طعنات الغدر والحب بقلم إيمي

الفصل الستون

"طعنات الغدر والحب"
بقــــلـــم...(إيــمــــــــــــى  )
.......................................................
الفصل الستون

اقتربت نيرمين من سيف وهى تنظر اليه بحزن شديد وكان مستلقى على السرير وتم تجريد الملابس من الجزء العلوى من جسده ليتم لف منطقة الصدر وجزء من عضلات بطنة باربطة ضغط
كما تم تجبيس زراعه الايمن وقدمه اليسرى،وتم لصق شريط طبى على الجرح الجانبى الذى اصيب به فى جبينه وكان نائما بملامح هادئة كما لو كان نائما
نومته العادية ،ظلت جالسة بجانبه وهى تبكى بصمت حتى لا تقلقه
ظلت تنظر اليه وهى تدقق فى ملامحه ،كم يؤلمها هذا المشهد فها هو حبيبها مستلقى على السرير لا يحرك ساكنا وقد اصيب فى اجزاء متفرقة من جسده كم تألم وكم عانى
قالت بصوت باكى ومنخفض:الف سلامة عليك يا حبيبى
ياريتنى كنت مكانك
انت متعرفش انا بحبك قد ايه ،لو كان جرالك حاجة انا كنت هموت
سيف انا بحبك اوى
اوعى تسيبنى يا حبيبى،انا مقدرش اعيش من غيرك
تحرك راسه بعد ان قالت تلك الجملة الاخيرة وهو يتأوه بصوت منخفض
ظنت انه قد فاق فقالت:سيف
حبيبى انت سامعنى؟؟
تأوه مرة اخرى ثم قال:سلمى
سلمى
تغيرت ملامح نيرمين عندما سمعته ينطق اسمها وتعجبت
فمن الاولى ان ينطق اسم من يحب فلم نطق اسمها
تنهدت نيرمين بحزن واسندت ظهرها على الكرسى وهى تنظر اليه بحزن شديد
كان نطق سيف لاسم سلمى طبيعى جدا لما تعرض له فى سبيل انقاذها من الاغتصاب
وكان عقله مشغولا بالحدث وظلت تلك الاحداث تراوده فى نومه
.................................................. .......
اما سوسن فدخلت لترى ابنتها حتى تطمئن عليها فوجدتها مستلقية على السرير وهى تنظر امامها بنظرات حزينة ووجهها شديد الصفرة من اثر النزيف الذى نزفته وكانت تنظر امامها وعينيها تلمعان
وقفت سوسن بجانبها وهى تنظر اليها بحزن شديد وعينيها تبكيان ثم سحبت كرسى وجلست عليه
لم تنظر اليها سلمى بل ظلت على حالتها تلك،فتنهدت سوسن بحزن ثم قالت:
ليه كده يا سلمى؟؟
ليه تعملى فى نفسك كده؟؟انا مش نصحتك تبعدى عن الراجل ده وقولتلك ان سمعته وحشة؟؟
عاجبك اللى انتى وصلتيله ده؟؟
لم ترد عليها سلمى واكتفت بالصمت المصحوب بالدموع
سوسن:ايه اللى وداكى عنده بالليل كده؟؟
ما تردى؟؟أدى اخرت دلعى فيكى اديكى دلوقتى جيبتيلنا الفضايح وسيرتنا هتبقى على كل لسان
طول عمرك وانتى دماغك ناشفة ومبتنفزيش الا اللى فى دماغك وبس
وادى اخرت تنشيف دماغك
فيها ايه لو كنتى سمعتى كلامى وسافرنا
كان زمانا دلوقت عايشين فى امان ومكنش حاجة من دى حصلت
نظرت اليها سلمى وعيونها تدمع وقالت:ده على اساس ان ربنا مش هيقدر يخلص ذنب نيرمين منى لو سافرت معاكى؟؟
حتى بعد اللى حصلى لسة تفكيرك هو هو متغيرش
كل اللى همك الفضايح وكلام الناس
ثم قالت بسأم:
الناس
الناس
الناس
كل حاجة عندك كلام الناس
جاية دلوقت ترمى اللوم عليا لوحدى وانتى معملتيش حاجة خالص
على اساس ان ربنا خلقنى كده مافيش حد أثر عليا
نسيتى تربيتك ليا؟؟
خلتينى اقضى نص عمرى فى بلد اجنبى مختلفة تماما عن تقاليد بلدى
عمرك مانصحتينى اخلى بالى من تصرفاتى ولا قولتيلى ده يصح وده ميصحش
كنت بصاحب ده وده وتشوفينى وانا ماشية مع اولاد واكلمهم فى التلفون قدامك وانتى عادى جدا
عمرك ما قولتيلى فى يوم ميصحش تروحى لواحد بيته وهو لوحده علشان ميتفعش
لبسى انتى راضية عنه مع انه جرئ فى بعض الاوقات
حتى صحباتى كنتى دايما بتنبهى عليا ابعد عن بنات الحوارى او اللى انتى مسمياهم بيئة
ياريت علشان هم وحشين لكن العيب اللى فيهم من وجهة نظرك انهم مش هاى زينا
احنا فوق وهم تحت فميصحش اللى تحت يبص للى فوق
صحباتى كلهم وانتى عارفاهم مافيهمش واحدة تقدر تنصحنى نصيحة ولو صغيرة لاى مشكلة ممكن امر بيها لانهم سطحيين زيى بالظبط
طول عمرك بتزنى عليا انى مابصش للى اقل منى وان اخلى راسى دايما فوق
خليكى فوق يا سلمى
مافيش حد زيك يا سلمى
متمشيش مع اللى اقل منك يا سلمى
سيف ابن خالك لازم يبقى من نصيبك ماتسبيهوش لاى واحدة غيرك يا سلمى
قربى منه وزنى عليه هتلاقيه بين ايديكى يا سلمى
خلتينى معنديش كرامة وقعدت اتمسح فيه علشان يرضى بيا
صنعتى منى شيطانة فضلت ساكنة جوايا سنين وانا بكبر وهى بتكبر معايا
بقيت شايفة نفسى افضل من كل الناس ومينفعش حد يبقى افضل منى
مسيبتيش ليا فرصة واحدة انى ابقى انسانة كويسة
انا لو ليا صاحبة عدلة وقريبة منى كانت ممكن تنصحنى
لكن لا اب ولا ام ولا صاحبة ولا اى حد فى الدنيا قريب منى ينصحنى ويحمينى من نفسى
انتى فضلتى تبنى جوايا فى سنين كول الشر ده
وبعد ما خلتيه جويا قد الجبل عايزة تهديه فى كم يوم؟؟
للاسف
جيتى متأخر اوى
انتى دمرتينى
اجهشت سوسن فى البكاء ثم قالت:ياااااااااااااااااااه
يعنى انا السبب فى كل اللى انتى فيه دلوقت؟
دى صورتى اللى انتى شايلهالى جواكى؟؟
انا بالنسبة لك منفعش اكون ام ؟؟
سلمى وهى تبكى:انتى عارفة كويس انى بحبك لانك امى ومهما حصل هتفضلى امى اللى بحبها وبخاف عليها بس كان نفسى تنصحينى وتربينى صح
كان نفسى تحمينى من نفسى انا دلوقت معنتش انفع اى حد والحياة بالنسبة لى معدلهاش اى قيمة
انا خلاص انتهيت
سوسن:متقوليش كده يا حبيبتى انتى منتهتيش ولا حاجة احنا معانا فلوس كتير هنسافر وهتعملى عملية وهتتجوزى وهتعيشى حياتك بعيد عن الارف والهم ده
سلمى بحزن:برده؟؟
لسة بقولك عايزاكى تنصحينى وتحمينى من نفسى
عايزانى اعمل عملية واغش اللى هتجوزه؟؟
خلاص انا قررت انى متجوزش طول حياتى واظن ده هو الحل الوحيد لحالتى
ومتهيألى ده لوحده عقاب كافى على كل اللى عملته
انى افضل وحيدة ومتجوزش اى حد حتى لو بحبه وبيحبنى
سوسن:يا حبيبتى انا مش قصدى نغش حد بس انتى اتعرضتى لجريمة بشعة مالكيش ذنب فيها
هتشيلى ذنب انتى ما ارتكبتهوش؟؟
سلمى:لأ ارتكبته
ارتكبته لما زنيت على عمر علشان يعتدى على نيرمين مع انها بنت زيى
والمفروض انى مأذيهاش لكن انا مشوفتش غير مصلحتى وبس ان شالله ادوس على غيرى مش مشكلة واهوه
ربنا خلص ذنبها منى
وهى ربنا نجاها من عمر
لكن انا منجنيش و كارم اعتدى عليا لانى استاهل
وربنا مبيظلمش حد
لو ربنا شايف انى استحق وقوفه جنبى كان سيف قدر يلحقنى لكن للاسف
سيف عمل المستحيل وبرده ملحقنيش
انهارت وهى تبكى ثم قالت:انا اول مرة اعرف يعنى ايه اغتصاب
انا مش لاقية كلمة توصف العذاب اللى شوفته وانا بتعرض للجريمة دى
سوسن وعينيها تدمعان:خلاص بقى يا سلمى علشان خاطرى كفاية تعذبى فى نفسك وسيبك من اللى فات وتعالى نبدأ صفحة جديدة ومن النهاردة اوعدك انى هتغير وابقى حاجة تانية
سلمى وهى تبتسم بحزن شديد:تتغيرى؟؟
ياريتك كنت اتغيرتى من زمان
فات الاوان خلاص
.................................................
وقف عمر امام شقة منى وضغط على الجرس وهو ينتظر امام الباب بقلق
فتحت له ماجدة والدة منى فابتسم لها وقال:حضرتك والدة منى مش كده؟؟
ماجدة وهى تبتسم:ايوة انا ،حضرتك مين؟؟
عمر:ممكن اتكلم مع حضرتك فى موضوع مهم وجوه هبقى اشرح لحضرتك انا ابقى مين
ماجدة:اتفضل
اتفضل
ادخلته ماجدة واجلسته فى الصالة الصغيرة وعم ينظر الى ارجاء الشقة البسيطة بخلسة
وقفت امامه ماجدة وقالت:تشرب ايه؟؟
عمر:متشكر اوى مش عايز اشرب حاجة انا بقول ادخل فى الموضوع على طول
ماجدة:اتفضل انا سامعاك
عمر:انا سألت منى قبل كده على والدها وقالتلى انه مسافر وانى لو عوزت اكلم حد اكلم حضرتك او جدها
علشان كده انا جيت لحضرتك اطلب ايد منى وارجوا انها توافق لانى مش هلاقى واحدة فى ادبها واخلاقها
ابتسمت ماجدة بفرحة وقالت:طب هى عارفة انك جاى تتقدملها؟؟
عمر:الحقيقة لأ
ماجدة:انا عن نفسى معنديش مانع بس اهم حاجة رأيها ولا ايه؟
عمر:اكيد طبعا يا طنط لازم تاخدى رايها
ماجدة وهى تقف:طب عن اذنك هدخلها اشوف رايها ايه
مقولتليش صحيح انت اسمك ايه؟؟
عمر وهو يبتسم:عمر
دخلت ماجدة الى منى فى غرفتها وكانت منى ساعتها جالسة على السرير وهى تحيط زراعيها حول ركبتيها وهى تنظر امامها بحزن شديد
جلست ماجدة بجانبها وقالت:فى واحد جه بره وعايز يتقدملك
بس شكله ابن ناس اوى
نظرت اليها منى بوجه قاطب وقالت:ومين ده بقى ان شاء الله
ماجدة:انا معرفوش بس قال ان اسمه عمر
عندما سمعت منى اسمه انتفضت بغضب وقالت بصوت عالى:
ايه اللى جابه هنا انا قولتله ميورنيش وشه تانى
ماجدة بصوت منخفض:عيب يا منى ميصحش كده ده برده ضيف عندنا
منى:اسكتى انتى يا ماما انتى مش عارفة حاجة
خرجت منى من الغرفة بغضب وماجدة تتبعها كى توقف حالة الغضب التى انتابتها
خرجت له منى وقالت:لما لقيت السكة التانية مش نافعة قولت ادخلها من سكة المأذون؟؟
ومش بعيد بعد ما تتجوزنى وتاخد اللى انت عايزه وتكون شبعت ترمينى رامية الكلاب
لكن لأ مش انا اللى يحصلها كده من واحد زيك
نظرت ماجدة الى عمر بحرج وقالت:معلش يا استاذ متزعلش منها هى بس اعصابها تعبانة اليومين دول شوية
منى بغضب:انا اعصابى حديد وعارفة انا بقول ايه كويس اوى
ياريت تتفضل تخرج من هنا ومتورنيش وشك تانى
كفاية بقى حرام عليك
تركته وذهبت الى حجرتها واغلقت الباب خلفها بعنف
اما عمر فظل واقفا ينظر بعينين حزينتين وماجدة واقفة وهى فى قمة الحرج
تحرك عمر باتجاه الباب وخرج سريعامنه
اما ماجدة فجلست وهى تشعر بالغيظ من ابنتها التى ضيعت من يدها تلك الفرصة
بعد دخول منى الى غرفتها انهارت فى البكاء الشديد فهى تحبه وتتمنى ان ترتبط به
ولكنها لا تثق به بعدما علمته عنه
استقل عمر سيارته وقادها وهو ينظر امامه بحزن شديد وبعد فترة اوقف السيارة ونزل منها
ومشى بمحازاة النيل ثم وقف ينظر اليه بألم شديد وهو يتذكر كل الاخطاء التى ارتكبها فى حياته
ابتداءأ من العلاقات التى كان يقيمها مع الفتيات والسهر فى الملاهى الليلية انتهاءا الى مافلعه بنيرمين فكم اضاع من حياته اوقاتا كان يرتكب فيها الكثير من المحرمات
ظل يسير وهو يضع يديه فى جيبه وعينيه سارحتان فيما مضى
مشى مبتعدا عن سيارته حتى وجد استراحة فجلس عليها وهو يفكر
وبينما هو يفكر ترددت فى اذنه تلك الكلمات التى انطلقت من جوال شخص يعبر الطريق
ولكنها اخترقت اذنه
" أنا العبد الذي كسب الذنوبـــا وصدته الأماني أن يتوبــــــــا

أنا العبـد الـذي أضحـى حزينـــاً على زلاته قلقاً كئيـبــــــــــا

أنا العبد الذي سطـرت علـيـــه صحائف لم يخف فيها الرقيـبــــا

أنا العبد المسيــئ عصـيـت سراً فما لي الآن لا أبدي النحيـبـــا

أنا العبد المفرط ضــاع عـمـــري فلم أرع الشبيبة والمشـيـبـــــا

أنا العبـد الغريـق بلج- بحــــــــرٍ أصيـح لربما ألقــى مجيبـــــــــا

أنا العبد السقيـم مـن الخطـايــا وقد أقبلت ألتمـــس الطبيـبــا

أنا العبد الشريد ظلمت نفسي وقد وافيت بابكـم منيـبــــــــا
لم يكن عمر يتعمد ان الانصات الى تلك الكلمات ولكنها اخترقت اذنه رغما عنه
فلمست قلبه وخفق بشدة لسماعها وكأنها ارسلت اليه لتنبهه الى حقيقة نفسه
احس انه يريد ان يبكى فقام من مكانه ورجع الى سيارته وركبها وانطلق بها

وهو فى طريقه وجد مسجدا مر به فاوقف السيارة امامه ونزل منها ووقف امام المسجد وحدثته نفسه ان يد خل اليه وكانت هذه اول مرة يدخل فيها مسجدا
خلع عمر نعليه ودخل المسجد فنظر الى ارجاء المسجد وقلبه يخفق بشدة
تقدم عمر وهو ينظر الى الشيخ الكبير ويبدوا انه امام المسجد كان يجلس جانبا وهو يقرأ فى المصحف
اقترب منه عمر وهو ينظر اليه
رفع الشيخ بصره اليه وهو يقول بصوت منخفض:صدق الله العظيم
نظر اليه عمر بعينين لامعتين وقال:السلام عليكم
رد الشيخ السلام:اتفضل يا ابنى واقف ليه
جلس عمر امامه وربع قدميه وهو مطأطئ راسه
الشيخ:فى حاجة عايز تسأل فيها؟؟
عمر وهو ينظر اليه بعيون لامعة:انا عايز اعرف حاجة واحد بس
ليه ربنا مش عايز يسامحنى مع انى توبت خلاص عن كل حاجة
الشيخ:ليه اليأس ده بس يا ابنى
اوعى تيأس من رحمة الله
عمر:بس انا عملت ذنوب كتير اوى لدرجة انى خايف ربنا ميقبلش توبتى
الشيخ:مهما بلغت ذنوبك عنان السماء برده ربنا هيغفرهالك مادمت اعلنت التوبة وندمت وقررت مترجعش لذنوب دى تانى
عمر:والله توبت وندمت وان شاء الله عمرى ماهرجعلها تانى
ابتسم الشيخ وقال:يبقى ابشر
ربنا خلاص قبل توبتك ولازم تبقى متيقن من كده وخلى عندك حسن ظن بالله
ربنا بيقول فى حديث قدسى:انا عند حسن ظن عبدى بى
تنهد عمر بارتياح ثم اخفض بصره للارض
سمع الشيخ صوت المؤذن فنظر الى عمر قائلا:قوم اتوضى وجهز نفسك للصلاة
واستعيذ بالله من الشيطان الرجيم ومنخليش اى حاجة تبعدك عن ربنا ده ربنا رؤوف رحيم
ولو لجأتله لا يمكن يتخلى عنك ابدا

هز عمر راسه وهو يبتسم ثم قام ليتوضأ
.................................................. ..................
"فى غرفة سيف"
افاق سيف اخيرا وفتح عينيه ونظر حوله وهو يتأوه بصوت هادئ من الالام التى بجسده
قامت نيرمين من مكانها واقتربت منه وهى تقول:سيف
انت صحيت يا حبيبى؟؟
نظر سيف اليها بوجه حزين وكأنه يريد ان يبكى وقال:سلمى
سلمى حصلها ايه
نيرمين:ايه حكاية سلمى معاك يا سيف كل شوية تنطق اسمها
سيف:ارجوكى يا نيرمين قوليلى سلمى حصلها حاجة؟؟
كارم عمل معاها ايه؟؟
نيرمين وهى لا تفهم شيئا:انا مش فاهمة حاجة
سيف:مين اللى جابنى هنا اكيد اللى جابنى عارف ايه اللى حصل؟؟
نيرمين:عمر هو اللى جابك هنا وهو اللى اتصل بيا علشان اجيلك
سيف:اندهيه دلوقت عايز اسأله على حاجة
نيرمين:حاضر ثانية واحدة هشوفهولك
خرجت نيرمين من الغرفة لتبحث عن عمر فابتعدت عن الغرفة بعض الشئ ربما تجده ولكنه غير موجود فرجعت ولكنها قبل ان تدخل غرفة سيف لمحت سوسن تخرج من الغرفة الاخرى فنظرت اليها بتعجب ثم نادت عليها وهى تقترب قائلة:لو سمحتى ياطنط لحظة
نظرت اليها سوسن وقالت:نيرمين!!
نيرمين:معلش يا طنط انا شوفتك امبارح بس اتلخمت ومسلمتش عليكى معلش اعذرينى
سوسن:ولا يهمك يا حبيبتى
نيرمين:معلش يا طنط ممكن اسألك سؤال
سوسن:اتفضلى
نيرمين:هو حضرتك جاية علشان سيف ولا ليكى حد تانى تعبان هنا؟؟
اصلى شايفاكى خارجة من اوضة تانية
تنهدت سوسن بحزن وقالت:كنت خارجة من عند سلمى
اصلها تعبانة شوية
نيرمين بحزن:الف بعد الشر عليها
عندها ايه؟؟
سوسن وهى تغير مجرى الكلام:انا مشوفتش سيف لحد دلوقت هو صاحى؟؟
نيرمين:آه اتفضلى حضرتك ادخليله
ده من ساعت مافاق وهو مبطلش يجيب سيرة سلمى زى مايكون قلبه حاسس انها تعبانة
سوسن بحزن:يا حبيبى
طب انا هروحله اطمن عليه
نيرمين:وانا هدخل لسلمى اطمن عليها انا كمان لانى مشوفتهاش من ساعة ما جيت
.................................................. ..........
طرقت نيرمين الباب لتدخل الى سلمى فاذنت لها سلمى دون ان تعلم انها نيرمين
عندما راتها سلمى اخفضت بصرها فى حزن شديد وظنت انها جاءت لتشمت فيها
اقتربت منها نيرمين وحضنتها دون ان تتفاعل معها سلمى وقالت بحزن:الف سلامة عليكى يا سلمى
رفعت سلمى بصرها الى نيرمين وقالت بعينين دامعتين:
جاية تشمتى فيا يا نيرمين؟؟
نيرمين بحزن:انا يا سلمى؟؟
اعوذ بالله هو فى حد بيشمت فى المرض ده ممكن ربنا يبتلينا فى اى وقت
سلمى:انا مبتكلمش على المرض انتى فاهمة قصدى كويس
نيرمين:صدقينى مش فاهمة انتى تقصدى ايه؟؟
سلمى:اقصد انك فرحانة فيا علشان اللى كنت عايزاه يحصلك من عمر حصلى
نظرت اليها نيرمين بصدمة وقالت:قصدك.....
سلمى :اخفضت سلمى بصرها وهى تبكى
احست نيرمين بألم فى قلبها عندما استشفت من سلمى انها تعرضت للاغتصاب
فقالت بصوت حزين:سلمى
انتى بتتكلمى جد؟؟
سلمى بصوت باكى:طبعا بتكلم بجد هو فيه هزار فى الحاجات دى
وبعدين انا كنت فاكراكى عارفة مفكرتش انك هتزورينى من نفسك كده لو عرفتى انى تعبانة
بس الظاهر ان ظنى مطلعش فى محله
قامت نيرمين واحتضنتها مرة اخرى ولكن هذه المرة تفاعلت معها سلمى وظلت تبكى وهى فى حضن نيرمين
ادمعت نيرمين هى الاخرى وشعرت بالالم الذى تشعر به سلمى لانها تعرضت لنفس الموقف من قبل فاخذت تهدئ من روعها وقالت:بس يا سلمى علشان خاطرى كفاية
سلمى:انا انتهيت يا نيرمين
ربنا خلص ذنبك منى
نيرمين:متقوليش كده يا سلمى انا عمرى ما اتمنيت ان يحصلك حاجة زى كده
انتى مهما كان بنت زيى واللى حصلك ده حاجة بشعة مرضهاش على نفسى
سلمى وهى تبكى:بس انا رضيتها عليكى علشان كده ربنا انتقم منى
انا مكونتش اتصور انى يحصلى كده فى يوم من الايام ومن مين من واحد اقل حاجة اقولها عنه انه حيوان
انتى متعرفيش هو عمل فيا ايه؟؟
نيرمين:خلاص بقى يا سلمى اللى حصل حصل فكرى فى اللى جاى انتى لازم تبلغى عنه ومتسكتيش عن حقك
سلمى وهى منهارة:بس انا خايفة
خايفة اوى
نيرمين :خايفة من ايه؟؟
سلمى:انتى متعرفيش الراجل ده ممكن يعمل فيا ايه؟؟
مش بعيد يلبسنى مصيبة ولا يتبلى عليا ويقول انى عملت معاه حاجة بمزاجى
نيرمين:ليه هى البلد سايبة؟؟
البلد فيها قانون وبعدين اكيد هيعوفوا انها جريمة اغتصاب من آثار العنف اللى ظاهرة عليكى
سلمى:ممكن يجيب شهود يثبتوا انى كنت عنده بالليل وانى كنت فى الدور اللى فيه اوضة النوم
والمحامى واللى اسمه فؤاد ممكن يشهدوا عليا
وهو اعتدى عليا فى اوضة نومه يعنى صعب اثبت انها جريمة اصلا
لانهم هيقولوا انتى ازاى دخلتى اوضته ومافيش اى تكسير ولا آثار عنف خارج الاوضة
علشان يقولوا انه دخلنى غصب عنى
نيرمين:طب انتى ازاى دخلتى الاوضة غصب عنك انتى محاولتيش تقاومى ولا ايه؟؟
سلمى:حاولت ايه هو انا لحقت انا اتفاجئت بيه من ورايا شالنى وفى ثانية واحدة لقيتنى فى اوضته معرفش ازاى
نيرمين:برضه متسبيش حقك والا هتسيبى المجرم ده يفلت بعملته وساعتها ممكن يكرر اللى عمله ده فى بنات غيرك ولا ايه؟؟
تنهدت سلمى بحزن وهى تفكر فى كلامها
..........................................
اسقط سيف بصره بحزن شديد عندما علم من عمته ان سلمى تعرضت للاغتصاب من كارم
وانه فشل فى انقاذها ما كان يؤلمه انه وقف عاجزا عن مساعدتها فى الاسفل وكانت تنادى عليه
ولكنه لم يستطع ان يفعل لها شئ ،احس بالذنب بالرغم من انه لم يكن له يد فيما حدث لها
نظرت اليه عمته وهى تبكى وقالت:سلمى ضاعت يا سيف
محدش هيقبل يتجوزها بعد اللى حصل
انا عارفة يا حبيبى انك حاولت تساعدها لكن مقدرتش تعملها حاجة لانك كنت لوحدك
ظل سيف مخفض بصره للاسفل بحزن وهو يتذكر تلك اللحظة التى وقفت تنادى عليه من النافذة لكى ينقذها وكارم يحاول الاعتداء عليها ووقف عاجزا عن الدفاع عنها
كم كانت صعبة عليه تلك اللحظة

.................................................. ...
بعد خروج نيرمين من عند سلمى

رن تلفون سلمى فنظرت به فوجدته رقما غريبا،فتحت وهى لا تعلم من المتصل
قالت بصوت مرهق وضعيف:الو!!
كان المتصل كارم علمته من تلك الجملة
كارم:ازيك يا مزة
ايه اخبارك؟؟
عندما سمعت صوته ارتجف بدنها واحست بقشعريرة تجرى فى جسدها وعجز لسانها عن الكلام
كارم:مبترديش ليه يا قطة
انا بتصل بس علشان اطمن عليكى بعد اللى حصل
انا عارف انى كنت عنيف معاكى حبتين بس انتى السبب
لو انتى كنتى خدتى الامور ببساطة كنتى زمانك دلوقتى بتحلفى بالليلة دى
شعرت سلمى بالغضب الشديد وقالت بصوت غاضب وكانت ترتجف:انت لا يمكن تكون بنى آدم انت حيوان
انا هوديك فى ستين داهية متفكرش اللى حصل ده هيعدى بسهولة
انت متعرفش انا ابقى......
كارم مقاطعا بسأم:سلمى رفعت
من عيلة نصار
طظ
تفاجأت سلمى برده المستفز
كارم:بقولك ايه يا ماما فوقى كده واعرفى انتى بتكلمى مين اذا كنتى انتى سلمى رفعت فانا كارم حسين ومش واحدة زيك اللى تهدد كارم حسين
ولعلمك بقى انا لو عايز اجيبك عندى تانى واعمل معاكى اللى عملته تانى فانا اقدر اجيبك عندى وبمزاجك كمان
سلمى بانهيار:انت اكيد اتجننت
اوعى تكون فاكر انى هسكت على اللى عملته ده انا هبلغ عنك البوليس
كارم:ياريت تبلغى البوليس
علشان تبقى انتى اللى جنيتى على نفسك،انتى عارفة كويس انى اقدر اثبت انك جتيلى بمزاجك واقدر اجيب بدل الشاهد مية
وانا مش هغلب علشان اطلع منها وبعدها ادبسك انتى فى قضية اسخم منها زى اللى عملتيه مع سيف ولا نسيتى يا شاطرة
سلمى:كنت متأكدة انك سافل وحقير وواطى
كارم بضحة مستفزة:هههههههههههههههه فعلا
انا سافل وحقير وواطى بس ده ميمنعش انك دخلتى دماغى اوى
وكان نفسى الليلة اللى قضيتها معاكى تطول بس للاسف جه ابن عمك بوظ علينا كل حاجة
بس ملحوقة
تتعوض المرة الجاية
سلمى وهى فى منتهى الغضب:انت حيوان لا يمكن تكون بنى آدم
انا عندى اموت ولا انك تلمسنى تانى
لانى بشمئز من كل حاجة فيك معونتش بطيق اسمع سيرتك
ولو اتصلت بيا تانى انا هوديك فى ستين داهية
انت فاهم؟؟
اغلقت فى وجهه وهى تبكى بغضب وقالت:ربنا ينتقم منك
اعمل ايه بس ياربى
اخلص من الراجل ده ازاى
اما كارم فبعد ان اغلقت فى وجهه نظر امامه بغضب وقال:ماشى يا جميلة الجميلات
صبرك عليا
ان ما كنت اخليكى تيجى لغاية عندى تبوسى رجلى وتنفذى كل اللى انا عايزه مبقاش انا كارم
ضغط على الجرس فاتت السكرتيرة وطلب منها ان ترسل اليه فؤاد
...............................................
كان عمر فى طريقه الى المستشفى فجاءه اتصال من خالد
فتح عليه بسرعة قائلا:ايوة يا خالد فى حاجة حصلت؟؟
خالد:مالك قلقت كده ليه
عمر:انا مش قلقان ولا حاجة
خالد:انا زعلان منك يا عمر
عمر:ليه بس يا خالد؟
خالد:لانك عرفت مكان سيف ومتصلتش بيا زى ما اتفقنا
عمر وهو مرتبك:وعرفت منين انى اعرف مكانه؟
خالد:سيف اتعرض للضرب واتنقل للمستشفى فاكيد كان لازم يتعمل محضر
وحضرتك اللى وصلته للمستشفى مش كده؟
تنهد عمر بضيق بعدما علم ان سيف سيعود الى السجن بعد ان تتحسن حالته فقال:
ارجوك يا خالد حاول متقبضش عليه واديله فرصة يسلم نفسه
خالد:انت بتهزر يا عمر؟؟
هو انا بمشى كده بمزاجى ده واجب عليا ولازم أأديه مش كل حاجة ينفع ندخل فيها العواطف
تنهد عمر بضيق وقال:طب وناويين تر جعوه السجن امتى
خالد:اللى انت متعرفوش بقى ان فى حاجة جديدة حصلت وانا متأكد انها هتفرحكوا جدا
انا دلوقتى رايح لسيف فى المستشفى علشان ابلغه بالخبر ده؟؟
عمر:خبر ايه فرحنى
خالد:لا دى بقى مفاجأة علشان تعرفوا بس انى مش ساكت وفضلت ادور وابحث لحد ما وصلت لقرار الموضوع
عمر:ارجوك يا خالد انا بجد هموت واعرف انت وصلت لايه؟؟
خالد:لما اقابلك فى المستشفى هبقى اقولك
عمر:اوك
انا فى طريقى ليها دلوقت
خالد:اوك نتقابل هناك