كُحل عرب

البارت الرابع و العشرين

#كحل_عرب
(الفوضى )

((( بقلم زينب ماجد )))

الحلقة_46
( فقدان )

الدنيـــــا  لــو  رادت  تـــذلك
تعتني ‎لگلبك تلچمك بالعزيز
لـ عريان السيد خلف||

طب سرحان للبيت ، هدوة امددة رجليها ومنتجية على الكرويته وتباوع محاضرة دينية للشيخ عبد الحميد المهاجر ، كعد على الكرويته و هو يتجي ايده عليها : ها يم علي شلونج

- هلا بيك يبعد روحي ، تعيبان
لكت رجليها من كعد

- اخذي راحتج بوية مددي ، جاي استراحلي شواي واطلع عدي شغل ، البنيات وينهن

- كلهن بغرفهن ، ما حجيتلي حجي مروان شنهي عن مرته ، جهاله نطو بجي الليل ما نامو خصه هاذ الزغيرون يلوع ..

- وانا لهالسبب رديتها من غبشة لجل هالزغار ذول المبتلين بذنب الكبار ، ما ادخل بينهم ، يريد مرته ذيج فوك و يكعد وياها ويتصافون ما يريدها خل يطلع ويا الخذاها ويبعد من البيت

- لا اسم الله ما يريدها شني بت غلطت وصلحت غلطها وردت جا شنهي ابتلت .. لا تخلي يحج بالطلاك .

-لاهو يسمع ولا هي التسمع وانا فاض غيضي منهم .. هلهم على حالهم هاذ وهم يقررون مصيرهم مالي غرض .. شنهي رجليج يوجهنج

- اي والله اموتاتني يونن علي

- جا علاج ما تاخذينه يهدوة

- مرة اذكرنه ومرات يسهى بالي، شسوي تجز روحي من الدوة

- شوية خل استقر واخذنج لايران هناك العلاج شوي احسن، منها نزور الإمام الرضا عليه السلام وهم اعرض حالج اعلى الدكاترة غاد.

-اي والله الواه شفايتلي ازورن الرضا سلام الله عليه

- الله كريم، شني الصوت هاذ ؟

- جنه صوت عليوي ابني ، دخيلك ربي .. فزت .

.....

الاء: طلعنا بعد الظهر وكف السيارة اباب بيت اهلي وكال ( ممنوع منعا باتا اطلعين باب البيت ، وسالفة مأمون اخوي ومروان رابي عدنا والحجاب متيهته كدامهم ممنوع من اشوفج مرخية حجابج كدامهم بعلي اكصبج) 

ظليت اباوعله صفح ، حجه : ديلا يلا لا تباوعين صفح تسمعين الكلام وتنزلين

ظليت شامرة عيوني صفح واباوعله ، ابتسم : تسمعين مو

- اي بس لا تهدد

هز راسه وضحك وهو يكض بالستيرن ، مديت ايدي وكتله : مصرف

- انوووب
طلع من جيبة عشرة الاف واطاني ، نزلت من السيارة وهو يكلي : ديري بالج على نفسج بالليل اجيج .

- ماشي
طبيت واني الوحله لحد ما راح ، انداريت ع المخزن عبد الله واكف بيه وكاض كتاب : هلووو شلونك