#كحل_عرب
(بيت بيوت)
(((بقلم زينب ماجد)))
الحلقة_17
(شرط خنجر )
ابگه اگل للروح لو جرحي انلچم
ياروحي اسكتي
لـِ عريان السيد خلف||🖤
جمارة : دنجت لحظة الحجة بأذاني وميلت بوجهي عنه ، سحبت ايدي وانا احاول امسح عيني ، حجت وحدة من كرايبهم
- شبيها العروسه لويش هيج دا تبجي ؟
ما اجاها جواب من اهلي والكل ظل يدير بعيونه يدور جواب ، صرت اسمع مهامسهم وبكلبي الف عصرة تعصرني ، تمنيت بروحي ميته ولا انا بمكاني هاذ
كعد جلال بصفي على الكرويته وانا اجرن بخشمي، ظل يعاين علي .. حجه : اكو شي ؟
تقربت من عنده ايمان وهي تحط كلاصات الشربت ، رجع ظهره ليورا .. گح وهو يعدل بملابسه ويدير بوجهه على النسوان ، من ما سمع من الجواب ، دنج لايمان وسألها : لويش دا تبجي صاير شي قبل جيتنا .
ايمان : تحاجت هي وابوها حاكم عصبي متعرفه .. وتوتر الجو .
- يعني ماكو شي ؟
- لا ان شاءالله ماكو شي
حقدت عليها ساعة الما بينت له انا مغصوبة عليي ، ظنيت هي القنعت ابوي بهالزواجه وهي الخلته يغصبني عليه ، جاوبها هو :
- اي زين لعد .
حجاها و هو يمد ايده لأيدي ، سحبها و شبك اصابعه بأصابعي .. جريت ايدي منه بعصبيه و حجيت : ما احبن احد يكض ايدي
استغرب الوضع هو ! سكت ما رد
وكفت يمه وحدة من اقاربهم ، مدري شحجه وياها و كام والبنية تكللهن : يلا عيوني هم يالله نوصل ، يلا .
بمجرد ما كام انا كمت من مكاني و طلعت من الهول للغرفة مالت امي ، نزعت من راسي وكعدت ابجي بصوت مسموع .
لحكتني هدوة : شمالج فشلتينا جدام الوادم الكل ظل ينشد شمالها البت جا هو هجي ؟
- لومي اهلج لا تلومين بيه ، شمنتظرة الاكي بالهلا و المرحبا ، اهلج غصبوني اعلى واحد ما اريدنه .
-ذنبج موش هين يجمرة سوايتج ومخابرج ويا خنيجر ما تنبلع ما فكرتي لهاليوم وكت التعديتي وكمتي اتجرين التليفون من الهول للغرفة وتتخبرين عليه .
- هم الجبروني على هالسواية صاله عشر سنوات يخطب واهلج يردونه وهم يعرفون انا راضيه بيه واحبنه ، شلهممممم غرض العشت ويا واحد زين لو موووووو زين انا رااااضيه بيه .. جلال ما اريدنه ولج والله ما احبنه.
دخلت نوسة بتي وهي تتكرب من جمارة وتبجي وياها
وذيج تبجي و تشمر بديها وتصيح كربت منها وكضيتها : انا ولون ما اطي بيج واكولن حكج بس الصار زين و الحمد لله والشكر من كضت اعلى هيج ولا تبطلين .
- تبطيلتي اهون علي من غصبهم الي، زوجوني لواحد وانا كلبي معلك بغيره .
نوسة : لا تبجين خالة عليج العباس بسج.
