#كحل_عرب
(أحضان باردة )
((( بقلم زينب ماجد )))
الحلقة _٢٨
( كواغد )
لتعاشر البذات والماله تالي
مثل اليلم الماي ..
يرد جفه خالي
(عريان السيد خلف )
علاء : صيح امك عمو .. كلها عمو علاء يريدج
طب علو يركض والاء واكفة بصف نانة ، كام يجر بهدومها : ماما ماما
يجر وهي ما منتبهتله
ماما .. ماما
- هاااااا روح العب ويا الجهال
- عمو علاء يريدج
- كله بعدين
نهاد : شوفي رجلج شيريد
- ما اريد
حجت والتفتت تساعد نانة وتطيها السجينة حتى تكص الكيكة هي وشاهين .. حطتها بالمواعين واطتها الهم .
شاهين شال الشوكة حتى يوكل نانة .. و نانة اخذت كصة من الكيكة بالشوكة اكلتها ومدت ايدها للكلاص .. ظل شاهين واكف متبسمر .. حجت اخته : وكلتي روحج غير توكلي ويوكلج.
تجاهلتها واخذت العصير شربت من عنده شوي وردته ، اكل شاهين وما شرب من الكلاص .. وكعد .. بس كعد ضايج حس نانة مو على بعضها ومتضايقة .
والكل انتبه على تصرفاتها
وقرنها بالماضي بتصرفات اختها يوم اللي خطبها جلال وجانت عيونها يجدحن بدموعها .
شاهين : شبيج
نانة : كلشي ما بيه
- مو على بعضج
- مابيه شي
حجيت باوعت لامي .. تخزرني واتأشرلي عود اضحك شوية لإن الناس انتبهت عليه .. بس مو بيدي مالي خلك لكلي وكل الاتمناه .. بس تنتهي هالهوسة وانفرد بروحي .. لإن صدري حيل تنك .. ما اكدر بعد .
صفكاتهم وهلاهيلهم .. مثل تشييع جثة مو فرحة ..
ارد وارجع على روحي والوم
كله مني .. اني السمحت الكلبي ينجر بغير دربه
تنهدت واني مدنكة وكل هوست عرسهم فوك راسي
استحي ارفع عيوني للناس وتشوف حزني
صاحو من برا وكلهن لبسن وطلعن ..
الزلم طاشة سرحان وولده طالعين باقي بس مؤيد وعلاء
طلع شاهين متضايق من الخطبة ..
مجرد ما كام اني شلت بدلتي وطبيت جوا ..
ردت افوت بغرفة امي جرتني نهاد : تعاي لا تنعزلين ، تعاي نكعد يم الحجية .
جرتني وطبيت لغرفتها باوعتلي يمه كالت : مبارك يبنيتي .. عسنها زواجة الدهر
- شكرا
كواغد : شو شكرا شمالجن يبنات حويكم .. مامش وحيدة منجن بخطبتها شاهرها سنها كلجن تتباجن .
نهاد : ترا كلهم انتبهو نانة والله عيب ما يصير هيجي ، جان سايرتي الموضوع
نانة : سويت الاكدر عليه ، مو تريدون تخلصون مني واني ثكل بهالبيت هاهيه هاي راح اتزوج تفتكون مني
