko kasabay ng pagpapaandar ko ng scooter ni Mama Rona. Tahimik kong binabaybay ang daan palabas ng Empire Academy nung bigla na lamang may nadaanang kung ano ang scooter dahilan para tumilapon ako maging ang scooter ni Mama Rona. Gulat na gulat ako habang nakatingin sa sugat ko sa aking palad maging sa aking tuhod na grabe ang pagdugo. Rinig na rinig ko ang tawanan ng mga schoolmates ko sa Senior High building at agad kong nakita 'yung wire na naging dahilan kung bakit tumilapon ako at ang scooter ni Mama Rona.