#كحل_عرب
(بيت بيوت )
((( بقلم زينب ماجد )))
الحلقة_37
( سر مغالط )
مأمون : زفونا للغرفة ، جانت عمتي لالة واكفة عدها وهي كاضة ايدها، بطبتي كالتلها : ياله صيري سباعية .
طلعت بس بطة ظلت عينها ورا عمتها ، وعيونها مدمعة، سدت الباب ، دنكت راسها و ظلت كاضة مصحف زغير بيدها وتباوعله ، تقربت كعدت يمها : خايفة
كوة طلعت الكلمة من حلكها : شوية
- اني يمج لا تخافين .
ظلت منزله راسها ، كمت من مكاني نزعت السترة فكيت دكمة القميص من يم الركبة و جريت الرباط ... اندكت الباب .
فتحت الباب .. ابوي ووياه السيد و وعمي فاضل و حبوبتي كواغد و عمتي و امي هدوة ، دخلوا للغرفة و كعد السيد على الصفحة يعقدلنا ..
ظلت بطة كاضة بأدين امي هدوة ، عقدلنا السيد وهي رددت وراه .. ليما كمل وبارك النا و كام .. دارت علي حبوبتي كواغد و كالتلي : البت زغيرة بهداي اعليه طول خلكك .
كربت مني : العمر كدامكم يمه موش الا اليوم .. فاهمني يبني .
- فاهمج يمه
هدية : عشاكم هسه اجيبنه و بعد اقفل الباب .. انتم اخذوا راحتكم .
طلعوا من الغرفة ، تقربت منها كعدت يمها ، رفعت ايدي وحطيتها على جتفها ودنيتها لحضني : مبروك صرتي حلالي .
هزت راسها وهي مدنكة ، قربت لمتنها بست بداية جتفها ، كشت بساع و لمت نفسها ، بعدت كذلتها عن وجهه : ما راح اذيج ابد كلشي على راحتج .
- اني خايفة
- لا تخافين واني موجود ، ما اخلي شي يصيبج ، بروحي احطج .
اندكت الباب تعدلت من كعدتي و رتبت قميصي، حطت الهام العشا و عمتي وياها ، حجت : محتاجين شي ؟
- لا لا هاهيه عاشت اديكم تعبناكم .
الهام : شايفين الف خير ..
- تسلمين .
طلعوا من الغرفة ، كمت للباب طكيت الباب قفل ، وكلت الها : تبدلين ؟
ظلت تباوع للغرفة ، حاجيتها : راح اكعد على الجرباية واطيج ظهري بدلي براحتج اذا تردين .
جريت دشداشة بيضة من الزاوية ، واطيتها ظهري ، نزعت القميص والحزام ولبست الدشداشة يلا نزعت البطرون خفت احرجها وتخاف .
كعدت و اني اسحب المصحف من الجرباية واحطه على صفحة ، حجت : هاي ما دا انوشها .
ردت ادور ، حجت : لا تباوع عفية .
- جا ما تكليلي شلون اشوف التردينه اذا ما اشوف
- هاي السحابة ما تصير .
