#كحل_عرب
(احضان باردة)
(((بقلم زينب ماجد )))
الحلقة_١٠
( ابي يرحل )
انه بلا صبر
والضيم مد الشوف
ومحمل هضيمه وما بگالي معين
تبعد معتمد
وتوز عليه الشيب !!
يطفه اسود ربيعي ويشعل التلوين
لـ عريان السيد خلف||🖤
هدوة : دخل سرحان صبحية ، انا امددة رجلية واونن والتلفزيون جدامي مفتوح على قناة الانوار .. حجه : ها كواج الله
- هلا يبو مأمون
- شمالج ، موش اعلى عوايدج شني مالومة ؟
- اي والله حجي ، الوجع جتلني
- منين
- من اركبي
نزع عكاله وشطفته وحطهن اعلى كتر وتدنى احذاي .. كض رجليه : هنا ؟
- ايييي ، ااااخ يابوية
ظل مدنك يفرج بيهن كتله ؛ محشوم ابو مامون ، عنك
- سبليهن يهدوة سبليهن .. انا يو صحتج تنشى جا اشريتها .. والا حالج هاذ انا ما احملنه .
- يبعد روحي جلماتك كافية .. ابو عليوي عزيزي .
- اخذنج للمستشفى
- لا هسه اخذ حباية ويخفن لا تشيل همي
- شلون ما اشيلن همج لا يزيدن عليج خليني اخذنج
- لا يبعد روحي توك جاي استراح
طب علي : ها الله يساعدكم
- هلا يعزيز امك
- هلا بوية ، موش جنك جاي مبجر
علي : اي او محاضرة وطلعت ما الي خلك رايد ارتاح
هدوة : اسم الله ابني يمه شمالك
علي : ما بيه شي يمه .. هيج خلكي شويه ضايك
سرحان : ان جانه الموضوع نفسه لا تتعب روحك بيه يبوي
علي : البت اني عاشكها بويه ، ليش ما ترضالي اتزوجها
- ما تناسبك وليدي
- بس اني رايدها ، وانت اكثر واحد المفروض يفهمني ليش توكف بوجهي .
سرحان : احسبني تفهميتك بويه ورضيت ، والتالي ؟
لزوم اشتريلك بيت واعيشنك واعيش مرتك وابوها وخواتها .. لو من ديرتك اكولن خوش ، لو من عمرك هم اكولن خوش ، هاذ مو عشك بويه هاذ استغلال ، البت لا من عمرك ولا من ديرتك .. مجلبة بيك لخيرك
- لا والله بوية القضية مو هيج انا وياها متصافين بلا غاية .
- المترايدين شني بويه ، كلية ما مخلص .. دخلص دراسة وكلي بزواج.
- مامون مو اتزوج وهو يدرس ما عليه شي .. شنو الصار حتى ما ترضالي
- انا ما راضي بالسالفة كلها من اساسها ، وسد الموضوع بعد ابوك
علي : هاهية بويه هاهيه
هدوة : على كيفك وياه يسرحان
- شنهي العلى كيفك يهدوة حالي ومالي لعليوي بس موش يطيح ابت مثل هاي الحابها .. بعده زغير وما يفرزن اموره .
- ولونه بس بهداي
- ما تشوفينه هاد كليته وراد
كام من رجلين هدوة ، فتح غرفة علي وفات لكاه امدد على سريره وصافن بالحايط ، حجه : اكطع علاقتك بيها بويه .
جاي يحجي طب مأمون من الباب : عمي ابو سنار شالو للمستشفى
صرخت هدوة : يمممممه شمااااله ابوي
- بس على كيفج يمه .. ما ميت
- ولك بووووووووية حاكممممممم
على صوتها فز سرحان وعلي
سرحان : ها شنهي
علي : شكو
هدوة كامت من مكانها وتصيح : ابوي شالو للمستشفى ، مت عيني بويه ، امشنا ولك عليوي يمه يو الحك بجدك لو ما الحكنه بووووويه
نزلت نوسة تركض ع الدرج ، صاح بيها علي : عباية امي بساع
سرحان : ياهو الشالاه
مأمون : كواغد و مؤيد بسيارتي
- جا ما رحت
- ما اكدر بس اسوق سرعة ادعمها حيل تعبان
طلعت هدوة من البيت وعلي وسرحان بوراها ، صعدوا بالسيارة وخابروا على مؤيد كال الهم : احنا بمستشفى القادسية .
بساع مشوله .. عد ما وصل المستشفى ومنزلينه ..
الاطباء كايليلهم لا تخلونه بالمستشفى منتهي اخذوه للبيت ووجهوه للقبلة واقروا على راسه العديلة وخلي روحة تطلع بين احبابة
