#كحل_عرب
(الفوضى )
((( بقلم زينب ماجد )))
الحلقة_69
(نص طابوكة )
شلي بيهم
يالتگلي انشد عليهم
شلي بيهم ؟
لــِ عريان السيد خلف ||
كضيت الباب ودكيت رجل الا يفتحه و هو كاعد ويكلي : ما افتح ، اكعدي واسكتي واعقلي
- يا عقل هذا التحجي عنه وانت خاطب عليه ، حجيك وحبك ذاك وينه ؟ .. من تنشتل كدام بايي وخبصت الدنيا حتى تخطبني ... شسويت .. ما نر سنة على زواجنا تخطب عليه
- طكت روحي من المشاكل الاء امك مرتك امك مرتك ، هيج خلصت من المشاكل ، خذيت التريدها اني واني وياج عايشين محد بعد يحاجيج ولا يغثج .
- لا تسودني والعباس ماخذ عليه مرة وتكلي بعد محد يغثج ويحاجيج وانت جايب عليه ضرة ، ولك سنة سنة ما نر على زواجي منك بساع بعتني ، هيج رخصتني حتى ترضي امك .
- اهدئي وراح تشوفين الموضوع الصالحج صدكيني
- لا رايدة اهدئ ولا رايدة مصلحتي ، كوم وديني لأهلي و عوفني
- طلاك لا تظنين اطلك والله لو يظل اخر يوم بعمرج .. طلاك ما اطلك .
-حسبي الله ونعم الوكيل بيك ، حسبي الله ونعم الوكيل بأمك الله لا يرضى عليكم ولا يهنيكم بجاه العباس ابو فااااااضل .
حجيت ورحت كعدت بالزاوية ابجي وانحب وهو كاعد ع الجرابية مقابيلي ، ما رد على تجاوزي ، وظل ساكت ، حجه : ابجي شوية ترتاحين بس راح تعرفين السويته لمصلحتنا ، وطبعا جرة اذن الج .. ما تعوفين البيت بعد واطلعين .
كمت من مكاني : انت كاعد هنا يمي شعدك تغثني لو تسممني ، ما اتحمل اشوك كدامي ، اطلع .. ااااااااطلع .
كمت ادفع بيه من مكانه ..
كام على حيله ، فتح الباب وراد يقفله فتحت الباب وجريته حيل : مو سجينتك اني ولا فصليتك حتى تخوني وتحط عليه ضرة وتقفل الباب .
- اي ميخالف بس اهدي واكعدي ، انت حامل لا تأذين روحج
- حمزة لا تغثني اكثر امشي عننننننني ، وخررررر .
دار ظهره ومشه .. كعدت بغرفتي ابجي من كل كلبي .. شنو السويته ويحط عليه مرة ، شو متحمله ومداريته ، باكو فلوسه وردوهن وطمطموها بيناتهم وبس التهايم حليتني ومحد اعتذر ولا كالي انت مالج غرض وما بيج صوج محملني ذنب بلا ذنب ..
ظليت اباوع لبطني شكد فرحانة جنت من حبلت بطفل منه جيف احبه .. صرت احس هالطفل ثكل على كلبي ، لو صار يلوي ذراعي بيه لا يطينياه ولا اكدر انطي .
كمت للكنتور دموعي تتجارى .. ابجي بشهكة
طلعت صور عرسنا شكد جنت فرحانة وطايرة بالهوى ما ادري ذبيت روحي باخيس حفرة من حبيت مثله .. خايني وخاطب عليه ويحجي ابرود ما هامته دموعي ولا قهرة كلبي وفرفحتي كدامه .
