#كحل_عرب
(((بقلم زينب ماجد )))
الحلقة -9-
(الموت يزور احدهم )
روحي
حارت وياهم يذكروها المضى
وگالوا أشدعوه ؟
وأصبحت مثل اليهد وحيد
جدام الزلم وبعازة أخوه
ينولي وخالي الظهر
مهضوم بدموعه أيتچّوه
لــِ عريان السيد خلف||🖤
كض ايدي وكال : توافكين يعني توافكين ، وهالمرة امر
رجعت للسيارة : شنهي انت ما تحس
- نزلي ولا تسمعيني جلمة لخرى ترى تحملت جلمات التجاوزتي بيهن على اعصابي
- ويو ما وافكت شسوي
- كعدة بالبيت ما الج و تظلين ابيت اهلي
- وانا ما اضكر طلبت بيت كل الردته جهالي
نزلت من السيارة وركعت بابها حيل وراي ، وما اتنوعت عكبها ، اااااخ يا ال ثجيل ششوفن منكم بعد ، اخوه ما صالة سنة من مميت و حاط عينه علي النكس ... يكلي شعرج نازل الفيسد بعد ما كعد يتورج ساعة .
فتحت الباب ، وسن كاعدة تلعب بالحديقة ويا بت سرحان ... ساعة الشافتني ولنها تفز : يمممممممممه
- يبعد امج واهلها
ركضتلي بلهفة وانا ذبيت الكوار من ايدي وتلكيتها ، حظنتها وحبحبتها : شلونج ييمه شلون مدرستج
- مشتاكتلج حيل حيل
- يبعد اليشتاكولي وعلى انا ازود بس زماني الدولباني وخلاني اهدج .
كربت وردة بت سرحان : عمه
- هلا بيج عمه
حبيتها و جريت ايد وسينه و هدى على متني و دخلت البيت ، سلمت اعلى النسوان و تلكني بالهلا و المرحبا ، رحت لحجرة امي حبيت راسها ، نويمة ما حست علي ، نشدت الداريها عن صحتها كالتلي : بعدها على العلاج تنام و تصحى كبل امس خذيناها مستشفى تخربطت علكولها مغذي خلصته وردينا
- مت عيني كون
ضجت حيل عبن الله حطني حدر رحمة ال ثجيل لا كدرت اعين امي ولا اشيلنها يمتى ما يسمحولي اطلع ويمتى ما يامرون ارد.
كعدت بالهول اسولف وياهن بس فكدت مرت سرحان ما هي .. نشدت : جا مرت سرحان وين
- عد اهلها
- ها خير بس لا متعاركين
- لا جايبة صارلها اسبوعين .. جابت بت سمتها شيماء
- وهدت بتها الاخرى هنا
جاي احجي دش ياسر ، اول ما شافني تكرب : ها شلونج عمة
- هلا يبعد عمتك
اجا حب راسي : يطيك العافية عمه شطولك صاير ولك
ضحك : جا نكصر
-طاح حظ ابوك الهدكم و شرد خل يجي ويشوف ابنه صبح زلمه
ليلى : الله يحفظه جا انا بيمن اتنوس غير بوليدي
- شكثر عمره صار ؟
