#كحل_عرب
(أحضان باردة )
((( بقلم زينب ماجد )))
الحلقة_٢
(عركة عباس )
عَودني اعلى بُعدك
و انتَ ابو الطَيبات
بَلچن عالبُعد يَمعود أتعود ..
لــِ عريان السيد خلف ||🖤
رد ع الأتصال، طلع سرحان : ميمون بوية شمالك بروحك بعد ابوج جا هو هيج ... وليدي
مأمون دار وجهه وهو يتوجه للسيارة ويحط التليفون على اذنه ، مروة ويا ما سمعت الخط نفتح حجت : الو .. مأمووون الو
- شرايدة ؟
- رايدة بس احجي وياك
سرحان : مامون احاجيك بوية
- بوية اطك واموت لو ظليت هنا خليني اروحلهم
- وليدي تكضي الفاتحة وانا اخذنك بيدي ، بس بهداي
- يا فاتحة ويا ناس بوية ، هدني
- مأمون بوية يواشك وليدي
ما رد ولا اقتنع ، اندار سرحان لعلي وكاله :ما يرد ولك امشي ويا اخيك لا تهده .. امش بعد ابوك ، الله يعين كلولنا على هل المصاب ربي وعلي كلوب ما ظلت عدنا.
ركض علي للسيارة وفتح باب القيادة : انزل تحول هناك على ما اجيب سترة وتليفون ، انزل
نزل مأمون و التليفون بيدة ومروة تستمع وتبجي ، حجه : فضيني شرايدة انت
- اني مستعدة اسوي كلشي واساعدك اذا عمي اله ايد بسالفة الحرك .
- امشي مني
- حتى مكانهم اكدر اندله والله ، اني مستعدة كلشي اسويك مأمون ، بس اسمعني
سكت ، ظل يعاين لمروان الجابلة قمصله و لفاف : هاك اقلها دفي روحك .. تحتاج امشي وياك ؟ اني والله راح يظل بالي كله يمك من خرب بيومك جا هسه وكته ادك للنجف تخلص الفاتحة واني اخذك بسيارتي .
مامون : بعدين نحجي
سد التليفون .. اجا علي ، ومروان يوصي : لا تخلي يسوق ابد .. وشوفلك مطعم واجبرة ينزل ياكل لا يطيح .
-ان شالله ان شاءالله
سرحان : عليوي بوية ، تاني
طلع ورقتين من محفظته .. وخلاهن بيد علي ، حجه علي
: عدي بويه رجعهن
- ميخالف درب هاذ وليل كلشي يصير خليهن حدر يمناك ودير بالك بوية ولا تستعجل بالسياقة بهداي .
مروان : دير بالك اخوي اخوي
علي : اخابركم ان شاءالله .. بس بوية اطي خبر لامي لا يظل بالها علي ، ما لحكت اكللها .
- انا اطيها علم .. مودع بالله
لاف السيارة و طلع بيها لدرب النجف ، ومامون كاعد يمه بلا صوت بس متجي راسه ومغمض عيونه .. وعلي يلوف بالطرق حضر تجوال ومنين ما يدور يكلوله (رد ) لحد ما كام ياخذها فروع فروغ الى ان كض الطريق الرئيسي .
