ادم : لسانك طوال مروماركيتيش
رنيم : وعلاش واش قلت
ادم : ما قلتي وااو
خرج و خلاها قريب وجهها ما طرطق
رنيم : عبد الرحيم يا عمري شفت عمك كيفاش كان يهدر
بدات تتبسم وحدها و تمروح على وجهها شوية هكذا دخلت رباب عندها
رباب : اههه يا ربي وليدي مسكين رقد .... يعطيك الصحة رنيم
رنيم : بلا مزية
رباب : روحي تتعشاي رنيم انا تعشيت دوك نقعد معا عبد الرحيم
رنيم : ايه
خرجت رنيم لقات الغاشي نقص
فاطمة : رنيم بنتي روحي تتعشاي البنات كامل راحو للشمبرة
رنيم : دوك نروح و نتي تعشيتي
فاطمة : ايه تعشيت بكري باش نشرب دوايا
رنيم : مليح
راحت رنيم للشمبرة لقات كامل لبنات قاعدين يتعشاو قعدت قدام ريحاب
ريحاب : واش صرالك باش راكي تضحكي هكذا
رنيم : منبعد نحكيلك
ريحاب : ههه باينة داخل فيها حبيب الروح
وسام : ضحكوني معاكم
ريحاب : مكاين والو و خفي كملي بارسكو دوك يجي خويا يدينا
وسام : اففف
كملوا تعشاو منبعد خو ريحاب عيطلها قاللها راني وصلت
رنيم : راكي رايحة
ريحاب : ايه
وسام : رنيم نهبط ندي كابة تاعي ياك طاطا حياة راهي لتحت
رنيم : نورمالمون ايه
وسام : مالا باي باي ، ريحاب انا نهبط ديراكت
ريحاب : ايه
......
ريحاب : ايه قوليلي واش صرا
......
وسام رفدت كابتها سلمت عليهم و هبطت تلقات بغيث طالع وقت كانت هابطة ؛ تبسمت معاه و كملت تمشي
غيث : وسام
دارت
وسام ؛ اههه
غيث : راكي رايحة
وسام : ايه
غيث : احمم ... نقدر ندي نيميرو تاعك
وسام : وعلاش
تكا على الحيط و تبسم
غيث : هكذا ولا منقدروش
وسام : سما مغلطتش كي قلت عليك خلاط
غيث : اههه حرام عليك
وسام : هههه
غيث : واش قلتي
وسام : لالا منمدش متنساش راك بمدامتك عيب لي راك ديرو
غيث : هكذا
وسام : هكذا
هبطت وسام حست قلبها وجعها
وسام : واش خسر يعني لوكان مكانش مع ميرا هاذيك
لقات خو ريحاب يستنى
**** : هذاوين
وسام : حابنا نطيرو
**** : ايا بلعي لسانك هذا كاش خطرة نقطعو وين راهي ريحاب
وسام : راهي هابطة
.....
ريحاب : يا رنيم زعما تكونوا تحسوا بنفس الحاجة ياييي
رنيم ( تبسمت ) : معلباليش مرانيش حابة نتامل بزاف خايفة
ريحاب : فيها خير ان شاء الله شفتي حاحة صغيرة من عند لي تحبيه شحال تقدر تفرحك
رنيم : اممم
ريحاب : انا نهبط خويا ليوم يقتلني
رنيم : ايا باي تصبحي بخير
ريحاب : و نتي بخير
خرجت ريحاب و رنيم هبطت لدارهم بدلت لبست بيجامتها و حطت خيمار على راسها و رجعت وقتها الغاشي كان راح قعدو غير ناس الدار ؛ يقين هبة و رنيم تعاونوا كملوا فرزوا الحالة منبعد دخلوا للصالون وين لقاوهم كامل قاعدين حتى من دار رنيم و صحاب ادم قعد منهم غير سيف و هبة لي كانت بايتة عندهم و فاطمة وجدتلهم سهرة قاطو بكل نوع التاي المكسرات الشكولا الفاكهة ؛ شدو البنات بلاصتهم قدام بعضهم
رحمة : رنيم راحو صحاباتك
رنيم : ايه طاطا راحو مقبيل
فاطمة : يعطيكم الصحة عاونتوني
رنيم : بلا مزية ماني
رحمة : نخلفوهالك في فرحك ان شاء الله
حياة : ان شاء الله
مروان : رباب عبد الرحيم وين راهو
رباب : راهو راقد مروان للمرة عشرين و انا نقولك راهو راقد
مروان : اييه روحي شوفيه بلاك ينوض بلاك يبكي
رباب : مروان الطفل راهو راقد واش نديرلو
فاطمة : وشبيك مصبح و نتا تشطح كيما الزربوط هبلت المراة غير نتا واقيل جبت الدراري
مروان : هاذوك ولاد الناس ماني بصح انا راني نهدر على وليدي يا سبحان الله
منصف : وعلاش راكم تخلطولي فوليدي خليوه
رحمة : ايه يما وليدو من حقو
رباب : لالا عندها الحق هبلي ماما مصبح و هو يسقسي عليه و يعلم فيا كيفاش نتعامل معاه
مروان : بلعي فمك
رباب : مانييي شوفي كيفاش راه يهدر معايا
فاطمة : مروان حبس ما تتبلى فبنتي
ضحك منصف و قاللهم
منصف : ربي يخليكم دايمن هكذا
شد يدين ادم و مروان لي كانوا قدامه
منصف : نوصيكم على يماكم و على على نوارتي و نور عينيا يقين بلاكو عليهم و حطوهم فعينيكم و قعدو شادين فبعضكم و نتا مروان بلاك يجي نهار و تزعف رباب منك مهما كانت كاينة مشاكل بينكم حلوها بلعقل و متنساوش بلي عندكم وليدكم دوكا كبروه على الطاعة و الدين و ربوه تربية حسنة
فاطمة : بوووه زعلاش راك تهدر هكذا تقول راك تودع
رحمة : بعيد الشر
منصف : خلوني راني نهدر معا ولادي ؛ فهمتني مروان
مروان : ايه بابا
منصف : و نتا يا مسيو وقتاش يهديك ربي و دير دارك ياك ما عندو ما خصك
ادم : ولينا لنفس الحكاية
رحمة : يا وليدي راك ف 30 واش حاب تزيد حتى تولي شيخ
ادم : راني مليح هكذا
فاطمة : خلوه يدبر راسه حسبتلو راح ندومولوه
ادم : قادر على شقايا فطومة
فاطمة : ايه ايه