#كحل_عرب
(بيت بيوت )
((( بقلم زينب ماجد )))
الحلقة_41 والاخيرة
(ليلة مقتل المرجع)
وأبرى بيــــــــــــــــــــــــــــــــدك
وأغسل ذنوبي واواكح مستحاي
واكطع بروح العطش ومروة الحلوين ماي
يضيع جروحي غواها
و يعتلك شوكي جراح وانته دواي
وما مـش الما مش بعيني جزيره ونيه وحشه
وفكر ما صافي على راي
يداهر عيوني حلمهه بليله ظلمه
وكبل ما يغفى الجفن يطفى ضواي
لـ عريان السيد خلف ||🖤
مدينة الثورة _الداخل
عام ١٩٩٩
الكلوب جانت متضايقة وقلقة كون وصل خبر بأن مرجعية السيد الصدر تعرض لوعكة صحية ، وحاليا يرقد بأحدى مستشفيات النجف ، مجموعة من محبين السيد الصدر باحدى قطاعات مدينة الثورة ملتمين ابيت واحد صاحبهم ، منتظرين يطلعون بسيارة للنجف حتى يطمنون على صحة المرجع .
لكن وصلهم خبر ان الامن مانعين اي احد يدخل المستشفى وازداد الامر بتدخل عسكري لابعاد الناس وتفرقتهم وسط تعتيم كلي عن حالة المرجع .
الامر اللي خلا الناس تشك ان مرجعية محمد محمد صادق الصدر بخطر خصوصا بعد خطبته الاخيرة وتنويهه ان استشهاده بات قريب واحتمال تكون هذه الخطبة الأخيرة له .
حمزة : يعني هسه شنو نكعد هجي مربطين؟
علاء : وشنو اللي نكدر نسويه ؟ ماكو اي خبر .
- يولد الموضوع ما يطمن
حمزة : انا اشك السيد مكتول و ربع صدام ضامين هالامر ولو طلع هالامر صدك .. وحك علي داحي الباب ما نسكت والا نكوم الدنيا فوك راس الحكومة .
حجاها و كام ، جر مسدسه و حطه بظهره ، كضاه علاء : اكعد واسكت تريد تبلينا خلي ننتظر للصبح ونشوف لابد يوصل خبر
-ما راح يطلعون اي خبر ..
ثبت اسلاحه بظهره و نزل قميصه و طلع .. صاح اخوه
- حمزة .. ولك حمممممزة
اضطروا يمشون وراه حتى بلكي يعرفون خبر ، وكفوا عد واحد حزبي من المنطقة، حجه حمزة : السلام عليكم
- اهلا وعليكم السلام
- الوضع شلون
- الحمد لله بخير ..
- بس يكولون ان السيد انكتل
- ياهو الكال ؟
- لا الحجي مو صحيح
مد ايده حمزة على ظهره كض اسلاحه ، لزمه علاء و كاله : مشكور رفيق .. امشوا يولد
حمزة : جاي على بالي اكضلي حزبي املص ركبته واشرب دمه .
- انت مسودن يا بويه ما تفكر بنفسك فكر بابونا ، باخوك المعوق بامي خوااااتي ، امشيييي .
