#كحل_عرب
(بيت بيوت)
((( بقلم زينب ماجد )))
الحلقة -8-
( شروط السكن في البيت )
فك عينه سلطان وهو ابيته ، بحجرته ، بس نجمة جانت يمه ، حجه : جسام
فزت نجمة : الحمد لله ابو نعمة تسمعني ، خايبين وينكم يلولاد الشيخ كعد ، ابو نعمة .. حاجيني تسمعني .
- جسام وينه
- هسه اجيبنه الك ، جاااااسم ... خايب جاسم
طلعوا ولده من غرفهم ، وجاسب طك دشداشته وطلع يصيح : ها يمه
- ولكم ابوكم صحة وكعد يحجي ، خايبين تعالو ليه
راديون : انا بحجرتي واسمع صياحهم ، حجرتي معزولة عنهم وجولتي واكلتي انا وجهالي لوحيدي عبن كاضة عدة بس بالليل من تهديد الوادم و تنام اطلع اغسل ثوبي اسبح ، اسوي الشي الاريدنه واجيبن اغريضاتي وارد اخلص ايامي كاعدة بهالغرفة وعالكة قرأن اعلى روح جسام عبن ما اعرف اقراله .
ظليت كاضة الباب و استمع ليهم ، كلها التمت اعلى حجرة سلطان ، واسمع الها بوية و الحمد لله اعلى سلامتك وردت عافيتك ليك .
جاسم : بوية تسمعي
- جسام وينه
كلها سكتت، مد ايده ، تناوشه جاسم ونجمه و عاونوه اعلى الكعدة ، اطاه حمدان عوجيته ، ماله خلك يطيح بعده كوة يكعد اعلى حيله .
كض عوجيته و انتجى عليها وحط راسه اعلى الزام العوجيه ... كلها ساكته حوله ما يكدرون يحجون ، تكدم جاسم وحجه: بويه اجيبلك شي ، هكو شي يوجعك اخذنك مستشفى .
ما رد .. ظل بالربع ساعة ساكت ، رد نطق كلمة : جهال جسام وين .
جاسم : جبتهم هم و امهم و هساهم بحجرة امهم جويعدين تريدني اجيبلكياهم ؟
- اندهلي اعلى وليده
كلها فزت تصيح : راديون ، جيبي احمد ، وين احمد ، الحجي يريده .
راديون : فزيت من سمعتهم يصيحون جيبي احمد ، صكيت الباب وركضت لجهالي نايمين اغطي بيهم ، كاموا يدكون الباب حيل صحت (شرايدين من جهال ؟)
نجمة : جدهم يريد يشوفهم شنهي تمنعينه فكي الباب
- ما تاخذوهم مني
- خايبة فكي الباب ياهو الياخذهم منج .. ولج فكي
فكوا الباب ، هدى كعدت تبجي واحمد نايم ، كضيت باديها : عمة عليج العباس كون تسون بيه شي وعلي كلبي ما يحمل بعد .
ردت علي مرت حمدان : شمالج ما تكليلي بس صحة الحجي ويريد يشوف ابن جسام شنهي تمنعينه ؟
- لا ما امنعنه ، اذا بس هيج هاذ هو نويم شيلو واخذوه .
شالته نجمه و طلعت بيه وعين راديون وراها، ودته لسلطان ، شالوه حطوا الولد بحضنه ، طام يبجي الجاهل جيف كطعوا نومته و جايبينه بحضن غير حضن امه .
