#كحل_عرب
(الفوضى)
((( بقلم زينب ماجد )))
الحلقة_58
( بيت لؤي )
احسك لِغر
شنهو انت وشنو اوصافك .!
لـِ عريان السيد||🖤
نهى الأتصال سرحان منه ، دك رقم رجال سيد صاحبة .. يشتغل بالمكتب ، اتصل : الو السلام عليكم
- الو وعليكم السلام ، تفضل
- وياك الشيخ سرحان ال ضاحي
- شيخنا العزيز اهلا وسهلا اهلا وسهلا ، الغالي امرني شيخ
- ما يأمر عليك ضالم الله يكرمك .. لجن عدي وياك سويلفه
- خادم انا شيخ
- خادم ربك ، هكو وحيد يشتغل بالمكتب لجن مبين زعطوط وما يحط كدر لكباره .. وخابراتي يهدد
- افا شيخ تتهد ، بس اطيني اسمه
- الولد تابع المكتب اللي بالاخير
- الولد هناك كلهم جماعتنا شيخ بس اطيني اسمه
- الولد اسمه حمزة .. شنهو اسم ابوه ما اعرفنه بس تجاوز حدوده وياي .. تعرف شباب هالوكت كل الكضلة تفك حسب الدنيا اله وماله رداد
- لا شنهي ماله رداد اليمسك شيخنا نفصمه فصم .. انا هسه اخابر على حجي يونس واعرف الولد منه ، بس هو هدداك تهديد مباشر
- اي بعلي تصور انا خاطب بت لابني يكلي ابنك لو كربها دور راسه وره السدة
- دخل ياكل **** شحاسب روحه ، انا اتكفله شيخنا وما يصير خاطرك الا طيب .
- الله يسلمك يا الطيب ، مرنا انت والربع خل نضيفكم
- لا ان شالله احنا هم عدنا شغيلة يمك ومعتازيك .
- خادم للطيبين
- لا حشى شيخنا على راسي
- سالم راسك بوية ، هلا بيك
سده من الزلمه ، رد خابر على مأمون : ها ميمون بوية
- هلا يابه .. خابرته
- واحد مسقط حاسب روحه هو ولا عنه ، بس انا ابوك يميمون با ما احطن راسه حدر جدمي ما اتسمى بسم ابوي
- ليش حجه شي
- الجلب يهدد .. يكلي لو عارضتني دور راس ابنك ورا السدة
-هه تهي يالله .. ما تخلي الي اشوفنا شلون يحط راس واحدنا ورة السدة
- خله الي انا اعرف اتصرف وياه لا تكثر معاداك .. خليك مسالم ويا الكل .
- وعمي حاكم شكلله ؟
- كله خل يتحضر انا الصبح اذا راد الله ابغداد ، خاطر نمش اعلى اهله
- اهله اجو واتبروا منه
- هاذ حجي بوية يو كضيته الف عكال سطلع وراه ، يتبرى منه شنهي لعب جهال هو ، نمش لشيخم نشوف يا شيخ مسؤل عنهم ونكعد عده واكاومنهم على تهديد ابنهم .. يا يجيبون ابنهم ويجون ابيتي يعتذر و يتعهد ما يعيد ولا يمس احد من ال عشيرتي .. يا اكاوم وافصلهم .
