#كحل_عرب
(بيت بيوت )
((( بقلم زينب ماجد )))
الحلقة_28
( نهوة آل ضاحي )
ابتسملي الدنيا تحله
واحس كل الناس يحبيّب حبايب
لـ عريان سيد خلف||🖤
وسن : انطيت موافقتي و طلعت من الغرفة كلها خاطر لا اسمع ( العليش تبجين و شمالج ) رحت لورا البيت كعدت ويا روحي ابجي واحجي ويا السما على رب العالمين يسمعني و يخلصني من عمتي فخرية .
بس شيخلصني اخوها امضى منها .. واهلها كلهم ما يحبوني من يشوفوني اداري ابنات عمي من فخرية يلمونها ( عليش تخلينها تحتك ابناتج اخذ الوريدة وشمها تطلع البنية اعلى ذويل امها، وامها كاولية ما تخافين على بناتج).
عمتي كل عمرها تعيرني وتكلي (ياهو الياخذج و محد ياخذج) تالي تغصبني على اخوها البكبر عمي الجبير !!
لحكتني عمتي للمكان الكاعدة بيه و تخوصرتلي : شعدج كاعدة هنا ؟
- ماكو شي عمة بس هيج مضطكه روحي
- عسنها دوم كومي جوا لا عمج يحس عليج
- عمة عمي من يشوفني ابجي راح ينشدني شمالج وانا ما عدي جواب اطي
- اي وشمالج شنهي تلاكين الاحسن من اخوي وكاعدة اتبجبجين لوحيدج ؟ زلمه ويا حلاته والف نرة تتمناه كومي شو كومي ياله.
كمت وياها ودشيت ليجوا ، تلكتني مرت عمي هدوة : شمالهن يعمة عيونج محومرات شنهي المبجيج
بس حجت هجي انا شهكت ابجي ، مدتلي اديه : يا شمالها البت ؟
فخرية : عيارة بنات .. امشي دشي داخل .
هدية : هديها اريد اكعد وياها ، تعاي عمه .
- وانت ياهي وتكعدين وياها .
- انا مرت عمها حالي حالج ومثل ما الج حك عليها هي حسبة بتي والي حك اكعد وياها وعرف شمالها .
ظلت تخر بيه خاطر تنبهني ما احجي لعمتي هدوة ، خذتني و دخلتني بغرفتها جانت نوسه امدده ابنها على رجلها وتهز بيه ومتجيه ظهرها للكومدي، من شافتني تعدلت : ها يمه شمالها .
- انه ادري ييمه شمالها البت .. لجن فخرية وادور وراها ما يطول اغطاها ، اكعدي عمه وحاجيني .
كعدت بس مالي جلمه احجيها اخافن تزيد المصايب من حدر راسي ، ظليت ساكته و اطكطك باصابيعي .
ردت حجت : عليش ما تجين يمي ؟
- عمتي ما ترضى
- تريدن احاجي عمج ؟
- ما يحتاج بعد راح اعرس
- منين تعرسين
- اخو فخرية قاسم .
ضحكت عمتي وكالت : وروح جميرة ذيج العزيزة و روح ستار عرفتها ما تعدي السالفة اعلى خير من ساعة الحجه مروان .
