#كحل_عرب
(احضان باردة)
(((بقلم زينب ماجد )))
الحلقة_٣
(وثائق غير شرعية )
مگالب والليالي تريد وسعــة بال
وهموم العــلي ما مـــرن بواحد
لــِ عريان السيد خلف ||🖤
وكع ابوي بنصنا كلنا فزينا .. نندهة وما يرد ، نطك على خدة وماله ردة فعل ، تسودنا ... كمنا اني ونانة نصرخ ويمه كواغد طلعت للشارع تحشم الناس ، وعباس ركض للشارع العام وكف تكسي .. اجا مؤيد وسرحان ومروان وراه ... ولحكته هدوة وامي والبنات .
شالوه للمستشفى .. صابته جلطة ثانية ولازمه عملية بسرعة .. اذا ما سواها بأسرع وقت .. يموت
انكلب عزا ثاني ابيت سرحان وحاكم ، والكل لهى يسالفة حاكم .. فلوس العملية ( ٦ ملايين و٣٠٠) .. منو البيت حاكم بجيبة ١٠٠ الف حتى يجيب ٦ ملايين .
خابرت كواغد على هدوة : الوووو
- ها يمة بشري ابوي شني
- لحكي ابوج يهدوة يمه ان ما سوا العملية اليوم يموت
- اسم الله يمه ، وشنعي متناين يموت ، ما تسوونها
- وياهو العدة ييمه ويسويها ، هلبت تكليل لسرحان يدايني واني اوفي كل ما صار عدي .
- انا ادبرنهن يمه .. الفلوس اليوم احسبيهن يمج الليلة اجيج .
كمت من حيلي .. احتاريت اطلب من سرحان لو لا ، جيف توا طللعة من فاتحة ابنه ذاب فوك ٢٠ مليون عليها والناس بعدها ما كاطعة رجل من البيت ، فض الجادر والهوسة بالبيت ونفس الطبخ والناس .. استحيت اطلب منه خص وبنات السلف كلهن عدنا يعني لو سمعن خذيت فلوس من سرحان لعملية ابوي يلخونا بال*** وتصير سمعة على اهلي وصعبة احملنها .
طلعت بتوتي الذهب وردت عليوي ابني يروح يبعيهن ليه ، بس ما هو .. مدري وين راح ، صحت : ولج نويسة يمه اخيج وينه ما هو ؟
- جا مو راح ويا حبوبتي وشال جدي شبيج يمه
- يا نسيت وعلي انا انشده بالي على ابوي مت عين كلبي عليه
ندستها : تكدرين تزركين للسوك ، جدامي ما يشيلني يبعد امج
- وهالشغل هاذ يمه ياهو اليشيله شمعتازة من السوك
- ابوي محتاج فلوس لعمليته ، روحي بيعلي البتوت ذني .
- يمه ذني بتوت عرسج
- شينفعني بتوت عرسي ييمه وجدج بين الحيا والموت ، ما ظلي حيل واتحمل الونة .. صواب بطيطة لهساه يفت بكلبي ان جملها ابوي اموتن وعلي .
جاي نحجي ، طلع سرحان حجه : ها شني ابوج ، اخابر عليهم محد يرد
- خابرتني امي يكولون راح يسووله عملية ، لزوم نمش ليه يبو مأمون
