#كحل_عرب
( احضان باردة )
(((بقلم زينب ماجد )))
الحلقة_٢٩
(دوسة شرف )
وصوابك .. يجرح الآخ .. كل آخ
التلجمه يزود
لـ عريان السيد خلف || 🖤
هدوة : اعلى صوت انياحنا الوادم التمت
ومشت ذيج الحنينة ال يو طبيت صاحت هلا من ابعيد
وبسمتها بثغرها تلالي حنية وفرحة عيونها يحضنني كبل اديها.
مشت الجانت تحس كبل لا افج حلكي واحج ..
مشت الناصحة والتعلمني الصبر شلون اجرعنه
مشت ام لمة الحلوة التلمنا بجايها وهيلها .
مشت ام الجلمة الطيبة
مشت ام المحنة
مشت ريحة الجنة
مشت وطاحت الخيمة اعلى اهلها.
ماتت موته طيبة واهي مدفاية بين اهلها وناسها وبكل كوة عكلها ... ماتت وما وراها دين ..
ماتت وهي مظلومة موش ظالمة
معيولة موش عايلة
ومسلمة العايل عليها بيد ابو فاضل ياخذ حكها .
كاضتها واصرخ بكل حسي
وعلي ابني يبجي ويصرخ اعلى راسها
طبت ايمان والبنيات ومؤيد .. كلهم كاموا يبجون ويصرخون على موتتها .
وصل الخبر للبيت
جانت نوسة والولد بالبيت
بس سرحان غاد ابيته الاول ..
مؤيد راح دك الباب عليهم .. مروان جان سهران ما نايم فاز بسرعة طالع للباب من اندك دكة قوية بهالفجر .
نزل مروان و نوسة طلعت من غرفتها : خير يا ستار ياهو الجاي يدك الباب هجي ؟
سجاد : منو يمه
نوسة : اسم الله بس لا حبوبتي اجا علمها
نزلت ورا مروان اركض .. طلع مأمون من الغرفة : شكو يمعودين
فتح الباب مؤيد يبجي ويكلهم : الحجية ماااااااتت
مروان : لاااااااا
نوسة : يممممممممه حبوبتي ، يمممممممه
مامون : انا لله وانا اليه راجعون
انتجى مأمون يبجي .. ومروان كعد كمبص دنك راسه وكام يبجي ومؤيد منتجي ع الباب يبجي وسجاد واكف يباوعلهم ... اندار لكى امه جرت عباية وطلعت تركض
كام مامون وكال : بدلوا بسرعة .. خل نمشي
طبوا بسرعة بدلوامامون لبس دشداشة سودة ومروان قميص وبنطرون سود وتراكضوا على بيت حاكم .. لكوا علي يجر بأمه وحاضنها ويبجي .
طاحو عليها مأمون ومروان حضنوها وكاموا يبجون وهي تصيح : مشت الحنينة يممممممه ولكم كضينو يا هلييييييي ، كلكم مشيتو وهديتوني يمممممه .
فزعت الجيران والناس
ومامون كام منها وجرت تليفونه دك على ابوه .. بسرعة جاوب سرحان : ها بوية سلامات خير
- الحجية ماتت
-لااااااااااااا انا لله وانا اليه راجعون .. ما يظل الا الوجه الكريم ... جايكم .
خلال نص ساعة الدنيا كلها التمت ابيت حاكم
نسوان المنطقة حبايبها معارفها معاميلها كلها اجت تتبارى الذمة وياها وتنوح اعلى موتها .
جابوا سيارة وتابوت وشالوها من البيت ..
هدوة انتهت على شيلتها كامت تكض بذيال التابوت واطيح وعلي ومروان يشيلون بيها ونسة تحط العباية اعلى راسها .
تقرب منها سرحان حط عباتها اعلى راسها ووكف يبجي اعلى راسها ويقوي بيها .. صعدها بسيارته وصعدت نوسة وعلي وياها ..
مروان صعد بسيارة التابوت هو ومؤيد
ومامون لحكهم بسيارته .. ودوها لمستشفى الجوادر
سرحان اطى خبر للسماوة غاد اهلهم ان الحجية كواغد ال شمخي انتقلت الى رحمة الله .. جانو اخوتها ولاة وعبداللة جايين بالدرب طالعين غبشة حتى يشوفونها ، بالدرب دروا بعلم موتها .. كايمة لالة تثغب وتبجي وعبدالله يصرخ
خابروا على مؤيد كال الهم : احنا بعدنا بالمستشفى منتظرين ينطونا شهادة الوفاة حتى نطلع بيها للبيت ومناك نتوجه للنجف .
جبار : يعني نجيكم للمستشفى لو شنهي ؟
- لا هسه راح نطلع احنا ، اطلعوا كدامنا للبيت .
شوية وسلموا شهادة الوفاة وطلعوا الحجية من المستشفى وردوها للبيت .. الفرع مكلوب كلاب كله يترحملها .. فاتت سيارة جنازتها ووصلوها للبيت ونزلوها للكراج .
صرخ عبداله وحضن تابوتها : ليش ما تانيتيني جدة ، ليش استعجليتي لييييش .
الناس فتحوا المجال لهدوة وعلي ونوسة وبنات ستار و ابنه ... واخوتها على راس التابوت يثغبون حفوا تابوتها من كل مكان والصريخ يصدح بهالبيت من حبايبها .
وكفت لالة تلاجي هدوة وتلطم وياها وتصيح : فلت وانتهت وياج واليمة كضيناها .
كامت هدوة تلطم على راسها وتصيح : كضت اليمة وياااااها راحت الحبيبة ولج دييييييييييية
لا يمه لا مالي حيل فراكج .. لا يمه لا .
لاجنها حبايبها من الفرع ولطمن اعلى جنازتها ...
صاح سرحان : بسكم النسوان بعد ما يحملن .. شيلوا الجنازة ياله .
كامن يتصارخن بنات ستار : حبوبة وين نروح بعدج حبوووبة ، لا تعوفينااااا جدة والله نضيع بعدج ، ردي فدوة جدة .
حضنهن اخوهن عبدالله وكام يبجي ..
وهدوة فقدت بشيلة اجنازة امها وعلي حاضنها لصدره ويجر بيها ودموعه يجرن ويا امه .
صعدوا الجنازة على السيارة وصعد مروان و مؤيد يشدونها حيل على السيارة ويلفون الجنازة بعباية .. ومامون على السيارة التصعد الناس التروح للدفنة .. صعد كم زلمة ليجدام والباقي صعد حبايبها ، وسرحان يتفق ويا السواق وواكف ويا الزلم .
تحركت السيارات وشيعوها ...
لا اله الا الله .. محمد رسول الله
والدموع واهلية حزن بكفاها .. والناس تباريها الذمم وكل واحد يتمتم ( مبرية الذمة يم ستار )
وصلوها للشارع العام وكفت الناس ..
وطلعوا بيها احبابها للنجف ...
حطوها بالمغيسل .. وغسلنها هدوة ولالة طبن وياها .
غلسلوها وكفنوها وطلعوا بيها للمكبرة .. جان الكبر جاهز ومفتوح .. موصي عليه سرحان كبل لا يوصل .. عد ما وصلوا نزلوها لمثواها الأخير ... وانتهت قصة كواغد وانكسر عود كحل العرب .
بالبيت ..
مامون جان موجود ما راح للدفنة ..
ظل مسؤل .. نصب الفاتحة ووكف هو واخوها يتلكون المعزين وصوت المسجل يصدح بصوت عبد الباسط عبد الصمد ..وهو يرتل الايات القرأنية .
وكف ياسر كلالة : مأمون انت تمون على اهل البيت طب خلي وحدة منهن تكتبلنا قائمة الاحتياجات حتى نشتريها ..
طب للمطبخ لكاهن هوسة حيدر كض رجليه فرحان بطبة ابوه مسح على راسه وهو يباوعلهن : خوية اكتبللنا شنو التحتاجنه ... استكاين خواشيك فراشات .. ياسر راح يطلع يتسوك
وكفتله نهاد ونانة كتبن كلشي ..
اخذ القائمة وطلع شاهين طب .. تضايق من شاف مامون .. وكف صاح نانة .. باوعتله
طلعت : ها
- طبي جوا لا توكفين بالمطبخ
- شلون ما اوكف غير فاتحة
- اي خواتج واكفات وجودج ماله داعي .
- اكول شاهين روح هناك فدوة وبعدين نحجي بهالسوالف هاي
- دا اكلج طبي
- جاي اساعاد خواتي متشوف الناس جوكات جوكات دا تجي
- اي طبي خدمي جوا .
- اهوووو
عفته ودخلت جوا .
كمت اخدم جوا اوزع كلينكس .. اشيل صواني الجاي اوزع .. اوكف خاف النسوان يحتاجن شي وبنفس الوكت امنت البيت كانتير قفلتهن .. غرفة الحجية وحاجياتها قفلت البوفية عليهن .
صار العشا .. وكفت برا اخذ من اديهم .. واطب انطي للنسوان البدوانية .. مامون جان واكف ويصيح : ٨٠ ماعون جوا
ونهاد تكله : خليهن ١٠٠ ماعون
واكفة اباوعلهم ومتخصرة بتعب منتظرة المواعين الباقية حتى نعشي الناس .. جان يوكف شاهين ويزمخ : طبي جواااااا
باوعتله مستغربة : شبيه هاذ ؟
صاح : مو احاجييييج
نهاد.: شبيك خوية منا الوادم لا تصيح
- وبعدها واكفة
- اي غير جاي توزع
- لا خل اطب
اندارت عليه عاقدة حواجبها : طبي حبيبتي خل نشوف حجته شنو .
طبيت جوا للمطبخ كعدت .. الاء وزعت البيت كله واني كعدت خليت حيدوري بحضني جابت ماعون وخلته كبالي .. اجتي نرجس كابلتني ..
طب مأمون : بعد خوية شناقصكم
نهاد : خوية العشا بطرك ماعون اللحم والتمن والببسي .. لا فواكه لا خضرة لا لبن لا بقلاوة
مامون : اليوم اول يوم باجر نتممها ونزيدها بالثالث .. ماكو نقص بعد .
الاء : لا خلصت كلهن كاعدات ياكلن .
مامون : الزلم خلصوا والولد جاي يوزعون الجاي
حجاها وباوع ليجوا كاعدة ودا اودكل بحيدوري ونرجس ، كمبص يمي واخذ الخبزة من كدامي .. طلعت الاء ماعون ثاني وحطته كباله : تعشى خوية
- لا مستعجل اريد اروح
- تعشى وكوم
ظل مدنك ياكل بيده ويحط بحلك حيدوري وهو بحضني .. وكف شاهين كال : كومي نانة .. تعاي
نهاد : هم طالعة برا جاي تتعشى
- لا خل تكوم
اندارله مأمون : هاي شبيك
- كومي جاي اكلج
نانة: ترا بزعتني عينك تراقبني وكلساع كومي وكومي طبيي روحي ، شوفلك شغلة غيري .
مامون كض ايدها وندسها وهو يكللها : نااااانة .. بهدوة .. ناس منا عيب
- طلع روحي وين اروح يعني هاي كاعدة ودا اوكل بالجاهل .
شاهين : كومي بسرعة
درت وجهي منه .. كال : بسيطة
نهاد : هاي عود النكول عليهم سبورتية وعدهم حرية هاي بعدج عدنا وسكمج سكم جا من تروحين عده شلون .. يعدمج عيشتج .
كام مامون من المكان وطلع برا كلت الها : يتخبل من المكان البية مامون ، لازم مامون ما يحاجينا ولا يخالطنا ولا يوصلني ابد .
الاء : خب اني طالعة روحي من الزلم والله اطلع انوم هالماعون براسه .. والله ... هم العكروك اله ضروك .
نهاد.: جج فلشج .. دسكتي يمعودة لا تبلينا
الاء : امداج يوم القررتي تتزوجين ولج ظلي بلا زلمة وعلي ما تحصلين منهم غير شلة الحال ، عوفي
نهاد : يااااا جا انت اشيشينها لو تهدينها شبيج
الاء: لا والله اشيشها .. ديري بالج تخلين زلمه يسكمج لو يتمرجل عليج ، ولج سوكي ولا تخلينه يسوكج يرضى يرضى ما يرضى ضربي بالف نعال وعيشي .. ايييع
نانة : باوع النصايح الزينة التعمر حياتي باوعي .. شكد بزعانة من علاء لعد
الاء : مو بس بزعانة وطاكة روحي همات
نهاد : ولجن بسجن جا هسه وكتها .. تلام المرحومة من تصيح برابيج وعلي ما تنلام .
كمت من المواعين غسلت حدوري وطلع وكمنا نلم المواعين من النسوان وننظف البيت ..
طشت الناس ظلوا بس الجايين من مكان بعيد
جاي ماي .. جيب ودي ظالين
لحد ما ب١٠ بالليل طب مامون كال : وصلوا المدينة .. اجو الدفانة
انطينا خبر للبيت الكل وكف يتلكاهم ..
امي ولالة .. ونسوان كرايبنا .. واحنا وكفنا بالحوش نبجي وننتظر جية الدفنة .
اجت هدوة
والدفانة كلهم من الدفنة
وكفنه نلاكيهم .. طب علي وعبدالله يتباجون برا ومروان يصيح : نااااانة .. تعاي بس تعاي
عفتهم ولحكت مروان : مي حار جيبيلي وياه طشت رجلي موتني .. بسرعة
ركضت حطيت كتلي مي ع النار حميته وطبيت هو كاعد بغرفة الحجية ، ونجوى حاضنة فراشها وتبجي وعلي كعد تعبان .. حطيتله الطشت مدد رجلي ويكلي : فركيهن عليج العباس .
جروا هدوا فزلها علي يعاونها صايرة تراب جرت ريحانة فراش وفرشته الها .. نوموها وهي تصيح : مشو عني كلهم وهدوني .. كضوا اهلي وخلوني وحيدة .
كعدت نوسة و ريحانة يمها يفركلها ..
علي حجه : نانة اكل ماكو ميت من الجوع
نهاد : ضميت الكم عشاكم .. هسه نحمي ونحطه كله .
ظليت اني مدنكة لمروان .. طب سرحان يصيح : ها بوية كواجن الله
انداريناله : هلا
ظل واكف يباوع لهدوة ، لف خاجيته حدر ذراعه وكعد عد راسه : هدوة ما يصير هجي تعملين بحالج .. يواشج بروحج .. كضيتي .
مروان : خليها بويه ترتاح
سرحان : شترتاح عاين حالها ، اتنوعلها من اجت ليجاي ما خذتلها نفس ولا ارتاحت .. جا مو هيج .
وكف مامون : البقاء في حياتكم
انداروله : حياتك الباقية
مامون : مروان علي عبدالله كوما ابيتنا ارتاحو خلوا البيت هنا للنسوان يرتاحن جايات من دفنة .. كوموا خوية .
ظل مروان كاعد لحد ما برد الماي طلع
احنا طفينا البيت ونمنا .. بس صوت هدوة ما خفت .. تنوح الليل كله على امها وتكللها : امس يمه هنا واباريج .. دفنتج بدي يمه ورديت .. من عمت عيني كون الله لا خلاني بعدج يالحبيبة شيجرع الدنيا خلافج ..
امس هنا تحاجيني وبوعيج وتسولفين وياي
.. حتى انت يا يمه هديتيني ..
انوح اعليج
اعلى ابوي اعلى ابو يو اعلى جمارة
يو اعلى بطيطة وابنها ..كضيتوا ييمه وهديتوني .
ساعة نبجي على صوتها وساعة نغفى .
ابيت سرحان .. .
وسن : ردت اروح عكب ما اجت الدفنه بس عمي كلالي اكضي الفاتحة وروحي ، ظلي عدنا ، ردت اباتن يم عمتي هدوة بس البيت ما كفى الوادم هواي اجينا اني ونوسة هنا .
نمت للفجر كعدت ..
نوسة جانت كلش تعبانة وجاية من الدفنة
غسلت وجهي ولفيت حجابي ونزلت عمي كاعد .. كالي : اسلكي طبقتين البيض هاي على ما يجيب مروان الاجبان والمربى والصمون .
وكفت اسلك بالبيض بالمطبخ ..
طب مروان بيده الغراض : صباح الخير ، شنو بايته عدنا
- صباح النور ، اي من البارحة
- ولا ادري ، شلونج
- زينة
- الجاي صاير
- اي جاي يفور اصبلك
- اي والله
مد ايده للجدر مال البيض اخذله اثنينهن كشرهن وحطهن بصمونه واني صبيتله جاي حجه : ليش لهسه ما اطلكتي .
- اول شي بالمحكمة ما يصير الا تعدي سنتين هجرة يلا يحقلي ارفع تفريق .. غيرها وين الكاه واطالبنه .. ودزلي رسالة يهددني لو حاولت ياخذ ابني مني .
-هذا ما شايف عين حمرة ، اكضي الفاتحة واندارله
- ما اريد اندك بيه اخافن لا ياخذ ابني مني واظلن .
- وتظلين معلكة هيج
- ما ضارني بشي عايشة ونعمة من الله .
- بس اني ضارني
- مروان الوكت مو وكته
- ادري بس تعبت .. رايد ارجع شملنا ونلم جهالنا ونرجع وكل واحد بينا يتعض من اغلاطه .
- خل اصعد اشوف ابني يمكن كعد
- احاجيج .. انت راضية ترديلي لو لا
- ووضعي هذا
- انت كولي اي واني ادوره من جوا الكاع واخليه يطلك .
- وابني
- ابنج يربى عندج اني ما احرمج منا
- ولو طالب بيه ؟
- قانونيا تحقينه مو هو محامي وقانوني
- اي
- اي هاهيه لعد .. يعني موافقة اجبره يجي يطلكه
- اذا ما ياخذ ابني ياريت اليوم كبل باجر اطلك منه .
- انخلص الفاتحة ونندارله .
طب سرحان : كضيتيهن بتي يلا الولد كعدوا .. مروان اخذ السفرة للدوانية .
نصبنا سفرة الريوك والولد كلها التمت تتريك
كضيت الشغل وكعدت نوسة كلت الها خل نروح بعد هناك يم عمتي .. كامت لفت حجابها ورحنا لبيت عمي حاكم .
طبينا علاء واكف هو وشاهين جاي يسولفون .. اندار شاهين لنوسة وكاللها : صيحي نانة اذا تكدرين .
طبت جوا كالت الها : شاهين يريدج
- عوفي
ظلت تشتغل واليوم كله تجاهلته ..
لحد ما شكى لعمته كاللها اليوم كله اخابرها احاجيها اصيح ما تردلي ، فوك سواياتها هي التزعل .
اجت ايمان صاحت على نانة : شبيج انت وشاهين
- ماما يصيح عليه مثل الطفل كدام الناس ، من يشوف بشر واكفين يحب يصيح عليه ويفرض نفسه ، وبالتليفون ردي ووردي ويتوسل .. لعب روحي خل يطير .
- ميخالف ماما ليني وياه وشوفي شيريد .. مو حلو الزعل .
بقيت متجاهلته
هو تخبل شلون ما ارد عليه .. يمكن فوك ال١٠٠ مكالمة خابر .. كرهت روحي ، يعني مرة مرتين ما رديت كول ما ترد وفك .. من يلطش اكره روحي .
اجت مروة وامها للفاتحة ..
دخلن بالاستقبال .. اني بالمطبخ كاعدة والكط الخضرة ويا بنات ستار .. طبت هي لابسه جبة سودة والحجاب لفة خليجية كذلتها طالعة منه .
- اساعدكم بشي حبيباتي
باوعتلها نهاد : لا خية مشكورة
مروة : لازم معرفتيني
- لا والله ولا زغرا
- اني خطيبة مامون
نهاد : ياااا كل الهلا بيج احبيبة .
كعدت يم نانة : اساعدج
- شكرا
- شلونج انت وشاهين
- مو احسن من وضعكم انت ومأمون
- احنا وضعنا تمام شمحلانا
- الله يسعدكم
- لازم انت وشاهين ما متراهمين
عفت البيدي وكمت منها ..
مو بيدي من اشوفها اتفركس منها انرعص .. تلعب روحي من تنعوصها وتميعها .
جاي اطلع ليبرا .. طبت ميادة وامها جايات للفاتحة تخصرتلها : والج عين تجين لهنا ؟
مسوية روحها تبجي والعيون عشرة عشرة .. تعدتني وامها طبت تلاجي وتصيح : حبايبنا مشن والباب سدننننننه .
كامت هدوة وكالت الهن : الا الجن ملكى والجن مجان بفاتحتها اخذي بنج واطلعي من الفاتحة ، كل الصار بامي من حدر راسها .. وامي سلمتها بيد العباس ابو فاضل الياخذ حوبتها منها .. تتلكاها وما يضيع حكها .. اطلعن
كامت بيهن وطردتهن من الفاتحة وظلت تحجي للنسوان على عمايلها بالحجية .
يومين والثالث .. والفاتحة كايمة وناس رايحة وناس جاية .. لحد ما خلصوا كلش .. ونزلوا الجادر
طلعت نانة تغسل الجدورة ويا خواتها
جراها شاهين وطب جوا : شنو عناد هو لو يباس راس .
- شوف شاهين ااذا ما تبطل اسلوبك وياي كدام الناس ... وغيرتك من مامون ابد لا تفكر توصلني ، وعوف ايدي هسه
- يعني تريدين تقنعيني انت ما عندج شي ويا مأمون
- شعندي ، انت شدا تحجي تشك بيه عوفني ممجبور بيه
- عيونج فاضحتج واني ادري بكلشي بس ساكت وصابر عليج
- ياريت لو ما تصبر ، طلع العندك وشوفني شتسوي
- اكسر راسج والله ترا انت مرتي
- اكلك خاف مصدك روحك انت ، شو عوف ايدي
- مامون ما اريد يطخ السانج بالسانه ابد ولا تحجين .
- البيني وبين مامون جهال اختي تفهم هالشي تفهمه متفهمه مشكلتك
- ما افهم وغصبا ما عليج .. ما تنحكين بمامون
- كلمة الغصبا ما عليج ما تعيدها وياي ولو عدتها .. كل واحد بينا بطريق
- لا عاجبج مامون رايدة ترجعيله
- ترا خطبني كبلك وما رضيت بيه .. يعني لازم تفهم اني ما عندي شي وياه يا بشر كافي عاد بزعتني .
- هالشي ما افهمه .. الاكلج بيه تسوينه وبس بدون نقاش .
- دطيني ايدي شو
- عرسنا ورا الاربعين لا تعتقدين ناجله اكثر .
- احجيلك وياها .
عفته ومشيت
رد يشكي لامي مني ..
وامي تجي تكلي سايري و على كيفج وياه ..
طلعت روحي صدك .
من بعد اافاتحة بيومين
داومت نانة بكليتها
ورجعت لامتحاناتها .. بس الجو بينها وبين شاهين ابد مو صافي .. غيرته من مأمون يوم عن يوم تزيد .. رغم مامون فهم غيرة شاهين وكام يتجنب نانة بشكل حتى ما يسبب مشكلة بيناتهم .. رجعت غيرته من جهالة يلح ان شوية شوية تبتعد من جهاله حتى اذا تزوجت تعوفهم .. وترد المشاكل تشتعل بيناتهم على هالموضوع .
من بعد ايام من الفاتحة ..
مروان كلف جماعة يدورون كاظم
فترة ودلوه مكانه .. وداهم عليه هددوه خلال هالأسبوع لو اطلك بت الشيخ لو نكتلك .
كاللهم : هالاسبوع اطلكها .. بس عوفوني
عافوه ورجعوا ودا خبر على جبيرهم كاله : الشيخ سرحان ودا عليه ناس مجرمين يهددوني لو اطلك مرتي لو يكتلني .. ما كافي بعد بيني وبينها .. هنوب وصلت بيهم للقتل يهددون بيه .
خابر جبيرهم على الشيخ سرحان
سرحان ما جان عنده كل علم !
كاله : حرام بالحرم وروح ابوي سمعت منك .. لا الي غرض بهالسالفة ولا مودي ناس تهدد ، كل لكويظم يكض روحه عنا لا وحك هو علي ابن ابي طالب اكضي بيه .
رد جبيرهم بلغ كاظم بحجي الشيخ سرحان ..
كاظم عرف السالفة راح تنلاف عليه .. تغدى بيهم كبل لا مروان يتعشى بيه .
بنص الليل وهد على بيت وسن
وهي نايمة .. دك الباب .. صاحت : منو
- اني كاظم فتحي الباب
- شرايد كاظم .. شعندك
- جاي اكلج فتحي الباب شني مو رجلج اني دفتحي
- رايد احجي وياج كلمتين .
فتحت الباب : شرايد
- رايد اشوف ابني
دفعها وفات للبيت ، مشت وراه : هستوك تذكرت عندك ابن وجاي تشوفه .. وينك عنه كل المدة .. فلس ما صرفت عليه ولا وكفت بولادته وجاي تكول ابني .
- متفقة ويا مروان عليه ولج
- مروان شنو اني وين احجي وانت وين تحجي
- شوفي اذا حسبالج اني غشيم وما ادري بسوالفج .. تكونين غلطانه اني ذيب امعط .. وسوالفكم ما تعبرني .
حجاها وشال الطفل مشى بيه : وين رايد بالجاهل كاظم عوفه
- خب اني كاظم ال صياد العبكم ما تلعبوني عود رايدة تذليني انت والكوا** مالج .. ماخذ ابني وطلاك تحلمين تطلكين .
كامت تصرخ : كاظم عوف ابني كاظمممممم ، عووووفن ابني جاي اكلك
دفعها حيل للكاع وجر مفاتيح الباب وقفله عليها من برا واخذ الطفل وطلع من البيت ، كامت ادك وترافس بالباب وتصيح : كاظم حراااام عليك .. عوووووف ابني ما اريد كلشي بس عووووف ابني .. كااااااظم
ركضت طبت جوا ..
دكت على سرحان رد عليها متفاجئ لإن الاتصال نص ليل :ها بوية سلامات
- عمي الحكلي فدوة ابوس ايدك .. كاظم باك ابني وطلع من البيت عمي فدوة الحكلي عميييي.
بهاي الفترة
وبعد ما سرحان فرض على عباس يجلي من المنطقة وما يدوسها .. اجر بيت زغيره هو وميادة وكام يطلع للشغل من الفجر يرد المغرب بس حتى يلحك على عيشته ويسدد مصرف وايجار البيت .
يرد مثل الميت من التعب ياكل عشاه وينام للفجر يكعد وعلى هالحال .. مدة .
لحد ما فد يوم راجع المغرب كوة يجر برجليه من تعب العماله .. سلم على جاره .. رداه : اهلا ابني وعليكم السلام
وكامله .. : انت ابومن ان شاءالله
- بعده ما صاير عندي جاهل اسمي عباس
- ها اهلا وسهلا .. انت بالبيت وحدك عمي لو ياهو الوياكم ؟
- بس اني ومرتي .. ليش عمي .
- عمي انا ما رايد اسويلك مشاكل بس شرف الزلمه بيته وانت تكول بس اني ومرتي .. بس احنا واهل المنطقة ملاحظين من مدة بعد ما تطلع الفجر اكو رجال يطب بيتك .. تعرفه .. عندك علم بطبة هالرجال
احنا الرجال هذا نعرفه وواحد زكرتي وصاحب مشاكل .. عندك علم بطبته لبيتك ؟...... يتبع
☆☆☆☆☆
#زينب_ماجد
اذا تحبون تقرون سورة الفاتحه لـ روح كواغد ، فَہ اسمها الحقيقي ( ترفه )
اسم على مسمى 🥺💔
تذكرون بالقصه ذكرت زينب انو مـט ابوها سماها كاغد مـט شده بياضها ، طلع اسمها الحقيقي ترفه ؏ كد بياضها وترافتها 🥺💕